相信有行過759都會聽過類似以下o既廣播：
「今日憑會員卡購物，正價貨品7拆，
街坊價公價超抵價8拆」之類。

呢幾句野不斷重覆，最大問題係幾乎無間隔，
疲勞轟炸，洗腦度極高，令人唔舒服，
搞到每次聽到759播呢d都想盡快步出該店，
其實咁播法係有反效果，趕客架，
要重覆都隔1兩分鐘丫，中間播d音樂都好，
起碼無咁煩丫，好似吉之島d廣播咁咪好囉，
1個日本城d廣播都係好煩，又有洗腦歌，
廣播d語氣又浮誇，都係容易聽到燥底。

原名係逃避雖可恥但有用，不過個名有d9唔答8，
我都覺得月薪嬌妻呢個名適合d，
片尾曲o既戀舞hit到連美國注日領事官員都跳。

故事講大學畢業o既新垣結衣出黎打工唔順利，
做親乜都比人炒，就算做份同自己學歷無關o既工，
1樣過唔到試用期，當佢感到失落之際，
家人介紹佢去星野源屋企做鐘點女傭，
佢打理得企企理理得到正式錄用好開心，
努力終於得到認同，呢個時侯屋企人又要搬屋，
局住辭左份工，響辭職前結衣諗到不如假結婚，
婚後結衣繼續住星野源屋企打理家務兼有糧出，
純雇員關係無愛情，後來都係日久生情，
結衣著晒綠燈，但星野源唔敢向前行多1步，
咁o既拉鋸狀態持續左10集後先開花結果，
全套劇總共11集。

呢套劇o既特色係經常出現d綜藝節目環節，
主角會變左被訪者、嘉賓或參賽者，
用呢種手法去交帶或補完該劇o既設定。

劇情明明好簡單但唔知點解好感動，
唔係下下要死人lum樓先可以賺人熱淚o既。
有咁靚o既女仔入得廚房出得廳堂仲要鐘意男主，
主動比晒機會，正常人都lur飯應啦，
睇到星野源咁唔識做點都有d火滾，
睇劇少不免會忍唔住1路睇1路推測後續發展，
話就話劇情簡單但係都係估錯左，
本來估星野比人裁員後因為無辦法出糧比結衣，
凡事好均真唔想欠人人情所以又發神經炒結衣，
結衣唔介意無條件付出肯同星野1齊共患難之類，
估唔到o岩o岩相反，係星野提出取消雇傭關係，
做真夫妻，點知結衣反對無糧出唔肯白做好勢利，
星野傻左10集，居然最尾1集論到結衣發神經！
枉你仲話愛對方，無錢就唔要人拿？
雖然最尾達成共識修成正果，但都睇到有d火。

劇入面果d所謂靚仔o既1d都唔靚仔囉，
飾演結衣亞姨o既百合睇落應該無50歲頂多40，
fix字幕組o既版本中文字幕之外連日文都有，
對學日文o既人黎講係良好o既學習素材，值得1讚！

1套平凡校園日常作品，本來都無乜特別吸引力，
不過某個facebook群組經常將呢套d片段貼出黎，
女主宇佐美又幾可愛o既，加上為左練日文聽力，
所以down黎睇下，故事只係圍繞住1個美術部內，
宇佐美鐘意左486(又係叫486呀)又唔夠膽表白，
但486只對2次元有興趣，宇佐美想追又追唔到，
1直維持呢個狀態，加上大量無關痛癢o既濕碎事，
有d好笑o既興鬆小品無乜深度，唔洗用腦睇。

套野有12集(唔知之後仲有無第2季啦)
睇咁多集最關心o既當然係宇佐美追唔追到486啦，
不過1但追到就爆機架啦，仲邊有得做落去？
當然，最尾宇佐美都係食白果，有d可憐，
其實每次睇落宇佐美好似有希望果陣，
我都估到1係就宇佐美腦洞幻想，1係就誤會，
從486表情得知，佢對宇佐美從來都無動過情，
劇中另1女角伊萬莉比宇佐美更有吸引力，
唔係話宇佐美差，但伊萬莉o既中2病更討好，
而且粉紅色長雙馬尾都比外表平凡o既宇佐美注目，
有運動才華，加上同486又做到同聲同氣，
其實更想佢追到486，只係故事唔似會走呢個方向，
伊萬莉同486相方只係視對方為志同道合o既好友，
宇佐美最大情敵仍然係2次元角色 XD

人病左可以不藥而癒，原來機械或程式都會架？

較早前廁所係漏水，雖然扭細左個掣無乜漏水，
但係水箱入面個測水位o既零件經常會卡住，
咁就無水沖廁所，1但卡左要人手將佢移1移位，
但最近又無再出現呢種情況，既無漏水，
又無卡位，居然識自己好番？

較早前話過chrome開網頁前會停好耐無反應，
最近又正常番，開親都好快入到個網頁，
無更新過無盛居然識自己好番？

1直都好渴望用PSVR玩開放式世界o既game，
置身於遊戲世界入面1邊探索1邊飽覽風景，
最好無時間限制，可以休閒咁散步，
絕對會停落黎細心欣賞遊戲內每樣東西，
連1草1木都唔放過，不過好似唔見呢類作品，
不論夏日課程、職業模擬、嘉年華、初音、
都只係企響個好細o既範圍內無得自由移動，
就算係最接近開放式世界o既Here They Lie，
可惜轉移角度係個畫面黑1黑然後換左，
好唔自然，而bio hazard7仲未出。

其實係有o既！只係個作品無乜名氣無乜人講，
就係標題呢個Robinson:The Joueney啦！
玩家可以體驗置身響個古代森林入面攀山涉水，
自由探索，欣賞或調查各種奇怪生物，
有恐龍啦、有腳o既蛇啦(畫蛇添足？)
場景部份物件可以亙動，遊戲畫面質素甚高，
操作係用手掣(唔係move)好似超能力咁，
隔空咁將遠距離o既物件吸過黎，
以類比桿(或移動頭部)將物件放到指定位置，
移動方式係以左邊類比桿負責前後行，
右邊類比桿轉向，1開始個轉向模式係1格格咁，
可以入option較smooth，不過smooth左會易暈，
建議用番預設值，我用預設連玩4粒鐘以上都無暈，
版圖方面都算大，有幾個大區域比你探險，
略嫌玩家操作果個角色行路太慢，
目前呢隻game應該未響中文PSN上架，
要玩就要歐美或者日本PSN，唔強求中文版o既話，
買日版就OK，日版可以響option揀英文或日文語音，
字幕？係無o既，我諗d廠商唔想響VR game整字幕，
咁樣會破壞玩家o既投入度，你響現實世界行緊路，
會唔會不斷有d字浮現響你眼前丫？

如果PSVR可以再出多d呢類game就好啦~
最好係GTA、sleeping dog果d響城市入面周街走，
bio hazard7又太恐怖唔想玩，貼錢買難受，
總之想享受開放式VR世界，又驚恐怖嚇到掟掣，
呢隻Robinson:The Joueney就適合你！