尋日單老闆電腦check mail事件問左秘書求證左，
原來老闆收工係唔會熄電腦，不嬲部野都神神地，
會經常screen saver途中彈去outlook畫面，
所以同靈異現像無關，所謂唔講又邊度有得笑？
有時有d奇怪事作為茶餘飯後話題的確唔錯 XD
不過今日發生呢件事就肯定解釋唔到！
尋晚通宵完今日緊係無咁早番工啦，
晏晝幾大都訓多陣叉足電先，阿媽出左街，
屋企得番我一個，訓緊突然聽到頸後傳來響聲，
就好似有人響後面對住我條頸開吸塵機咁，
好近好真實好大聲，嚇到我即刻彈起，
打左個冷震，舉目四顧乜異像都無，
日光日白都咁？不過諗深層如果真係靈異現像，
呢股力量都係好心叫醒我免得我遅到，無惡意o既，
四月尾又係公司檢討員工表現傾加薪o既日子，
如果呢d日子遲番工，即係比人多個位入。
話說我小學時阿媽要接我放學果陣都有類似o既事，
又係訓晏教訓過龍聽到有人o禁門鐘之類整醒左，
究竟當時係咪真係有人o禁門鐘呢？無人知。

又係通宵工作，今次試下編輯先mark低d錯處落printout，
我改完就直接轉pdf，編輯再響mon對多次個pdf有無改漏，
諗住咁樣快手D，點知編輯發現大部份都係有改漏，
之前轉o既pdf好多都白轉，又要再轉過，因快得慢。
其實份份稿改完我都番check多一兩次確保有無改漏，
無理由咁多睇唔到架，改完Variety Show果編，
我番check完講左句「呢份仲有改漏真係鬼um眼囉」
心諗夜媽媽都係唔好「講呢D」即改口「係火遮眼」
之後編輯睇完都係有改漏，話漏左個「的」字，
哇唔係咁邪釘呀fa？真係鬼um眼？都要做假！唔理啦。
好啦到改晒D稿掟印廠，今期o既工作總算告一段落，
編輯去熄燈，番番黎見到老細房部電腦開住email個畫面，
然後又跳番入screen saver有window logo彈黎彈去畫面...
米住先，點解十幾個鐘無人掂過部電腦會出現email畫面？
如果老細唔記得熄機，待機一定時間會跳入screen saver，
都無理由遲唔入早唔入十幾粒鐘之後先入假？|
會唔會正話有人郁過部機？無可能！當時公司得我同編輯，
重點係老細房個玻璃門係鎖住，我仲專登過去試下開門，
係開唔到，所以一定無人入到去間房，咁唔通係......？

零晨兩三點做野做到無乜mood，過去隔離team搵D同事R水吹，
講起佢地做記者去D發佈場合o既血淚史，最惡最大牌係D報紙娛記，
佢做數碼產品o既記者，本來河水不犯井水，但有D場合係有明星，
咁就見識到D娛記o既恐怖，又話佢地會將你撞出去啦，
又話佢地唔可以同雜誌一齊做訪問啦，報紙還報紙雜誌還雜誌，
PR安排佢地要一齊採訪時，報章娛記掟pass落地話「咪唔訪囉！」
講到慶起我地韓娛記者都插咀話有次採訪個韓國明星，
比其他娛記話佢係fan屎，話fan屎唔入得黎呢區搵實Q拉走佢，
佢張卡片有佢張相出黎都話佢係fan屎！真係咁都有o既？
我又分享一下以前做Buzz!記者探訪C3 o既經歴，
因為我有pass所以可以大無私樣咁企埋上張櫈上面舉機任影，
後面圍欄d fan屎比我遮住好鼓譟咁喝「行開啦！」
仲飛螢光棒掟我，正因為態度咁惡劣我就專登繼續遮住唔理佢，
如果佢有禮貌d好聲好氣我都會考慮影完幾張讓番個視野比佢。

番工行過觀廣，見到個大叔摷褲袋跌左張100蚊，
係飄落地下果隻，當時完全無猶疑即刻拍大叔背脊，
「喂！你跌左錢呀」個大叔即刻執番，
十蚊都執過幾次，紅衫魚跌落地都真係少有。
本來D宗教人士話做左善事係應該唔講出黎先夠真心，
咁先可以積到德，不過我係要寫響blog呀，
我又唔在意因為做左咁少野而積到o既德，不求D咩善報，
只係純粹想記低有件咁o既事，積唔積德who care？

上星期同事向我地art team派發美國隊長T-shirt，
做雜誌社真好，除左經常有免費電影戲飛/換票證，
仲間中有電影公司o既精品(如海報、記事本、文件夾...
講番件T，前面就正正係美國隊長制服果粒星圖案，
背面仲有個招牌圓盾，巧妙地玩出作品o既gimmick！
不過當日只派細碼，都驚會唔會太細(平時著開中碼)
洗過水後今日急不及待試著，咦著落又幾fit喎，
完全唔窄亦唔覺緊，加上配埋條深藍色牛仔褲，
當堂美國隊長上身 XDD