做左份工3個幾月，每日幾乎都忙到無停過，
估唔到呢兩日可以做下冗員！算苦盡金來啦~

尋日上下facebook，又上下巴哈，
今日諗到個更有意義利用呢d冗員時間o既方法，
就係上日本yahoo!睇新聞，主要唔係睇內容，
而係學日文，將d漢字copy貼上google翻譯睇讀音，
(係睇呀唔係聽，睇個spelling，公司無得聽野)
又或者將d陌生o既生字響網上字典查下咩意思，
咁番工真係有意義好多 XD

其實蔡記都係番緊工睇日本forum(2ch果d?)
族d族d記，1日記到3個，1年就過千個架啦，
諗諗下如果我有咁o既熱情去學英文，
相信中4時都已經唔洗字幕睇得明復仇者聯盟。

本來個topic係想寫Game Wave摺左，
又本來呢篇野早兩個月前就想打(但又唔記得左)
見衣家多左個開呢個題o既契機就1次過講埋，
先講Game Wave，唔覺唔覺就咁收左皮，
查實係幾時摺我都唔知，只係行過報攤搵唔到呢本野，
反而掛住Game Wave個名o既暴雪英霸攻略仲未落架，
同公司(應該係)o既AniWave都仲keep住有出，
正因為呢兩本野令我有Game Wave仲健在o既錯覺，
可能1年前已經摺左都唔定？

的確Game Wave論精美度輸比G鬆同Game Weekly，
Game書內容方面又唔會有乜爆炸性o既表現，
咪又係介紹下d新game同埋攻略，睇邊本都差無幾，
價錢差唔多o既情況下精美d果本故然比較吸引，
不過都慨嘆市場上又少1本Game書，表示可惜。

連壹傳媒旗下o既忽然1周兩個月前都摺書，
或多或少令紙媒走向夕陽工業o既步伐加快左，
不過1雞死1雞鳴，呢期行過些粉OK個雜誌架，
又發現兩本新野，1本高登出品(應該係)o既巴絲打，
出左兩期，打左陣書釘，內容充滿高登術語，
例如咩野毒拎、向左走向右走等等，又幾盞鬼。
另1本係好似要頂忽周o既e+娛樂(創刊號)
排版都好成熟，唔係1般創刊號級數，
聽講係都市日報搵番忽周班底重組呢本新雜誌，
唔怪得啦。

雖然填地址果度有d混亂(詳請今年9月8號blog有寫)
好在都響指定日子內收到準考證。

仲以為會派到d中學或大學禮堂應考(會考咩？ XD)
估唔到係派到9展，唔知其他人仲會派到咩地方考？
定亦或其實全香港都剩係響果度考無第2度？

當日應該直接答的士，懶得答到9龍灣又轉車咁煩，
以前會考listening要考生自備收音機，
到時就會響香港電台播放試題全香港人都可收聽到，
但日能試又無話過要帶收音機之類，
唔知聽解果part係點呢？用會場o既廣播系統播？

要365N塊o既最強穿龍棍終於升到Lv50，
為左呢枝野試過連續入9次恩典方案，
佢又無得1次過買幾個，打login都打到煩。

或許我用左個比較唔抵o既方法整呢枝野，
整完先知今個禮拜有得抽金閃閃小判•恩典，
有機會抽到大量N塊，不過慶幸睇番巴哈，
就算用抽o既都唔1定平過買恩典方案，
聽落都無咁灰，but呢枝野好似都幾多人咩住，
而且蔡記見我有呢枝野佢2話不說即刻又整把，
睇黎佢都唔知抽咩野中左唔少N塊，
乜咁易就整得到咩？

本來仲諗可以拎住把唔係人人都有o既神器，
身份o既像徵之類，但似乎並唔係咁，
可能遲d野團會變左乜乜乜-3限Lv50商神手杖...
 

迫自己盡量每日都記1~3個日文生字，
第2朝番工途中會諗番尋日學左d咩新字，
當然揀N5程度以外果d字眼記啦，
最近記o既有：まぼろし、儚い、叶う、
果たす、積む、包む、抱く、抱える、
盗む、ぬるい、望む、謎、殴る等等。

記果陣會搵埋發音相似o既(如有)字1齊記，
例如：積む同包む咁，又或者意思相近o既，
例如：幻同儚い、叶う同果たす等等。

至於N5程度o既動詞(約100個)、名詞等，
都已經大致記熟晒。