Yes!正式停刊啦(半年前都響呢個blog講過)
分析下呢本野o既死因，市場取向兩頭唔到岸，
衣家韓風係大勢，Yes!又講kpop又講港星，
查實大部份韓國粉絲對香港娛樂圈無興趣，
甚至唔想買本野見到港星，唔要呢d多餘資訊，
但Yes!一向走開本地路線，無辦法完全轉形。
其次就係Yes!走小學雞路線，咩野校園資訊、
低B笑話、IQ題、性教育、校花校草之類，
一個80後答地鐵渣住本Yes!都會比人歧視啦，
對面乘客心諗「仲細咩？咁大個人仲睇Yes!」
Yes!都有成功之處，就係收視率高(銷量唔高)
只要一個學生買一本，一班30個同學輪住睇，
上堂檯底睇，比亞sir收左都唔洗理 XD
試下玩iphone沒收丫，點都要叫家長拎番。
而同期我公司又有一本手機雜誌停刊，
其實今時今日又邊有人會買手機雜誌丫？
我都諗唔到有咩人會專登買本手機雜誌，
以前十年前或者有，當時仲有d手機廚o既，
講緊nokia 8810、sony w800i果d年代，
手機五花百門，識得有朋友一年換5部手機。
當年渣8810係身份象徵添，衣家d人心態唔同，
加上兩廠獨大，唔係iphone就係samsung，
黎黎去去都係果d野，個個都渣住同一部，
仲有乜好睇丫？再講介紹物品o既雜誌呢，
好似相機、影音、名錶、房車之類雜誌，
以上講緊o既動不動都幾萬至十幾萬，
一般人落左呢d坑又買唔起，
買呢d雜誌o既心態就係望梅止渴，
手機人人都買得起，你都渣住部野，
仲洗乜頂毒癮？得o既話出本軍事雜誌最屈機，
除非你爸係李剛，唔係都好難擁有一部戰艦 XD
仲有無雜誌都係同期摺埋就唔知，
以我所知就呢兩本。
|
