到時到侯就肚餓、到時到侯就眼訓、到時到侯就起身，
我稱之為生理鐘，以前同亞媽住1直有佢叫醒起身，
所以番學至番左咁多年工都好似無乜用過，對上份工，
可以食完lunch先番工，想訓到幾點起身都無問題，
又係無用過，直到最近多左自己1個住，又要早起身，
先發現原來1直內建響我體內o既生理鐘仍未生秀，
好多時都可以響鬧鐘響之前5分鐘就自然醒左，
不過呢個鐘都唔算百份百可靠，都有時比鬧鐘叫醒，
只係估唔到咁憎早起身o既我都可以自動自覺早起身囉，
明明起左身都係再懶床好唔精神...

本年夏番第3套完食o既係呢套赤龍戰役，
呢套被某forum指係呢季o既雷片之王，
嗯...其實我都認同，不過都照樣完食。
點解呢？係因為精美o既人設正中我杯茶，
唔知點解澤城美雪配親d角色都好吸引我，
查實我唔係太迷佢真人，但佢把聲堅有魅力，
以往都係睇開佢配男仔頭o既英氣少女多，
例如angel beat岩澤、TOX美拉、絕園葉風等，
呢套配聲線溫和o既無口少女1樣令我無法抗拒！
講緊o既就係女主角(應該係掛？)艾哈，
亦算係睇呢套o既最大動力之1。

呢套係手遊改編o既動畫，但睇番手遊人設，
艾哈個款實在有d殘念，動畫版艾哈正太多，
除左衣服比較華麗外仲多左幾分柔情。

點解呢套雷？人格唔合情理囉，個個都抖M咁，
1個2個都爭住要將自己作為祭品獻比忌吹，
你話係咪痴線？獻命黎殺王都仲話有價值，
有1幕艾哈就話要以命去換敵方雜魚條命，
不如留響忌吹身邊殺多幾條雜魚好過啦。
忌吹身邊o既人甘願為佢死都勉強講得通，
但到12話連個水桶粒頭都想獻命係邊招？

BOSS係忌吹個妹，有少少終結天使克魯魯影子，
又係孖辮有d能力同埋王者氣派，可惜太多顏藝，
加上紅色件衫設計得好求其導致形像插水。
相比忌吹妹，婁震華(頂！個名諗起以前校長XD)
更邪惡，又殺左烏爾利卡，但最尾都消遙法外。
史瓦羅見婁震華將烏爾利卡個頭丟出黎後，
居然表現淡定之後亦無話為佢報仇，真係無血性，
都話呢套野d人性唔合情理架啦。

繼奇幻自衛隊後呢套係第2套完食o既本年夏番動畫，
出自key社麻枝大師o既作品都算係名牌野，老實講，
我完整拜讀過o既麻枝大作並唔多，對上只有angel beats!，
little busters!都有睇過幾集o既，其他就真係無。
呢套o既OP甚有angel beats!作風，內田真禮個ED幾有feel，
男主有宇起初有魯魯修既視感(尤甚用手掩住半隻眼奸笑)
之前angel beats!亦有個涼宮既視感o既偽團長。

故事背景係部份人響青春期會突然得到特異功能，
但係20歲後會消失，有宇發現自己有上人身o既能力，
利用呢個能力作幣考上名考，但被女主友利揭發阻止，
並要佢加入超能力學生會，1齊阻止濫用異能o既人。
頭幾集都係講點樣去勸阻其他能力者唔好再用能力，
直到發現有宇個妹都係能力者，發動崩壞能力意外死亡，
身為妹控o既有宇黑化左自甘墜落自暴自棄周圍倒亂，
友利令佢清醒番，再過番日常，友利邀有宇睇演唱會，
有宇突然覺醒佢係從另1個(未來?)世界黎，果個世界，
d能力者比唔知政府定咩機構捉晒去做研究，無自由，
有宇得知佢o既能力唔係剩係上人身5秒咁簡單，
而係能奪取其他能力者o既能力，佢利用佢哥o既技能，
回到過去，先番番黎佢身處o既現世，佢哥先正式出場，
將真相交待清楚，佢哥建立左個保衛異能者組織，
再令有宇吸收其返回過去能力返去佢妹出事前，
阻止悲劇發生，然後佢哥o既組織又被人背叛，
捉左熊耳同友利要脅有宇，有宇比人整盲1隻眼，
番唔到過去，熊耳死埋，有宇亞哥又意志消沉，
友利提議有宇用佢o既技能吸晒全世界d能力拯救能力者，
事成後再交往，然後就第13集有宇真係吸晒所有能力者，
番番去友利身邊，good ending大團員結局。

