時光機睇叮噹就見得多，我覺得就算科技幾發達都好，
都無可能做到時光機呢樣野，尤其係去未來o既，
因為未來根本未發生，唔存在o既野又點會比你去到？

要1下子去遙遠o既未來其實都有方法做到，
唔洗好高科技添，分分鐘衣家o既技術都得，
唔關時光機事，係冬眠，只要將個人雪藏後，
過左100年(或更多年)後再解凍，對呢個人黎講，
就好似1訓醒就飛左去100年後o既世界咁，
唔排除目前都有人做緊呢個實驗(之前好似聽過)
大前題只係能唔能夠順利整番醒條友，
呢種方法當然無辦法番番佢原本o既年代啦，
到佢醒番佢d親屬同朋友都死晒或者佢個孫仲老過佢。

至於回到過去呢？要睇番遙遠o既過去都唔係無可能，
係睇，當然唔係播錄影帶果d啦，未有錄像技術之前都得，
只係目前o既科技仲未做到，但原理其實唔複雜，
首先你知道響地球望到o既星星其實可能係遠古o既影像，
例如距離1萬光年果粒星，你望到o既係佢1萬年前o既樣，
因為光行左1萬年先黎到地球將呢個樣放送比你睇，
實際上衣家已經爆左都唔定，由此可見光係保存住歷史記憶，
所以如果能夠發明到超越光速o既載具就可以睇番過去，
簡單d黎講，你只要用1秒時間飛到去1萬光年遠o既地方，
再響果度拎望遠鏡望番地球就睇到1萬年前地球發生咩事，
1萬年前地球o既影像衣家都只係飛到1萬光年遠o既距離，
唔講咁遠，只要你飛到2千光年遠就可以睇番漢朝o既中國，
就算當時未發明影相機都可以知道真實o既漢武帝係咩樣，
同d畫像似唔似 XD

有人話飛得快過光速就可以穿越時空，我係唔相信o既，
唔好搬1堆咩野相對論公式出黎，睇左更加唔會明，
有人話響高速移動o既野裡面過o既時間係比出面o既過得快，
例如1個飛左兩年o既火箭，坐響裡面o既人只係過左1年，
精神時間房咩？(精神時間房係掉番轉入面過得慢過外面)
我係唔認同，反而你話如果有個人速度係正常人o既10倍，
當然連思想都要快人10倍啦，咁佢o既時間就可以過得慢人10倍，
佢o既1秒係人地1微秒，唔明？睇變種特工o既快銀就明晒啦，
正常o既1秒對佢黎講可以係幾分鐘，做到接近時間靜止，
就算再快，最多只係畫面靜止(其實係極慢動作)更耐姐
都唔能夠穿越時空。

講左咁多PSVR係時侯講下其他廠o既遊戲機啦，
1向比人有新概念形象o既老任日前公佈左新主機，
呢部唔係NX(之前傳聞個名)亦唔係wiiR(我作o既名)
叫做任天堂switch，今次有乜破格性表現呢？
從宣傳片得知主要功能係可以帶出街玩o既家用機...
下？係街玩3DS咪得囉，將部家用機拎出街無野呀？
手提機性能o既家用機，機能好打極都有限啦，
即係畫面又要落後其他對手o既次世代機，
而且仲食埋3DS(或其後繼機)o既市場，
目測部機體積都有平版咁上下，帶咁大舊野出街，
就為左隨時可以打機？米玩啦要打機用手機都得啦，
真係唔多睇好，對上果部wiiU已經衰左啦，
仲唔吸收教訓出埋d人地都可以做到o既機？
(wiiU渣響手玩家用機概念PSV當時1野做到)
最致命傷係有無第3廠肯同佢出game，
剩係靠佢自家o既孖寶兄弟唔夠力架，
1年都出唔到1隻，買部機剩係玩佢1兩隻game咩？

