如果10年前有今時今日o既mind set，
即使同樣o既條件(樣貌、經濟能力)之下，
肯定今日有更大o既成就。
我最大o既錯誤就係放任自己原地踏步太耐，
呢埋響comfort zone入面，搞到歷練不足，
相比起同年紀o既人仿如活少佢地幾歲。
今日唔再容許自己再浪費時間，
要每一日都要過得充實，設下好多任務，
追番進度，問自己，經歷過D乜，
去過幾多地方旅行？識幾多種技能？
做過幾多份工？有幾多個社交圈子？
拍過幾多次他？睇過幾多套作品？
希望答到一個符合自己歲數滿意o既答案。

同編輯食完晚飯，行番公司途中，
眼見佢孖煙通踢拖咁行街。
我：「好心你就米著得咁求其啦，話晒衣家都有女同事，
以前得我同你就話鐘意點著就點著姐。」
佢：「有乜緊要姐？又唔係溝佢，請個靚女同事先算啦。」
講下講下佢無端端爆左句佢鐘意台妹，因為台妹有氣質，
我現任女朋友就係台灣女仔囉！
不過又係o既，響我眼中以東方血統去計分：
台灣妹>日本妹>港女>大6妹>韓國妹
台灣係排第一，台灣女最靚最有氣質，
受到當地文化影響，無港女咁勢利同公主病，
無大6女咁土氣，又講中文唔怕溝通唔到，
所以響我眼中即使6分台灣女比10分港女更有吸引力，
總之，台灣籍就係加分，台灣籍就係正義 XD
唱番首MC HotDog+張震嶽o既「我愛台妹，台妹愛我~」

呢兩日屋企上網又無故恢復正常，
本來仲想叫人黎換晒入屋d線。
深明白問題仲未根絕只係潛伏期姐，
好似計時炸彈咁睇佢幾時又爆炸，
上到就唔理住，煩左好多次唔想再煩！
再講，衣家未換線都正常番，
換左線都唔容易check到仲有無事，
又猜測落雨天可能會容易受影響。
屋企上網問題先告一段落，
係咪衰開有條路？又輪到公司啦，
呢幾日公司上網都異常慢甚至無反應，
但又未斷得線吊住吊住咁，
聽講係公司用果間網絡商受駭客攻擊，
早幾日臉書、1傳媒等大網都被黑客癱瘓，
老闆懷疑同公司上網問題有關(又關事？)
寧願公司上唔到網唔好屋企上唔到啦。
又話時話，係咪呢排轉左look，
影響我o既上網運呢？呢排下爬留鬚，
相學黎講，下爬生粒瘡屋企會漏水，
唔通下爬留鬚就上唔到網？(又關事？)

食完晚飯番番公司，條街如常多人，
見前面有個女人著住花lee look o既長裙，
距離我大約十米左右，望一望第二度，
再望番前面，唔見左？！唔通過左馬路？
再望去對面街，都唔見喎，唔係呀嘛？
當堂塊面發左陣麻，心諗唔係果D野呀嘛？
當然唔會100%判定佢就係果D野，
可能只係轉個角攝左入D咩位睇唔到。
個女人無乜異常特徵，就普通人一個，
行響街上係好理所當然存在唔會令人懷疑，
好清楚望到佢著乜野款o既裙添，
如果佢真係果D野，咁響條街上，
究竟有幾多個係人幾多個係果D野？

呢篇算係一篇自我介紹，list出我唔鐘意o既野，
若干年後再睇番唔知會唔會有唔同o既價值觀。
以下有幾多樣又係你都唔鐘意o既呢？

唔鐘意同人競技、對戰，除非有必勝o既把握。
唔鐘意排隊、等位，寧願比貴D。
唔鐘意番類似實Q、睇舖之類發呆o既工作。
唔鐘意見到男人著拖鞋、涼鞋之類露腳趾o既鞋。
唔鐘意見到人茶有色o既腳指甲油(靚女都扣分)
唔鐘意比人sale野、遞傳單埋黎。
唔鐘意參與團體活動，鐘意同一人玩、傾計。
唔鐘意睇波，足球、籃球都無興趣。
唔鐘意24(易死)、25(25仔)、53(唔生)等數字。
唔鐘意明明想做果樣野做之前比人吩咐左先。

list住咁多先，當然其實唔止10樣，下次再list啦。