居然係good ending比較意外，雖然未到跳起yeah果d，
從forum得知以麻枝過往表現，都係淚線決提o既bad end多，
就算唔bad end，都會有份淡淡o既哀傷感(angel beats!)
當然我對佢呢個結局並唔抗拒，不過最尾1話真係太趕戲，
用1集時間去表達吸晒全世界成千上萬o既能力者，
仲有時間番去同友利傾幾句，呢個根本係幾集o既份量呀！
顯得整套劇頭半part果d校園日常會唔會太悠閒呢？
開頭o既舖排其實唔錯架，能力o既應用亦有精心佈局，
例如當有宇想上高城身果陣比友利及時飛踢出去，
(因為比有宇上過身高城就會失去能力，果陣要賣關子住)
有宇暴走果陣友利無出現過，原來係1直隱形咁響佢身邊，
呢d感動位拿捏得相當到位，有宇返到佢妹出事前，
友利令佢清醒為佢做飯，及有宇帶zhiend主唱探友利亞哥，
再1齊睇演唱會，做左咁多野響友利角度亦被洗白，
感覺有d遺憾，友利呢個角色真係設計得幾有吸引力，
以為係面癱原來表情豐富，集傲嬌、溫柔、義氣於1身，
可惜後半部劇情令友利變左個可有可無o既路人，
尾2果話友利接受有宇o既表白都覺得有d格硬黎，
又係無充份表達友利鐘意有宇d乜同唔夠時間醞釀關係。
後半部開始有d亂來，能力亦用得唔夠巧妙，
熊耳死左無左探知能力者o既能力，但有宇吸左西森能力嘛，
應該可以令熊耳o既鬼魂附身，後面吸左個治癒能力，
居然講個9唔答8o既道理而唔去醫番好隻眼用回到過去能力，
同埋開頭設定能力有副作用，例如穿牆能力用完後會虛脫，
時光倒流能力用得多會失去視力之類，有宇吸左咁多能力，
就無再出現咩野副作用？另外講番中段1個bug位(算係掛？
有宇有實驗室果段平行時空(?)o既記憶，即係響未來番黎啦，
應該背負住沉重o既使命，點解會無晒印象？
當然可以話係佢哥搵人消除佢記憶黎自完其說o既，
而且番黎o既係有宇唔係佢哥，佢哥理應唔會有革命o既覺悟，
呢d位都無好好交代清楚。

較早前ter姐響facebook講話估到呢套劇o既劇情，
我就叫佢講下之後會咩發展，佢就話係救妹路線，
好似命運石之門咁救完又死又返到過去再救再死然後再盲，
我就話救妹線告1段落，有宇應該會做影響世界o既任務，
然後先盲，結果我o既推測準確過佢，階因平時都有度開故仔，
分析出男主既然有掠奪呢個咁屈機o既能力，只係救妹浪費晒啦，
1定會有1番大作為，唔係觀眾點收貨？雖然衣家都唔多收貨，
gaforum好多網友都好大力鬧麻枝，我就收貨o既，
只係可以再做好d，睇過佢兩套作品，覺得佢o既野不過不失啦，
未到神作級，但起碼有1定保證，好睇過d無腦後宮番多多聲。

