將好多舊居o既雜物搬到新居，一地都係野，
要向上發展，不過D野可以三尖八角，
疊上去會瀉架嘛，要買個架、膠箱或櫃安置。
架o既話容易入塵，膠箱就搵下層野唔方便，
要搬走上面果堆先，櫃就最企理但亦較貴，
買個木櫃閒閒地都要八百幾至千幾蚊不等，
響DSC搵到個4層膠櫃都係369，咦又抵玩喎，
買個靚木櫃第時如果要再搬屋仲可能唔捨得掉。
度過我新居間房床尾到牆有大約23寸空位，
買左個櫃21寸，好在無買到tup tup陷，
原來計漏左牆腳磚，買23寸可能就卡住入唔到。
膠櫃重得去邊，諗住買兩個左1個右1個拎番去，
不過剩番last一個4層想買多個都無，
點知都幾重下，拎一個都要行下停下。
呢個櫃仲可以擴建，打算買多個3層加上去，
真係組裝上去而唔係就咁擺上去，
只係唔知仲買唔買得番同款。

尋日都仲好地地，今日如常開某facebook game，
居然話要update個flash player先玩到，
家陣你隻game乜事呀？更新左D乜野新系統，
要新o既flash player先支援到呀？
之後用公司機開番同一隻facebook game入到喎，
甚至用macbook air開都正常運作喎，
呢兩部機十世都無update過flash player架啦，
點解又玩到呀？咁都未算，我用番玩唔到果部機，
用firefox登入facebook開番同一隻game都玩到喎，
家下點先？做乜硬係迫人更新？我最憎更新架啦！
你呢D咁o既facebook game都無乜人玩架啦！
(facebook195個好友有keep住玩o既得幾丁友)
係我大發慈悲叫做玩下你炸，你咁樣玩我？！

CASE1：無貨都仲上架？
呢單野都一個月前，不過既然講開就講埋佢，
我買左件野過晒數，留言約時間交易等佢答覆，
等左足足六日，佢居然答我件野已經賣出！
賣出左仲唔落架？唔比負評你我對唔住自己啦！
最慶係我等左好耐！如果當時即刻回覆我，
話件野賣出左，我都唔會負評你。

CASE2：賣家失蹤
有d賣家放置play將件貨上架1個月都唔check1次，
搞到我過晒數都仲苦等，不知者不罪都情有可原。
呢次呢個賣家有回覆，約埋時間前晚10點交易，
我10點準時出現等到零晨3點都無下文，
可能你有d咩事突然唔方便交易我都唔怪你，
咁你留個言交帶聲囉，頂你，我留晒言問咩事，
等左兩日都無答覆，佢直情似係無登入過85網，
喂大佬你係唔係賣架？登入一下留言有幾難呀？
失約都算啦，之後仲要失蹤！

答車經過投注站都見到條龍由入面排到出街尾，
丫點解D人好日都唔買六合彩係要有一億幾千萬先去買？
唔通平時中幾百萬就唔夠吸引？要過一億先夠？
我好易滿足，唔洗中一億，比我中幾百萬都夠架啦。
網上又有文章講，假如果一億五千萬唱晒做1千蚊金牛，
可以由香港舖路舖到過紐約，有無咁誇呀？
舖到上廣洲都仲有可能丫，舖到紐約我又唔信啦，
答飛機去紐約都要十幾粒鐘啦。

iphone6今日開售，相信大家都見到同一個現象，
公司每個同事都對住個白色畫面係咁o禁F5，
(蘋果官網訂iphone6果頁係白色)
然後見到人就問：「你買唔買到？」
無論係果粉或者粉果，都照樣落訂，
今次國內都未有得賣，必定落黎大掃貨，
響大陸仲被喻為「賢機」就算賣賢點都要有部，
所以大家都知道只要買到就一定賺硬！
經過一輪搏鬥，6plus已被搶購一空，
同事入到6(細mon果隻)果頁，問買唔買好？
計我話唔係16GB就係唔係都o禁落去無死錯人！
爭在賺多D定賺小D姐，點都一定有錢落袋。
不過隻16GB都幾雞筋下架，肯定唔夠用！
入下D歌同apps都無左一半，鏡頭像素又大左，
相片容量相對又多左，影多幾張相就爆啦。