呢次重點講下ipad pro枝筆，係apple pencil，
不過叫apple pen講起黎順口好多 XD
(之前日本大叔pico太郎都有首歌叫apple pen)

我嫌枝筆身太幼，渣起黎姆指指甲會吉住食指，
而且無夾(攝衫袋果d)所以放檯面會碌黎碌去，
不過如果檯面係絕對水平o既話枝筆唔會碌落地，
因為枝筆有重心，最多碌兩圈就會停，
而且金屬位個商標1定係向上，係廠商o既設計。

聽落好似幾安全，但你唔比唔小心推到枝筆？
又或者個檯面唔係純水平，枝筆都係會碌落地，
要解決以上兩個問題(筆幹幼and怕碌落地)
其實去文具舖買個筆套就得，套響渣筆位果d呢，
通常軟膠做，10蚊幾個，1黎整厚身枝筆好渣d，
2黎d筆套通常起角，咁就唔容易碌黎碌去，
就算跌落地只要唔係筆尖或筆頂落先都可以御力。
(睇番文具舖張單叫呢舊野做駁筆膠)

筆頂並無刷膠功能，只係拆開個蓋比你叉電，
雖然有人話美中不足，其實下下刷野要掉轉枝筆，
都幾麻煩下，我覺得美中不足o既係筆身無掣，
如果好似wacom咁整多兩粒掣比人移動畫版又好，
cap顏色又好，最好自由set，作畫上黎方便好多。

叉電方面亦有d麻煩，佢唔似surface果枝咁，
入粒電比你用大半年，apple pen叉滿電o既話，
大約畫6個鐘又要再叉，其實對我黎講都夠用，
but對長期畫畫o既職人黎講就未必夠，
ipad pro仲可以長插電線無限電咁畫，
枝筆唔係唔得，但必定比條線阻q住晒囉，
其實解決方案係買夠兩枝輪住黎用 XD

之前話過ipadpro最大缺點係為用用下無反應10秒，
長期持續繪圖平均1個鐘會出現5次呢種咁o既情況，
咩野更新功能off晒熄埋wifi都係解決唔到，
只係剩番update個ios呢個未試，覺得係先天缺陷，
而且ios更新內容都唔覺有list到呢個問題，
都唔抱太大期望會修正番，就試下update個ios啦，
咁就由ios11.1(定11.01)update到ios11.2。

跟住試長時間繪畫6個鐘頭都無出現果種無反應，
咦？真係關ios事！到目前為止果種情況無再出現！
咁用ipadpro畫畫真係接近完美！都係接近啦，
距離響紙畫畫o既質感仍然爭少少，但我已經收貨。

當初係因為女主角o既人設吸引我睇呢套作品，
呢種冷傲有實力o既女仔係我最鐘意果type，
其實幾有《果然我的青春戀愛喜劇錯了》既視感，
女主堀北鈴音氣場似雪之下雪乃亦係黑直長，
男主綾小路果種死魚眼亦似果套男主(唔記得咩名)
不過睇落就知呢套男主唔係剩係識吐糟o既路人，
而係深藏不露o既高手，開頭係連觀眾都o厄埋，
通常主角不外乎1開始好廢慢慢變勁，
唔係就係1開始好勁慢慢變廢(浪客劍心咁)
呢套主角就係1開始最勁但遲遲都唔肯出手，
唔係睇到第2話同學生會長(鈴音個亞哥)過招，
綾小路鬆容不迫咁避開晒所有攻擊，
跟住會長仲話佢係全部科目50分考入學，
(好似仲難過全部考滿分)先知原來咁猛料。

正因為綾小路有超實力所以期待佢開掛，
好可惜睇到12話(唔計會長過招)只係開左兩次掛，
1次係第5定6話引導鈴音裝假閉露電視，
然後就到最尾果集野外定向比賽扭轉局勢，
進度都算慢，仲以為起碼由D班升到B班，
點知睇晒全套都係原地踏步無升過。
綾小路唔知因咩原因長期都收收埋埋唔肯出招，
話佢想過d平凡日子呢，但最尾果話佢o既心聲又唔似，
佢話過最後勝利會係屬於佢。

