以我所知公司有3位男同事(唔開名)都離過婚，
佢地睇落一表人才，有個係公司o既高層主管，
有個係副編輯，以前仲做個廚識煮一味好餸，
而呢兩個都獨力撫養個女，係盡責o既好爸爸。
有個某程度比較好d，無生到仔女就離婚，
起碼無包服，應該未過40，隨時可以再搵過。
點解？點解d女人可以咁不負責任話走就走？
3位男士外表言行舉止至性格上都唔似有缺陷，
經濟方面雖則(應該)唔算有米但都穩定收入丫，
一個咁有責任感咁顧家o既好男人點解唔要？
佢地仲係無甩頭髮又唔肥無肚腩標準身形，
係個女人要求太高呢？嫌佢地窮、無出色？
定相見好同住難相處上有d不為人知o既一面？
而一間唔算大o既公司裡已經有3個離婚男士，
衣家離婚率係咪真係咁高？當初又點解結婚？
亦都已知有3位同事暫時婚姻都無乜問題，
不過唔計3位離婚者其他單身同事亦唔少...
所以話，要有拖拍其實仲難過發大財。

用開果隻聲稱1年唔洗換電o既Logitech無線mouse，
最近發現個右click虧虧地，唔能夠長期o禁實，
不過單click無問題，其實一般日常應用都無問題，
只係我玩開d online game要長o禁右掣轉角度，
多次轉到一半停左先發現有呢個毛病。
我又買多個一樣型號仲要一樣顏色o既新mouse，
計埋長插macbook air果隻係第三隻同款mouse，
話時話macbook air果隻好似買番黎到衣家未換過電，
我係幾欣賞佢d電come用而且操作亦流暢。
而原先用開果隻壞右掣mouse插左落舊電腦度，
好，今日開始用，又睇下呢隻新mouse幾時無電先。

備註：買番黎裡面就放左粒金霸王，呢隻買左125蚊。

曾幾何時我係個無乜見識o既人(衣家都唔見得多)
童年時由於家境唔算富裕，屋企人都唔多出街，
問問自己，細個去過咩地方？食過d咩好野？
十隻手指數得晒，所以閱歷可能比同齡小朋友略遜。
不過之後跟一位好友周圍去先令我體會更多事物，
例如2000年頭同佢一齊參加展翅計劃，
然後亦同佢去過幾次澳門、深圳、東莞，
又認識佢d同學某程度上亦擴闊左社交圈子，
如果唔係佢，果d日子都係呢響屋企無聊上下網。
所以識到個世界仔真係唔錯，可見識唔少新事物，
我都要做一個可以擴闊朋友視野o既細界仔。

有D人皮膚唔太好，可能係受到塵蟎攻擊，
呢種8隻腳o既微生物肉眼係睇唔到，
以人類或生物o既皮屑、毛髮維生，
專門攻擊一D身體抵抗力差o既人D皮膚，
匿藏響寢具內，有乜方法可以消滅呢？
平時洗床單被袋但你唔會洗埋床褥或入面塊被，
你洗唔到D黐響裡面果D塵蟎。
拎D綿被浪出室外曬太陽呢？都係無用，
因為D塵蟎識得著草，熱咪閃去D陰涼位囉，
到你收番D綿被果陣佢地咪又跟住你番番去。
市面上亦有價錢昴貴o既塵蟎吸塵機，
其實有個平價o既方法都可以消滅塵蟎，
買個大碼o既黑色垃圾膠袋密封咁包實D寢具，
之後先拎去曬太陽，令全舊野都均衡滾熱辣，
只要超過50度高溫就可以將D塵蟎殺死。
咁D塵蟎屍體呢？無計架啦... XDDDD
如果你身體抵抗力強就算有塵蟎都無影響。

上網問題又豈止斷線或load唔到網咁簡單？
呢排屋企上網有D時段勁慢，但又load到圖無斷線，
又唔似公司最近入到facebook但d圖交叉晒咁嚴重，
今次我真係完全無辦法Challenge佢喎！
有D時段又好順正常番，最慘係搵唔出原因，
連公司呢D有IT專人技術支援o既都解決唔到，
係呀公司網絡到家下仲係咁，貼埋通告話搵唔到原因，
試問我呢D星斗市民又能夠做得D乜呢？