call左師傅今日兩點到四點整上網，
一起身又要響新居趕番屋企，
番到屋企巡例試多次上唔上到網啦，
丫頂佢丫！LINE燈又長著又上得番喎！
無問題o既話D師傅黎到可以整D乜？
只好叫個師傅唔洗上黎住啦，
佢話如果再有乜問題打番呢個電話搵佢，
跟住如常上網，上上下LINE燈又斬喎，
之前佢地問家居電話有無事，
我即刻拎黎聽，訊號真係沙晒喎，
咁旭下插電話果個位，又得左，
LINE燈又長著番，搵到出事o既源頭啦，
就係插電話個位接觸不良！
反正都係啦，打番去叫佢換個個插頭，
「你所打o既電話未能接通...」
呢D師傅緊係兩個number，
收左工就唔會比D客戶搵到佢啦。
算，睇下穩唔穩定唔穩定先算。
 

前晚都仲好地地，尋日番工前完全連唔到線，
可能只係短暫性訊號固障定點啦，番工先。
點知放工番到屋企都仲係上唔到網，
再睇番個數據機，盞LINE燈斬下斬下又熄，
熄完再斬斬完又熄，段估係機房線路有問題，
今次唔係數據機有事啦掛？換左唔夠3個月炸。
以前都試過機房條線唔知比D咩野整斷左，
可能係老鼠咬爛或者其他網絡公司o既人剪斷...
打電話去客服，話最快要25號先安排到人黎整，
咁我禮拜六全日唔洗上網啦？放假先黎壞？
好在新居都有得上網，去新居避一避難先 XD
不過新居目前都未有電腦用住macbook air，
打機、睇片都無咁方便...
 

買番個鬚刨放新居，有幾張DSC一百蚊coupon，
心諗可以唔洗貼錢就咁用coupon換個鬚刨，
點知最平o既鬚刨都要298，用coupon都仲要比198，
去百老匯買個飛利浦鬚刨無coupon都係98蚊炸，
DSC用埋coupon都仲貴過佢，彩佢都有味！
咁有人會話，貴d果隻勁d架，咩三段式刀頭...
米玩啦，剃到鬚就得啦，要咁勁把鬼咩？
98蚊咪一樣咁剃，300蚊o既唔通鑲金？
有d仲幾千蚊添，當頸鍊咁掛響心口出街？
(聽講真係有人拎Leica枝50mm1光圈當頸鍊咁吊)
都係買98蚊飛利浦，好似無以前買開果隻轉左新款，
新款比以前好o既地方就係要拆舊電出黎容易左，
比舊款差o既就係佢用弧形殼底唔可以打棟企響度。
番到新居試下用先，新鬚刨係唔同d！
剃落去完全無卡斷毛o既壓力(就算d鬚長d都唔驚)
而且舊果隻剃完咀巴附近仲殘留好多鬚碎，
新果隻就無呢個問題，剃完都好乾淨唔洗抹咁濟。

免費電影飛都拎得多，好少拎到呢d一線大作，
一黎票房實賣座電影公司唔洗特登送飛宣傳，
二黎就算有都比編輯果邊搶先好難輪到設計部。
言歸正傳，知呂少有睇開xmen系列緊係搵佢睇，
聽番佢講原來呢套都係大陸比錢拍，
唔係點會有中國地方做背景同埋犯冰冰？
唔係掛？中國比錢拍呢d宣揚大美國主意o既片？
套戲係講乜野天煞機械人勁到能夠滅絕異能人，
所以狼人就要返回過去阻止呢d機械人投產，
結果當然得左啦，d機械人同異能人即刻消失晒，
跟住狼人訓醒世界變得好和平，升字幕...
其實我好唔接受佢呢個邏輯，換個角度去諗，
同d機械人抗爭緊果班異能人一樣係死晒，
最多佢地叫做死得唔痛苦只係突然消失左，
另一邊廂已改變世界果個狼人o既靈魂亦失縱埋，
有一日起身換左第二個狼人o既靈魂入去，
都米話唔恐慌，你試諗下聽朝訓醒鬼上身丫？
而D死左o既朋友又番生晒呢個安排更屈機，
咁樣佢玩晒啦，以後有人死左都唔緊要，
番去改變過去咪得囉，個大佬好勁唔夠打？
番去改變過去囉，仲有乜末世危機？番去囉，
有乜衣旭都番去囉，乜都比佢講晒啦。
本應係大團圓結局o既格局，點知又出預告，
仲有得做落去？係呀，呂少話睇緊呢個劇情，
其實係70年代漫畫版一早就出晒...唔係掛？

點為之入伙？正式訓番晚算係啦掛？尋日就決定響新居訓，
亦好想試試有自動衡溫系統同埋三段式水壓o既熱水爐，
響DSC搬左個櫃仔番去再組裝埋身水身汗諗住享受下啦，
丫頂佢沖沖下慢慢變好熱，較番凍d溫度適中番啦，
然後慢慢就變凍水，較番暖d慢慢又變番勁熱，黐線架！
咁樣o既衡溫系統簡直係折磨！舊居果個電熱水爐好好多！
唔知係咪因為set左36度所以較凍小小就完全變凍水起唔番，
下次試下set40度睇下情況有無改善，無o既話真係要換！
沖完涼就當然上下網hea下啦，先setting番個wifi名(SSID)
本來個名係wifi router個牌子形號，如果個個都知我用邊隻，
會增加比人破解網絡o既風險，set番d9唔答8 o既名好d。
點知唔記得上個禮拜自己set左乜password，要reset過，
搞完一大輪部華碩notebook連到線但上唔到網，
係咁話無法識別網絡，喂點呀家陣？上唔到網部野有乜用？
所以凡事唔好諗得太理想，總會出現好多意想不到o既問題。
仲有個衣櫃表面睇落靚靚仔仔點知後面塊版裂o既，
下面個櫃桶又鎖唔到，門柄又甩o既上唔到螺絲(滑左雅)
算啦，訓教啦，4尺大床原來都訓唔慣，比較難入睡，
好在訓醒果刻感覺良好，始終格局新淨好似響酒店起身咁，
換衫番工，先覺得原來行好遠都未有得坐係好辛苦o既事，
舊居番工只係行一小段路就到地鐵站，好快有得坐地鐵，
新居呢度要行一大輪，要過馬路，落隧道又要上斜路，
一朝早起身唔多想行架嘛，新居o既報導係咁多先，
今晚又番番舊居住。