講番老任以前突破性o既主機歷史，
紅白機超任雄霸業界1時唔洗講啦，
但N64同GameCube後勁不繼，個市場比PS食左，
跟住憑手提機NDS創意玩法殺出1條血路，
方向感應、touch screen係多左好多嶄新玩法，
然後wii係今時今日體感玩法o既先軀者，
雖然NDS同wii畫面都落後同期對手但玩味性強，
叫做響市場上分到1杯巾，跟住3DS玩裸眼3D，
可惜新鮮感過後多數人都熄3D黎玩(慳電丫嘛)
對上1部就wiiU，整個額外mon唔知做乜，
以為佢d game會活用到呢個功能但唔覺，
睇左咁多部機，響市場上站得住腳o既，
只有NDS、wii、3DS，NDS同wii就靠創意取勝，
3DS唔係因為佢o既3D，而係好多game廠支持，
尤其係capcom，要玩芒亨非3DS不可，
心水清o既就睇到，成功與否好睇有無第3廠支撐，
超任盛世都係靠game多，就算靠創意果d，
都未能壓制同期對手，只係叫做有得玩下咁，
3DS響手提機黎講的確壓倒PSV。

不過，poketmon go大熱，雖然熱潮似乎減弱，
但每日玩家o既課金額仍然有港幣1600萬，
你無睇錯，係每日，而且係港幣唔係日元！
(消息來源自第557期G鬆news channel)
唔好話1600萬，減兩個零每日16萬都賺到笑！
呢筆咁龐大o既資金夠任天堂衰多幾代家用機啦。

讀書果陣已經知道太陽係比地球大好多倍，
但抬頭望天個太陽仲細過1毫子，
有無睇過d行星比例圖或者軌道圖之類？
甚至有d圖整到地球同太陽好似月球同地球咁，
理論上望見太陽應該佔左大半個天空或更多架？
其實呢，呢d所謂比例圖個距離錯到7彩！
如果你用個廿幾寸電腦mon唔洗放大張圖，
睇得晒8大行星仲要連d星上面o既花紋都睇到，
例如木星o既間條紋、仲有土星環之類，
呢幅圖肯定錯晒！就咁睇呢d圖仲覺得好牙煙，
會諗，哇，粒木星飛過少少咪撞爆火星囉？

當我翻查過行星o既數據，就明白到，
要按比例咁放滿8大行星o既圖可能大過個客廳，
首先講下1個天文單位係大約1億5千萬公里，
太陽直徑只係1百40萬公里，換句話講，
1個天文單位o既闊度係可以平排放100個太陽！
地球直徑只有萬3公里(太陽直徑係地球109倍)
如果以A4紙畫1個3x3mm大細o既野當係太陽，
個太陽放紙邊，按比例連1個天文單位都畫唔到，
因為A4紙長度只有297mm，天文單位要300mm以上。
我用indesign嘗試畫出黎(當然畫出界)
以0.03x0.03mm畫出地球，響mon睇呢粒野，
幾乎只得1格pixel，根本放唔到咩野紋理，
只係畫個地日距離都已經咁，
點樣畫到去30天文單位o既海王星？
點解話大過客廳？你諗下30張A4紙舖地下，
而且d行星只係1粒塵咁，呢個先符合真實比例。

以前真係以為從地球飛出太空果陣，係咁2望下，
會見到好似籃球咁大o既木星掛響遠方，
話晒都係8大行星中最大粒，應該1眼望見丫？
查實木星直徑只有太陽約10份1(約比地球大10倍)
但距離地球約4個天文單位咁遠，太陽都只係1毫子，
肉眼望得到木星o既話頂多都係得1點姐。

除左距離之外，都想知道行星公轉o既移動速度，
翻查過資料，得知地球行1年大約7個天文單位咁遠，
如果以地球o既速度直線咁飛到海王星要超過4年，
不過按照某個行星運動定論，因為受太陽引力影響，
越近太陽o既天體移動速度越快，所以水星最快，
就算地球，當較遠離太陽時公轉速度都會略減，
所以假設地球要直航到海王星o既話要更多更多時間，
當然，地球又點會直飛出去呢？只係無聊諗下姐，
呢d野知黎的確無乜用，純綷滿足下好奇心。

演唱會VR遊戲目前有兩隻，1隻係im@s另1隻係初音，
im@s聽講自由度較低(無得set企上個台o既視點)
所以就試左隻初音，響日服買7千幾yen果隻，
佢仲有隻2千幾yen，7千果隻好似係齊晒d歌，
買左7千果隻就連2千果隻都當你買埋，1步到位，
如果買2千果隻唔夠喉再買7千果隻加埋咪要1萬yen？
仲貴左？真係咁唔抵？唔知佢點計啦。

