雖然唔讚同呢個精煉活動(詳情可睇番27號篇日誌)
但都係有參與，目標係+10純白學生帽，
諗住換比主教用，無諗過+14，自己主力係咒術，
目前唔覺咒術戰死頭比我另外兩頂頭飾好用，
打王用席琳套就算只+40%無60%都勁過戰死頭啦，
高防o既王用貝思波長貓，點睇都唔論到戰死頭。

首先用精煉+5卷精再用濃鋁無防爆衝+6，
爆左1頂先整到，然後用祝防衝+7，
無記錯1take pass左，+7左先可以用鐵匠祝福，
商人個手推車仲有大量高濃鋁箱，
用埋之前官方送o既鐵匠祝福(衣家剩番1舊)
精到+9純白學生帽都係用本身剩餘o既商城點數，
同埋倉庫/手推車已有o既物資，未有儲值，
其實我仲有張+9防卷未用，唔捨得用，
反正頂帽就算爆左都可以再用99P買。

好啦，可以用o既都用得7788，要買點數啦，
為左唔想落街買兩次，我已經選擇買2000P，
唔係買1000P，諗住用剩o既點數日後再用，
儲值完後再響商城5箱5箱祝防咁拉落黎精煉，
結果用晒d點數(剩番45P唔夠買1粒)都未+10！
有無搞錯呀？只係+9到+10炸大佬！
連埋本身有o既點數總共買左21粒祝防，
21粒都精唔到1個精煉值，再開另1個帳號，
好在果個帳號仲有千幾P，再拉5粒祝防，
然後第1粒就過啦，總共係用左22粒先衝到+10，
只係+10已經咁辛苦，+14真係唔敢想像！
剩番4粒就拎去衝下件+9喬伊亞蛇皮全部衰晒。

anyway啦，總算搞到件+10純白學生帽，
我真係好怕精煉，果種好似丟錢落咸水海o既感覺，
好失落，5百幾蚊就咁好似1陣風無左不突止，
仲要睇唔到前境唔知仲要幾多粒先精到果種徬偟感，
我寧願比舊更大o既錢但可以確實得到想要o既野，
最憎賭駁，如果唔係呢頂純白帽活動期間唔比交易，
我肯定就咁上8591直接買頂現盛o既算。

上星期實裝o既戰死者2.0開放戰死頭附魔，
今個禮拜就整個精煉活動換戰死頭，
只要將商城99P買到o既帽精煉到+14，
就可以換到+13戰死頭同想要o既附魔。

策劃活動果條友係咪傻架？
本來要附到想要o既屬性係好難，
可能要不斷嘗試不斷失敗先附得到，
從而迫使玩家組團去挑戰高難度o既戰死墓，
衣家比錢就可以附到啦，唔洗再打戰死啦？
浪費左韓方遊戲設計者o既1番心血，
咁快比人1步到位亦減低左遊戲o既耐玩性，
以後仲邊有人肯用心挑戰高難度任務？
點知過排活動道具又會唔會輕鬆課金入手？

活動推出後巴哈亦引起好大o既回響，
有人歡喜有人愁，無能力打戰死o既大喜，
之前用左唔少時間資金精神刷戰死o既黑晒面，
幾經辛苦先可以有超越班無付出者o既戰鬥力，
衣家1個活動少少課金就平起平座。

但係1班既得利益者講d風涼話真係幾唔理智，
又話咩早買早享受遲買享折扣，大佬呀，
家下附魔系統實裝1個禮拜就黎玩呢尾野喎，
如果佢出左年幾兩年先搞呢d活動都無乜意見丫，
又話d辛苦整戰死頭o既人唔抵得人地輕鬆入手，
將心比己丫，換轉係你，尋日1萬蚊買部iphoneX，
今日500蚊就買到你會有咩感受？1d同理心都無。
又話係佢地選擇用辛苦o既方法去整戰死頭，
有簡單o既方法唔用，無人用槍指住佢迫佢去整，
咩叫做選擇先？上星期活動都未推出，
要附魔戰死頭就只有1條路，係無得選擇，
即係同1間舖擺兩件產品出黎賣先叫做有得選擇，
間舖上星期只得A產品，今個星期突然出個B產品，
咁上星期買左A產品o既邊有得選擇？
(利申：我亦無整過戰死頭唔係呢個活動受害者)

不過個活動唔出都出左，就好似潑左出去o既水，
收都收唔番，如果強行取消活動，
果d買左佢頂帽精煉o既人就必定暴怒，
拿，其實好簡單，只要改做精煉左o既活動帽，
可以換番同等精煉值o既精煉卷作為補償，
咁係最無乜爭議o既解決方法，
最多比人鬧又搬龍門失去公信性姐，
邊個叫佢當初諗埋d咁反智o既精煉活動？
拿，方法都幫你地諗埋啦，為左長遠利益著想，
最好都係cancel左佢。

