觀塘又多間新餐廳Japan x Korea位於78商場入面，
平時人山人海，趁佢禮拜6水靜河飛即刻試下先，
就試個滑蛋芝士炒泡菜飯，聽個名好似無肉食，
查實有擺多兩條炸雞仲有粒手指公咁大o既雞蛋伴碟，
1食之下，係神級味道，佢將滑蛋同芝士無縫接軌，
咬落去煙刃，筆起d芝士響飯同匙根間拉出1條條絲帶，
絕無欺場，d飯亦非普通白飯係染左唔知咩香料紅紅地，
其實就算無左炸雞齋芝士滑蛋送飯已經夠爽，
食之前仲有d擔心會唔會比泡菜o既酸味影響添，
不過食落係無任何酸味，恰到好處，perfect！
個飯索價68蚊，係值o既，要講番句I will be back！
好過吉野家個80蚊鰻魚飯多多聲先啦！
硬係要我批評o既話，只能夠話份量不足囉。

講左咁多年中文o既各位，有無發現1樣野，
查實中文o既平均講野速度都比其他語言慢，
包括日文，我地常速1秒講5個音左右，
而且中間都唔少停頓位，睇日劇o既話，
佢地平均1秒可以講8至10個音，
好多日文字係由兩3個音甚至更多組成，
可能同樣意思o既內容，中文講5個音講完，
日文要講10個音，留意下d產品多國語言說明書，
你會發現好多時其他語言兩3行字o既時侯，
華語都只係佔1行字，認真慳位。

可能就係咁，如果同樣意思用番同樣讀速，
中文5秒講晒o既野日文要10秒先講得晒，
變相呢種語言要多1倍時間先表達到同樣內容，
所以佢地o既講速亦相對比華語快先平衡番。
正因為咁，我地要學日文係好難講到咁快，
亦因為習慣聽咁慢，都好難聽得明日文常速，
有時覺得d日本人講野快到lur出黎咁，
唔會隻隻字都字正腔圓，但日劇經常都係咁。

日文未算快，菲律賓話仲快，見d菲庸講野，
bilibala機關槍咁，1秒可能已經射左20粒音，
其他國家o既人條利真係特別靈活發達，
中文都有講得好快o既時侯o既，除左急口令外，
咪就星爺d唐百虎或白面包清天爆seed果陣囉，
仲有阿谷莫d影評，呢d分明要練過兼背稿先做到，
唔係人人都隨口up到，日常生活唔會咁講野架嘛。

得1個星期比人拎炸，星期1至5番工基本上拎唔到，
你開工佢開工你收工佢收工，除非請假拎啦，
過左呢個星期就要電話booking先拎得，又係麻煩，
所以趁今日早d放工就去西灣河拎，搵到個地點啦，
響樓下大堂已經見到幾個都係同樣目的o既人，
上到去又見到1批o岩o岩拎完o既人行出黎，
到我地拎完啦開lift門又見另1批黎拎o既人，
咁多人都係揀今日拎，似乎d職員未停過手，
不過人流暢通，由出lift行到接待處、核對身份證，
拎得，唔計等lift全個過程應該都無20秒，
順帶1提，果陣拎證書o既人好多都好靚女 XD

張證書用個fit size公文袋(但無繞圈)裝住，
封口位有膠紙痴住但其實條膠紙可以無痛搣走，
(拎完入lift果陣已經見有人即刻搣走張膠紙唔傾)
入面有3張野，1張純綷就係證書證明你有呢個程度，
1張就有寫埋成績，不過寫o既同官網查到o既1樣，
並無再寫得細緻d，例如文法o岩左幾多題之類，
另外仲有1張就係說明書教你點睇張野之類咁。

黎緊7月o既日能試報名期到下個月頭，
我仲考慮緊報唔報N3，心諗1係唔考1係要合格，
除左聽解之外其他方面我都幾有信心pass到，
聽解呢就...除非3月尾前我聽力突飛猛進啦，
唔係o既話應該都係等年尾果個算啦。

講到暗殺game，衣家應該首選刺客信條(定教條？)
無可否認ubisoft呢隻亞沙仙畫面同世界觀都好出色，
不過我更鐘意好耐之前o既忍者game天誅系列。

細細個已經對忍者呢樣野有好感，特別係女忍者，
無戰士果種粗暴感相反體態輕盈、身手非凡，
當然查翻d文獻，根深替固o既忍者形像係虛構o既，
真正o既忍者唔會著夜行裝打扮，而係普通平民咁，
著到1身黑色緊身裝反而更加礙眼比人懷疑啦。

講番天誅，隻game係以忍者身份去執行任務，
響古代和風背景大玩潛行暗殺，響屋頂走黎走去，
1向都覺得從後偷襲比光明正大咁開波更加爽，
天誅入面忍者o既動作都好有型(亦華而不實 XD)
不得不吐糟o既係點解忍者出手咁多嘿嘿哈哈聲？
連腳步聲都清脆利落，唔係應該無聲無色架咩？
殺完條友又叫到鬼殺咁嘈，附近d敵人係咪聾架？
掉舊飯團響地d敵人居然會執黎食，好肚餓咩？
可見佢地顧主請左班弱智伙記同無比飽飯佢地食，
算啦，game不嬲都係好多唔make sense野 XD

系列最新好似都只係去到PS2版，所以畫質好有限，
睇慣現今次世代畫面當然會覺得un眼啦，
期待天誅系列(或類似作品)會登錄次世代機，
可以用高清畫面再賭忍者o既魅力。

利申，不論天誅定係刺客教條，其實我無玩過 XD
只係睇walk through片(1向鐘意睇人玩多過自己玩)
所以好唔好玩操作順唔順就恕難評論啦。
順帶1提，Ninja Gaiden系列係斬草無雙game，
現代超人忍者1個打10個咁，無乜忍者味道。

相信香港無乜人未睇過叮噹(BB仔唔計啦)
個人認為之所以咁經典因為故事公式屈機，
呢個公式就算再過多幾十年都應該唔會out，
公式係：每集大雄都發生d不如意o既事情，
之後就出現1件憑空想像o既道具去解決事件，
故事發展係可以充滿無限可能又無乜規限，
已經比超人打怪獸劇果d套路多野玩好多，
美少女戰士果d咁只係集集做低1隻怪，
伙頭智多星咁1集1味送「好好味呀~」，
千篇1律(雖然現今動畫少左呢d估到o既劇情)

其實只要開左個頭，之後比觀眾自由發揮，
都已經夠晒好玩啦，記得細個果陣，
直情自己創作1個好似叮噹咁o既角色，
然後再諗1d天馬行空o既道具再創作故事，
盡情亂作故仔唔洗合邏輯想點就點好爽架 XD

突然間諗到個盲點，點解咁皇道o既設定，
居然無其他人模仿呢？1般受歡迎o既作品類形，
市場上都會有亞種出現，例如芒亨大熱，
然後就有討鬼傳、god eater等共鬥遊戲，
伙頭智多星之後有伙頭仔昆布、食戟之靈，
poketmon之後有數碼暴龍、妖怪手表等，
而叮噹就真係唔覺有其他致敬o既作品，
除左同1個作者o既奇天烈百科全書之外，
唔通因為經典得滯，1旦有類似套路出現，
都會被指係抄襲？