聽公司個同事播哲學有計傾，係咁耳介紹下，
呢個係RTHK製作討論哲學o既節目，
咁o岩呢集講到人生意義呢個議題，
其實我無好認真咁聽晒個節目，但心諗，
人生意義邊度洗探討1集咁耐呀？
我1句就可以講晒，就係要開心！

以前都上網睇過有關於我地人類存在係有咩目的？
有d人話根本就係無目的，做乜1定硬要加個目的？
天地萬物好多野存在都唔1定有佢o既價值。

雖然，你會覺得呢個世界(地球)o既存在，
就係為左比我地人類居住，d動植物存在，
就係為左比我地人類進食(?)我覺得唔係囉，
佢地唔係為左人類而存在，係咁o岩比人類利用姐，
呢個並唔係佢地o既目的，如果呢d野有意識o既話，
佢地都應該唔會想比人類利用 XD

總之，存在最重要就係盡量令自己開心，
(當然亦唔好將快樂建築響別人o既痛苦之上)
根本就唔洗諗咁多為乜會存在之類，無意思。

1直都想要直接響mon畫好似用紙筆畫野o既繪版，
兩年前買左surface pro3，雖然可以響mon畫到，
但係完全唔係用紙筆畫野o既手感，
只要做唔到呢種手感我o既畫功就大打折扣，
研究過surface主要問題係有delay，
對位亦唔夠精確，例如響個框入面打密集線陰影，
好多時唔係出左界就係未到框邊，好無癮，
兩年來我諗我都應該未必用到部野10次。

睇過網上o既相關討論，都話surface pro2果陣，
枝筆係用wacom技術，所以手感更好，
自從pro3開始就microsoft自家開發就差左，
有人話要最佳手感要買wacom出o既平版，
但市面上唔見有wacom平版實機測試(連賣都少)
所以係咪我想要o既效果真係不得而知，
1千蚊樓下都仲可以買黎試下，唔o岩都唔心痛，
但講緊最少都要6千以上(甚至更貴)唔敢亂買。

蘋果野就周圍都有promote，最近見ipad出埋枝pencil，
就試下，發現好接近我想要o既效果，完全唔覺有延遲，
開埋果個叫procreate o既繪圖軟件黎試真d，
哇不得了，居然可以精細到用素描好柔和o既漸變色，
我記得呢樣野響surface做d線係硬框框，唔見得人o既，
如無意外ipad pro應該係我夢味以求o既繪圖平台！
細塊o既ipad pro最細容量(64Gb)都係5千蚊有找，
當然仲要買埋枝筆(780蚊)同埋個繪圖apps啦，
考慮會唔會買大塊d，暫定下個月出糧就買。

雖然ipad pro咁強勁，但仲未完全達到紙筆o既感覺，
都係因為個鏡面mon又硬又滑，無紙果種少少啜住枝筆，
減低叉錯腳扇左出去o既不必要線條，希望有磨沙貼啦。

尋日試完ipad又拎番塊封塵生埋蜘蛛網o既surface黎試，
(生蜘蛛網唔係誇張表達手法，個皮套真係有 XD)
睇下ipad好手感會唔會只係錯覺，其實surface都唔差，
聽講mon貼亦有機會影響枝筆(我試果d ipad係無mon貼)
諗住今次打真軍撕走埋張mon貼再試真d，
點知surface筆已經無反應，check過藍牙仲配對緊，
o禁筆頂粒紫色掣部機都仲開到OneNote，諗緊係咪唔夠電，
如果枝筆係長期stand by收發訊號，都兩年啦，都唔出奇。
但佢專用o既AAAA電都唔知邊度有賣，都係好麻煩，
如果換埋電都仲係無反應點算？又要買過枝筆？
仲諗住可能係我怪錯左surface比個機會佢平反，
衣家真係又多1個理由比我換ipad pro啦。

繼上個月連打兩個8號波，尋日又黎1個瑪娃，
不過呢個無料到，打到落波只係上到3號，
放唔到假，好在番工果陣都只係落毛毛雨，
最憎d風上又上唔到8號但又要狂風大雨果d，
又話連打4個風？係咪黎緊仲有1個？
係就快d，驚佢又拖到星期6先掛8號。

衣家經常用日文自言自言(當然無人果陣先咁做)
基本上連續講10分鐘日常話題(唔涉及專業名詞)
都無乜野係表達唔到，以我衣家已識得o既文法、
名詞、動詞、形容詞o既數量夠應付有凸，
當然純綷講得通，講得怪唔怪有無錯文法就唔知，
暫時亦無打算咁姿整住，但求講得到先啦。

不過仲未做到講得好快好流暢，目前o既程度係，
想講句野d生字都響腦海即時彈晒出黎唔洗慢慢搵，
即係唔會話想講「食飯」諗「丫~食字日文點講？」
相關o既動詞同名詞已經好自然咁彈出黎架啦，
彈唔到出黎o既通常都真係我未接觸過o既字眼，
而時間係用響轉文法，例如經常都唔記得轉過去式，
搞到噴左句野出黎都要undo轉番過去式再講多次，
又或者d可能形、被動形、使役形要組織1秒先講到，
唔能夠1野噴到出黎，簡單d講仲未熟到唔洗諗果隻，
我o既目標係希望熟到唔洗諗，好似打倉頡咁，
要打邊個字已經反射神經打左出黎唔洗諗拆碼。

講果方面算係咁啦，聽果方面都仲係未得，
好多時我講到句野出黎但聽唔明對方講乜而接唔到，
(以上情況係指上日文堂同老師對話果陣)好無癮，
老師又係o既，對住我呢d程度o既學生都唔講慢d，
用字亦唔簡單d，搞到我不得不1句起兩句止，
係，我明白你係想我地習慣日本人講野o既速度，
不過我都仲未學行你就跑，只會打擊我o既自信，
應該先慢慢講順利對話到，令學生建立左小小成功感，
然後巡序漸進咁加快速度，咁先有得玩落去丫嘛。

上個月先寫左個大快活中伏報告，今次又讚番，
呢個香蔥豬扒飯主要係兩塊煎豬扒+蔥粒+鼓油，
係就係簡單左d，連特製o既汁都無，認真慳力，
但有時簡單都已經好好食，好過加d唔知咩汁，
好似上個月中伏報告入面講o既肉燥、山渣果d，
真係畫蛇添足，加左扣晒分。

配上蔥粒好開胃，就算豬扒換左魚柳或者雞比，
都1樣好食，鼓油就可有可無，對整體無乜影響，
不過豬扒比雞比方便，講緊刀叉切開d肉o既過程，
雞比結構複雜切起上黎麻煩d，所以豬扒再加分，
趁呢排有就喪食啦，佢d野食種類1時時o既，
好似之前想食個蒸肉餅1直都唔見有再上架，
之前蜜咩雞比飯可以配洋蔥汁衣家轉左跟肉燥，
唔想再叫，new走d肉燥都麻煩。