花生係少有o既無害零食(兩個月前日誌有講)
所以近期都keep住有買金龜乜萬里望*花生，
呢隻牌子有分80g同160g兩款，
包裝上有寫開左封都係要盡快食晒，
理論上買80g比較好，開左快d食晒唔洗擺太耐，
但買過幾次80g同160g得知分別除左數量之外，
質量居然都有分別，唔通真係1分錢1分貨？
80g裡面d花生多數細粒d，細o既花生通常硬d，
無乜味，食落似食其他水果粒核咁o既感覺，
160g裡面d花生多數大粒d，大o既花生可口d，
咬落無咁硬，口感好好多。

即係入花生果陣刻意將d無咁靚o既質落細包裝，
因為細包賣平d無咁好賺？

(*衣家d包裝寫萬里脆唔係萬里望)

書本1般黎講都分膠裝書(perfect binding)同騎釘書，
仲有書脊以金屬或膠圈扣住o既款，果d係notebook多，
又或者文具舖幫你影印完再砌本書果d，睇落好求其。

早前印手錶catalog書樣本果陣都偷偷去加工房試釘1本，
係做到o既，只係唔知miss左d咩步驟，硬係爭緊d野，
之後同事講解完整o既釘裝書製作過程，原來就係爭呢d。

首先印好晒d封面同內文啦，封面要過膠o既過左佢，
唔洗過o既就開始壓線，1直都唔知個壓線器點樣對準摺位，
壓果個位遮住晒，原來係要用電筒照住響側邊睇入去，
把壓刀(?)對正個摺線位，衣家先明白到摺線o既重要性，
(的確手摺對摺果d單張無摺線位都唔大影響o既)
封面多數係厚紙，手摺o既話會有好多皺紋好肉酸。

封面同內容都壓好晒線後摺埋就用電動大型釘書機釘啦，
大型釘書器有個屋頂形o既座比你押本書響上面處刑(?)
通常1本書釘兩口釘，呢個時侯又有個問題啦，
果兩口釘o既位置點定架？原來個屋頂(?)有畫到d參考線，
有寫A4、A5等，本書係A4就移到去A4條線釘就得啦。

釘好晒先至用閘紙機裁切，點解呢？如果切好先釘o既話，
每頁同樣size本書就會越中間o既頁數向外突晒出黎，
釘好先切就整整齊齊，切埋就大功告成啦！

我地公司就係咁整，其他公司係咪咁整就唔多清楚，
不過之前就係漏左兩個關鍵步驟搞到出到黎爭緊d野，
好似玩魔術1樣，即使知道大致原理，漏左部份竅門，
表演上黎就係唔夠順手，有人教或睇片學到漏左o既位，
係件開心o既事。

雖然寫左個製作流程教學，但屋企無果d器材，
都係整唔到1本完美o既騎釘書架，純綷得個知字 XD

毛記經常都玩改歌詞，亦改得有水準，
佢玩野o既手法同中學時期o既我好似，
都係靠改歌上位，呢方面有d臭味相投 XD

毛記將改歌呢樣野由純綷無厘頭娛樂大眾，
升華到商業o既層面，賣埋廣告賺埋錢，
最近幫某咖啡賣廣告改黎明o既情深說話未曾講，
仲要搵番真黎明黎唱番，個人認為全段片最好笑o既，
係未唱之前林日希響度睇緊黎明爆粗段惡搞片，
同埋中間唱唱下唱到「如劉江~」又真係有劉江走出黎，
以黎明今時今日o既地位(A Music老闆)要飾演打工仔，
要睇林日希面色刷佢鞋又別有另1番風味，
黎明肯惡搞自己亦顯得佢無咁大架子，公關手段唔錯，
不過整體麻麻唔夠好笑，而另1首某髮蠟o既廣告歌，
改自陳亦迅重口味由林海峰唱o既重品味好笑好多，
尤其林海峰果種做作得黎又嚴蕭o既冷面笑匠功力相當正，
佢飾演1個街邊sell產品o既推銷員，歌詞亦改得精景，
全首歌用番果d擴聲器o既粗糙聲線去唱呢野有心思 XD

出色o既廣告就算長3分幾鐘都會想睇晒佢，
毛記響呢方面就成功咁做到啦。

 

上年第1日番新工撞正黑雨擔埋遮都全身濕晒，
今日紅雨但全日無開過遮都滴水不沾，
番工前都仲落緊大雨，籍住紅雨專登遲d出門口，
落到街1滴雨都無，番到公司都無落過雨，
然後響公司果陣出面個天又黑晒勁大雨，
lunch無出街食，櫃桶盒碗麵今日就有用武之地，
全日大部份時間落大雨到收工前外面放晴，
然後夜晚上埋堂再放學都無落過雨，
所以係好運o既就算落足大半日紅雨，
都可以唔洗開遮，衰運o既就算落1陣黑雨，
都可以林到正1正。
 

舊電影，又係新居d電視台唔o岩亞媽睇所以上網搵電影睇，
有劉德華、古天樂、萬綺雯、尹天照、譚耀文、黃抽生，
古仔響警察學堂畢業就比上頭派去做臥底(咁無間道開場)
下1個鏡頭古仔已經得到左佢潛入o既黑幫信任，
個黑幫又叫洪興，劉德華就係金盤洗手o既大佬，
譚耀文想上位做大佬係咁搞事，捉走劉華1家人勒索要脅，
吞左佢間公司，古仔救番華仔，並坦白透露係臥底，
劉華要報仇，想開槍殺譚耀文，比古仔勸服唔殺，
掉枝槍落地，譚耀文果然執起枝槍想射華仔又果然無子彈，
古仔護主心切開槍射殺譚耀文原來中左劉華借槍殺人圈套，
華仔1個奸笑結束左呢套電影。(skip左好多劇情)

起初以為呢套係龍在江湖(都係有劉華)其實係在邊緣，
譚耀文好似經常做奸角，仲要係d衣冠端正內心惡毒果類形，
抽生響呢套戲造形感覺似麥兜入面個校長多d(都係佢把聲)
無乜氣勢唔似大佬級，古惑仔個大飛哥造形入形入格好多，
個人1向都唔鐘意風塵女子style，但萬綺雯飾演呢個妓女，
發姣得黎完全唔反感，可能係佢先可以做到呢種境界。
尹天照就負責表現出做臥底無好下場o既人版，
黎顯得古仔o既處境其實幾咁岌岌可危隨時下1個就係佢，
不過套戲又做唔到無間道果種爭d比人識穿o既緊張感。