自從實施所謂咩野膠袋徵收稅後，
去百佳、7-11、屈臣氏買野好唔方便，
(好在759、吉之島呢D無跟到風)
買一兩樣野的確會傻間間咁用手拎住行街，
買多幾件野都局住比五毫佢賺要多個袋，
感覺好似中左圈套咁被迫比貼士，
超唔gur，所以一係唔買一買就買多D要個袋，
大大減低左去呢D商店買一兩件野o既意慾。
不過最近去屋企附近間惠康買野，
有次買kinder繽紛樂3條裝同一包kitkat，
職員自動自覺搣個半透明膠袋幫我裝埋，
呢D半透明袋唔收錢，只係無手抽位，
以我所知通常買雪藏肉食之類都比個你，
用黎隔住唔好比D冷霧水整濕其他產品，
不過我買果兩件都乾珍珍，咁都比袋我？
有野袋住拎上手舒適好多行街唔洗亂fing，
呢D咪明白顧客須要o既良好服務態度囉，
比個like你！(姆指
 

聽恐怖在線就聽得多，今日就直接響現場聽 XD
呂少又上恐怖在線，咁就順便跟埋上去見識下，
估唔到恐怖在線同謎米香港係同一個office！
即係坐響恐佈在線個直播室做緊節目，
可以響個玻璃窗望到對面蕭生做緊蕭遙遊，
只係佢地兩個網完全無相關連結以為無關係。
第一次現場睇電台運作，例如有phone in時，
出面工作人員會將聽眾個名寫響白board舉牌。
查實呢個都未算主流媒體，只係一個網台，
(再者當今本地網台比較hit o既都係熱血時報...)
但呢個謎米架部都好大好靚(靚過我公司添)
pantry有桌球檯、藝術擺設、酒吧檯(無侍應)，
見到辦工室入面仲有成部頭文字D街機添！
唔知點解廁所門貼晒玉蒲團 XD

最近呂少整左個新節目教面相o既，
面相我一向有興趣，響咁多樣術數玄學中，
只有面相係可以直接睇得出對方o既底細，
你唔會即刻知道對方時晨八字架嘛，
要睇佢掌都要佢肯拎隻掌比你睇先得假！
加上好友主持o既節目喎，點都要捧場啦！
1不做2不休順便睇埋網上仲有咩面相教學，
搵到個蘇師傅響有線電視台o既面相節目，
有廿幾集，每集都一粒鐘，真係詳細，
一向學野都唔鐘意報班、上堂，
結他、Flash、魔術等都係自學，
學識成功感大好多(話晒都無師自通嘛 XD)
所以呢個節目真係o岩晒我！
雖然朋友話過出名o既師傅都係無料到，
只係識sell自己上位，係唔係都唔緊要，
正所謂爛船都有3根釘，只要吸到呢3根釘，
日常應用夠有凸掛？我又唔係要食呢行飯。
呢排行出街都多左留意人樣，
尤其答一次地鐵就可以睇到唔少人，
發現左好多以前唔會為意到o既野，
例如多唔多人有耳珠、瘦面下爬未必細，
有幾多人平時唔係合埋口等，好有趣 XD

如題！分享影片好心就米Q直接up上facebook啦！！
次次睇親都窒，等到唔窒果陣都睇完條片啦再睇過咩？
拿肯定唔關我網絡事！屋企睇又窒公司專線睇都窒，
又唔見我睇youtube窒？youtube開到720p都好順。
擺明根本就facebook唔夠力處理串流媒體技術啦！
點解d人唔肯先up上youtube然後再貼link上facebook？
想確保d片係佢先有人地無，要讚左佢專頁先有得睇，
就算我要分享佢條片都要被迫順便分享埋佢專頁，
我都明白呢種理由，好可惜facebook唔係一個好平台，
試問條片睇到窒下窒下，幾精彩都無癮啦，
好多時睇一陣都懶得睇埋落去，睇到火滾。
 

利申：呢個topic源自G鬆葛葉o既遊_隨筆，
只係覺得幾有趣所以響度濃縮咁講下。
之前都講過留意Game聞只係出於一份情義結，
我無玩console好耐，反而睇Game書係為睇呢D專欄。
之所以寫blog因為唔會草Game書始終都要掉，
只有寫響blog先可以保留呢D咁有趣o既內容。

今期個Topic係探討遊戲雕轉/有心思o既解謎環節，
Metal Gear其中有關係要輸入周波頻(你當佢密碼啦)
先可以開到個機關，提示係周波頻響包裝背後，
原來個Game盒後面一張display圖真係有顯示周波頻，
而當然對玩老翻無印到封底o既玩家可能會破唔到關 XD

有隻叫Elminage o既RPG入面有隻隱藏怪叫滅聲獸，
一聽到聲音就會嚇走，要打呢隻怪玩家以為要慢慢行，
驚腳步聲比隻怪發現，其實真正方法係要入option，
將遊戲o既BGM off左佢，原來隻怪係比BGM嚇走 XD
而同樣玩聲音o既解謎位仲有Metal Gear其中有關，
聽到一段訊號好細聲，要將電視機音量較大，
當較大聲之後發現訊息係話「呢度要爆炸啦！」
玩家掛住著草，都唔得閒較細番電視聲，
然後爆炸果陣當然係極大o既震撼，中晒佢計 XD

紅白機時期由北野武開發o既Game叫亞武挑戰狀，
有D解謎位係件野要等兩個鐘頭曬乾先會顯示玄機，
而呢兩個鐘頭係現實o既兩個鐘，中途唔可以熄機，
唔比做其他野，就真係開住部機掛網咁等...
因為太難玩，為左比D想睇爆機而又唔想過關o既人，
有個秘技係響主題畫面打2萬拳就進入爆機畫面...

以名星為主賣偶像o既fans向遊戲今時今日有AKB48，
原來紅白機時代都有隻中山美穗心跳學園，
但礙於當年機能有限，無高畫質相片或真人發聲，
居然諗到用電話錄音去補償真人發聲效果 XD
遊戲玩到某D位都會出現特定o既電話號碼，
打去就會聽到中山美穗對遊戲o既提示。

超任時期有隻叫鐮鼬之夜o既文字AVG有個隱藏劇情，
遊戲過程會出現一段字，就咁讀無乜特別，
關鍵係第二個字打直咁讀落去，就好似D藏頭詩咁，
見到「響呢度Reset」(日文)，真係呢個時候o禁Reset掣，
就會出現隱藏劇情，而呢個設計只係超任先用到，
之後呢隻Game移殖去GBA版或其他版本都用唔番，
變左第二段字，打直讀落去「響呢度o禁Select」(日文)

超任時期有隻校園恐怖Game，其中一關係要聽故事，
講故果條友一開始會話「要聽晒個故唔好分心」
玩家不以為意，以為只係隨口一句增加氣氛，
講到中途會有選項，例如打斷話柄或同同學傾計之類，
如果揀左果D就即刻整死主角Game Over，
因為咁樣而GG都米話唔驚嚇呀 XDD

NDS o既撒爾達傳說有關係要將石碑同地圖重疊，
先會顯示寶藏o既位置，但係點樣重疊呢？
原來係將上mon(石碑)同下mon(地圖)衾埋就得，
相信好多人唔識過卡關諗住休息衾埋部機無意通關 XD

呢個Topic真係幾搞野，講住咁多先。