好耐都未買過出街褲，1係唔買1買就買3條，
上個禮拜買左1條，尋日同今日都各買1條，
3條都係UNIQLO定價299蚊o既牛仔褲。

先講下上星期買果條，呢個禮拜著左5日，
整體都無乜問題，只係好焗好熱，
之前著Levi's果條或對上果條都唔會焗，
就算大熱天時著都唔覺條腿會特別熱，
所以呢條布質係唔合格，可能只適合冬天著，
褲管太長，所以要屈1摺，勝在d布夠硬身，
屈左1個星期亦唔會行行下鬆番落黎。

上1段提及到整體都無乜問題，會有咩問題？
之前亞媽買比我果d牛仔褲就好有問題！
例如穿皮帶位好爛入到皮帶，拉練位勁卡，
褲袋穿完又穿，剪裁令到著得好唔舒服之類，
雖然外觀係條正常牛仔褲但著落就好唔正常，
所以整體都無乜問題其實已經好好架啦(苦笑

再講尋日買果條，就係因為上星期果條焗，
所以呢次買條布質薄d，做緊特價249蚊，
嚴格黎講係假牛仔褲，睇落似牛仔布，
但摸落就唔似係，仲有少少彈性，
褲頭位設有橡根同褲頭繩，應該可以唔洗用皮帶，
幾方便丫，外觀上都睇唔出同牛仔褲有乜分別，
小腿位置有收窄，可能因為咁亦唔洗膽心褲管太長，
因為褲腳都箍住條腿唔容易sir落地踩爛，
夜晚都有著過落樓下跑下步，好輕，
明明著住條牛仔褲但好似著屋企褲o既重量。

見尋日果條幾爽，今日再買多條，但只係差1日，
就變番正價299蚊，差唔多等同蝕左1餐飯錢(50蚊)
尋日買果條係傳統牛仔褲果種深藍色，
今日呢條係同款o既深灰色，仲有隻純黑色無打算買，
因為太黑會完全失去牛仔褲果種質感。

呢個響偉哥(Vango)買到o既嘉頓黑朱古力威化，
裡面有4個獨立包裝，每個包裝都幾大塊，
有幾大塊？1部iphone7打直o既4份3咁大囉，
所以每塊果腹度都比其他朱古力產品稍高，
食落係堅好食，外層有椰絲，咬落去係脆o既，
入面有忌廉，就算響雪櫃拎出黎食都無跌walt，
可能呢隻野o既賣點就係脆，雪完後都仲係脆，
其他例如繽紛樂、kitkat、金莎果d放入雪櫃後，
都變得硬過左龍，無左應有o既鬆軟口感。

米睇佢嘉頓呢個品牌就覺得價錢唔會貴得去邊，
其實1盒都要26蚊，貴過1包16粒裝繽紛落，
之前買無留意銀碼，都係睇牌子以為平o既錯覺，
嘉頓的確係有隻朱古力手指餅平得黎份量多，
不過可惜果隻味度麻麻好快食厭啦。

上星期見同事話個新包好好食，lunch仲叫呢個外賣，
咁我今日都要試下，新包好似有3個，1個芝士安格斯，
1個洋蔥圈安格斯，仲有1個唔知乜野安格斯，
其實芝士安格斯都幾吸引，只係衰在有pat茄汁扣晒分，
咁就叫左個洋蔥圈安格斯黎食，睇燈箱廣告圖片，
個洋蔥圈金黃色好靚，實物就炸o農左咁深朱古力色，
而且舊野太厚，唔知係咪我口細撐到最大都高唔過舊包，
味道無想像中咁好食，無乜驚喜亦無乜驚嚇，
洋蔥圈同牛柳唔算好夾，蔥圈上有類似巨無霸隻黃色汁，
巨無霸同以前o既至尊漢堡都比呢個洋蔥圈安格斯好味。

專登加大為左包shake shake粉，呢次有TABASCO味o既粉，
TABASCO係著名辣椒醬品牌，又稱辣椒仔，其實我無食過，
因為我用開辣椒油唔多buy辣椒醬，咁今次就試下咩味，
倒完包粉shake完出黎o既薯條色澤好似卡樂B熱浪薯片咁，
可惜食落辣得黎酸酸地，唔似熱浪，結論係唔落好過落，
如果係熱浪果隻味就好啦。

同期仲有個辣朱古力新地，1睇就知係伏啦，
排隊見個細路都同佢個friend講：「試過啦，唔好食」
我心諗，唔洗試都知啦。