兩個月前仲吐糟話無線正常size齋keybroad難搵，
點知今日就買左呢套無線細size keybroad mouse set，
因為部surface pro3囉，以為用佢個touch screen操作晒，
好多野係做唔到o既，例如個螢幕鍵盤無print screen掣，
仲有打字就遮住半個畫面，轉換中英文數字都好唔寧活，
某d hotkey例如Alt+F4或Alt+Shift+Delete都應該o禁唔到，
用手指或筆去click野都唔多靈敏，尤其手指o禁d細icon，
經常o禁錯隔離，睇youtube想交叉個廣告可能會變click左，
所以完全唔用滑鼠鍵盤操作windows呢樣野目前係唔可行，
最起碼要操作d複雜野或要用快d點都要有番滑鼠同鍵盤。

由於部surface pro3只得1個USB插位，
如果要同時插mouse同keybroad就局住買1set，
考慮到日後作畫會將部機同鍵盤擺響空間有限o既電腦檯度，
反正呢部野唔打算用黎打online game，所以諗住買細鍵盤，
放工又唔記得響觀廣買，變左只能響新居樓下d電腦舖買，
呢間野居然無賣logitech mk230(細keybroad+mouse套餐)
明明周圍d腦場都有好易搵架？大o既鍵盤滑鼠組就有囉，
細o既仲有隻rapoo牌o既，盒面都標榜電池come用，
好，就買黎試下，終於唔係logitech啦，要價268蚊，
其實睇番佢logitech另1產品，都比灣仔d腦場貴50蚊以上，
擺明食水深架啦，如果唔係貪就手出1趙灣仔應該慳50蚊，
就係懶得出灣仔，又想聽日放假有得用，呢50蚊豪比你啦！

衣家就係用緊surface pro3同呢隻rapooc鍵盤打呢篇日誌，
手感無乜特別無乜好講，F1至F12都係無分隔，
不過prints creen掣唔洗o禁實Fn掣呢樣贏晒logitech k230，
同埋不論鍵盤定滑鼠都留個空位比你插番粒USB感應器，
唔洗用完周圍hea驚你整唔見？but我都長插響surface度啦。
 

本來唔多buy呢套野，第1主角唔靚仔，第2主角參軍動機太無聊，
話係想保護同人活動順利進行之類，喂，諗個正常o既理由咁難咩？
通常睇開d王道劇都係為貫徹正義、復仇、復國、保衛地球之類而戰，
睇起上黎都悲壯得多，為左同人活動...真係唔知比咩反應好...

不過呢套入面d女角人設都算討好，加上facebook有人話好睇之類，
咁就試下睇啦，1睇之下又OK喎，故事講日本突然出現道傳送門，
連接異世界，所謂異世界其實只係西方魔法中世紀姐，唔係太異囉，
異世界出兵攻打日本不敵現代先進科技，然後主角等人闖入異世界，
作調查、文化交流之類o既發展，途中認識個蘿莉魔法師、
9百幾歲蘿莉半神、百幾歲少女精靈等等。

講下個人感想，個世界觀玩得唔夠放，異世界唔可以再異d咩？
係都整到好似幽遊白書入面o既魔界、又或者FF果d水晶懸浮都士咁，
日本方面又係太現實，雖然派直昇機掃射果d斯巴達戰士都夠震撼，
但講白d只不過係現世科技回到過去欺凌古代人咁樣，
所以覺得背景方面可以玩得再精彩d，然後到動畫表現方面，
話就話異世界同日本d語言不通，但係異世界果邊d人都係講日文，
呢邊講日文果邊用日文話聽唔明，觀眾睇落真係幾奇怪囉(汗
除左男主從軍動機奇怪之外，異世界王女居然對日本BL漫有興趣，
d咁膠o既劇情邊個諗出黎架？

不過睇落都會令人想再睇下1集咁，例如異世界d人被邀到日本，
會期待佢地對現世科技有乜驚訝反應，呢d都係有趣o既位。

到第12話有個黑肉女精靈要搵自衛隊去造低隻雄火(芒亨上腦？)
通常1季結束就算唔打大佬點都係咁耳幹1番大業先升字幕丫，
呢套野夠膽將事件講到1半話完就完，個女精靈都未搵到男主，
感覺好似下1集繼續講落去咁，不過呢個下1集係出年1月番 =_=