上Youtube首頁熱門影片最近都見到呢段片，
有時仲要最大格果條，呀梁同學，上晒位啦。
第一次睇呢段片，就覺得極之浮誇做作，
不過睇左陣頂唔順無睇晒佢，亦不以為然，
然後再有司徒夾帶惡搞，就真係截正個笑點！
(尤其係佢句「呢首係蘇sad o既詩」)
其後陸續有薑檸樂版以至其他remix版等...
衛道之士就話呢D係網上欺凌事件，
其實我覺得根本就梁同學專登有心玩野，
其實梁同學只要識得食住呢個勢，
再用呢D腔調拍多幾條咁出位o既片，
有潛質做第二個司徒夾帶或薑檸樂添~ XD
而且只要佢咁做，一切惡搞即刻免疫晒。
至於有無人真係欣賞呢種朗誦技巧？
可能幾百年前有掛？我地老細講左句好中肯，
「佢把聲咁難聽，都唔入咪。」
就算佢吟得幾好幾七情上面都無用啦。
不過計我話就算比著劉華咁吟法都係GG。

一直想搵好似以前叱吒叱叱吒果種清談節目長期聽，
一路做野一路聽就最充實，工作中能夠接收更多資訊，
不過搵唔到，一係要即時收聽夾唔到時間，
最近搵到呢個大家真風騷，勝在重溫好方便兼量多，
唔似得魔星領或東頭灣咁聽完一集又要等下個禮拜，
主持係梁思浩做左十幾年風騷快活人夠專業，
(其實以前無乜聽開佢做節目，係最近先開始聽)
題材主要都係講下D花邊新聞/趣聞，似叱吒叱叱吒，
例如講邊個國家D野食最健康、乜公司請日本AV做獎品，
呢類節目要keep住聽，聽1年應該草埋唔少small talk，
有樣缺點要講講就係佢播完歌唔會講番歌名同邊個唱，
有時好聽想搵黎聽都唔得，亦好少播流行派台歌。
 

原來大快活可以免費加飯，
同收銀果個講要大飯就得，
咁就係唔係都加左先無蝕底！
寧願食唔晒都好過唔夠食。
唔怪得上次見人有兩碗白飯啦，
衣家次次食親都一定大飯，
佢會另外裝多大約3份1碗比你，
如果有兩個人唔係好大食，
其實可以買一個飯兩份食 XD
反正D餸一向爬晒D飯都有剩。

買左兩年零八個月o既Taylor114，
今日「寶劍賺烈士」送左比Alan，
佢話再會轉贈比無乜錢買樂器o既學生。
屋企地方細亦無可能兩枝結他standby，
(衣家長期都standby枝Yamaha CX40)
反正都放置play，睇怕好難再拎出黎彈，
枝野有暗病(下面固定弦果塊野繞起左)
所以搞到弦線同琴頸距離異常高，
去到7格打後果D好難押得實，
諗過用鎚仔扑番入塊野，但Royce勸唔好，
話唔知個結構入筍位果D係咪想像中咁，
一陣扑落去繃左點？最好寄去美國原廠整，
咁大陣仗？一陣醫藥費仲貴過買枝CX40，
唔啦，變左雞肋，掉又唔捨得賣又唔值錢，
不如送比有須要o既人仲好。

答車最常用o既殺時間手段就係睇高登，
有時睇正反兩方o既激烈辯論真係幾正，
好睇到落車都仲一路睇一路上扶手電梯，
不過最近個apps就經常連唔上，
連上開個帖又只係得null(無野睇)
一程車時間就係咁等佢load出黎，
等到佛誕都未load完，但D廣告又出到！
手機就係呢樣唔穩定未能取代電腦，
電腦o既話開唔到個網重刷一次都開到，
手機係一次開唔到就次次都開唔到，
好似硬係鑽入個死胡同唔識鑽番出來，
熄左個apps重開番都係咁，令人火滾！