好似比demo版多角度，demo版視點無得企上台，
揮螢光棒d節奏好似唔多夾，揮揮下仲會變左第2枝野，
有時變神仙棒，有時變沙錘，有時變搖鼓，
有分前後同左右兩種方向fing要睇番個指示訊息，
變搖鼓後fing得唔就手，棒狀變塊狀好有違和感，
我無move只用手掣玩，順帶1提原來拍個手掣都有判定，
玩晒咁多首歌夾埋encore都唔過10首歌，
而且只得1個舞台好單調(雖然舞台有其他特效)
同埋只得1個初音無鏡音無巡音無kaito，
7千幾yen黎講我覺得堅少野，不過巴哈有人話，
7千幾yen果個係比你有之後DLC下載o既權限，
衣家都未出DLC，比定錢先姐，咁都正常d，
話時話encore條件未明，好似要跟住其他觀眾叫，
但聽唔清楚佢地叫乜口號，只係求其lur出黎，
又比我encore度，趁屋企無人先敢跟住叫炸 XD

其實仲有隻project diva x hd都支援VR功能，
只係唔係全隻game都對應，剩係個鑑賞模式姐，
如果已經有project diva x hd建議你唔洗再買演唱會，
因為呢隻有o既野比演唱會可謂有過之而無不及，
有初音以外o既角色比你用(唔包括亞種重音弱音果d)
有好多舞台同衣服比你換，邊首歌配邊個場景邊套衫，
自由配塔，觀賞果陣仲可以隨時o禁停佢，
(演唱會o禁option整停左會有選項介面遮住你)
只差在無得渣螢光棒(或道具)比你fing囉。
除非你係V家迷，只係想感受初音企你面前唱歌o既話，
1隻project diva x hd搞掂晒。

好奇心、求知慾旺盛o既我，想樣樣野都研究下，
近排同CS、師父講開d天文學o既野，
萌生起去太空館o既念頭，覺得可以搵到d咩答案。

1出尖咀地鐵站太空館個出口(唔記得咩英文字母)
過條馬路就見到果個半圓狀建築物，好易搵到，
對上1次去太空館果陣應該仲係好細個，
做過d乜都無乜印像，科學館就讀完中學都仲有去，
有次無聊同蔡記、兆豪1齊去添。

入到太空館，個展覽廳工程中，基本上無乜野睇，
得間精品店賣下d好似同太空有關係o既玩具咁，
例如穿梭機模型(要2千蚊)啦、星球雕刻水晶等等，
1場黎到無理由乜都唔做，就睇佢地天象館電影，
今日有向火星出發、北極探秘、星光解碼3套上映，
火星果套有興趣但係3D，我又無帶立體眼鏡，
主要係放映時間唔多夾，下1場要等到好夜先睇得，
就睇星光解碼啦，唔記得有無睇過天象館，
不過衣家睇呢個全天幕影院都係幾過癮，
早幾日先玩完VR黎都咁話，當然震撼程度唔及VR，
但係當播緊高速移動o既時侯(例如響太空飛緊)
係具有衝擊性，可能只要畫面大過視線範圍，
即使唔立體都好有壓迫感，講番套片先，
佢係介紹關於光o既野，仲解析點樣測量星球距離，
就係用視差法，好似用3D眼鏡睇立體影像咁，
如果拎開個眼鏡你會見到物件好似殘影咁分身，
要呈現近o既物件果樣野分開o既幅度較大，
相反遠o既物件分散幅度較細，同樣原理，
當物件放中間你響同1距離之下企左邊同右邊，
分別影張相出黎，同1件物件o既位置都有偏差，
而科學家就係透過呢d偏差去推算出天體o既距離。
另外，點解遙不可及o既惑星可知道係乜野物質？
就係用光譜分析，光反射唔同物質都有唔同光，
只要比照番光譜就知道係乜野物質。
呢套片又令我袋左智識落袋，係好值得1睇，
只係好似只做到今個月底就換另1套。

巡例又要行下科學館啦，但呢個就無咁易搵，
以為只要響地鐵站科學館出口行1陣就見到，
點知行左好耐都未發現，要開埋google map搵，
咁辛苦搵到可惜逢星期4休館(之前都略有所聞)
無所謂啦，就睇下隔離o既香港歷史博物館，
哇，都幾多野睇，例如有香港出土o既歷史文物，
亦有舊香港風情o既大形模型，
又有李鄭漢墓o既縮水仿製模型同介紹影片，
最重要o既係，費用全免！