鈴音雖然睇落好勁但其實無乜表現，
而且比綾小路捏腰果刻已經破壞左型像XD
然後12話亦要向綾小路發嬌，面紅低聲下氣講多謝，
可惜o既係綾小路根本無當佢係同伴只當佢係棋子，
唔知日後發展會唔會有改變呢。

老實講，尾集綾小路無講果句心聲o既話，
整體上都會睇得舒服d。

凡係校園劇中間總要整1集主角群戲水玩樂，
呢套第7話亦係咁，但第7話亦係最無聊，
咩野為左暗中阻止同班男同學響女更衣室偷拍而出動，
咁先可以引到兩個冷淡o既男女主角參與活動。

入伙新居都3年幾(根據日誌寫係2014年5月入伙)
都未試過邀請朋友黎，尋晚11點蔡pen話出黎飲糖水，
係呀，尋晚呀，禮拜4，正常聽朝仲要番工，
不過我星期5拎左假唔係實唔會咁夜仲同佢癲 XD
出去太子間糖水舖坐左陣，我唔飲糖水只係陪坐，
然後回程坐地鐵都唔經藍田，蔡pen就響我個站落，
話我住左新居咁耐都未黎過就上黎坐陣，
其實我都未執屋亦無準備咩招呼佢，都照黎啦。

上到黎亦無打機，只係拎d日文課本比佢睇下，
用膠VR鏡框插落iphone開DMM比佢體驗下VR3上悠亞，
咁就零晨兩點幾啦(所以呢篇日誌寫響星期5)
佢聽朝仲要番工，所以唔會hea得耐，
送佢落樓，1行出大路就有的士，佢答的番歸，
我呢邊答番佢屋企應該可以唔過50蚊掛？

題外話，上星期同蔡pen傾電話都得知佢溝到新女，
就係深夜傾傾下佢有電話入，邊個會呢d鐘數打黎呀？
佢話佢條女，原來係咁，佢咁o既條件有女唔奇丫，
佢行黎我新居果陣佢條女都打比佢係咁問長問短，
我聽到佢都浪費唔少力氣先可以收到條女線咁樣，
係咁解釋「上個frined屋企」、「1陣炸好快番」，
其實有女朋友都幾煩，無晒私人空間。

無玩MHF半年有多啦，MHFG都升左做MHFZ，
如我所料我接管o既獵團亦解散左啦，
早排唔記得響facebook定巴哈無意見到廣告，
秘傳珠可以直接課金買，期間限定優惠1粒300P，
平均港幣80蚊1粒，就咁睇都可接受範圍內，
但整1套出到最高秘傳技o既真秘傳要20粒，
我本身有5粒，都仲要買15粒先夠，
起碼都要80x15=1200蚊，咁都唔係問題，
問題係真秘傳仲有分剛擊、1閃等4個分支，
要整邊個技o既真秘傳珠都係1門學問，
整錯左就蛋痛，要諗定全套裝出d咩技能，
我d裝係行真3閃3，衣家要換做剛擊，
幾乎全部珠要重新壓過，見個活動去到14號，
都係等我考慮清楚先再決定買唔買，
話晒都退坑咁耐，唔係太想再投資咁多落去。

上個禮拜埋版期，連續兩晚都零晨先番屋企，
無乜時間去理會秘傳珠呢d事，前日打算買，
買定d料，遲d先再諗整邊粒真秘傳都得姐，
睇真d，原來個300P優惠期已經過左，
衣家要500P，頂！原來我誤會左！
我以為係300P特價係到14號，
平時係長期有得買但要500P，
實情係秘傳珠500P到14號就下架！
搞錯呀，都係賣到14號姐點解個優惠唔做到底？
只係爭果幾日都要玩飢餓行銷？

1粒500P就買唔落手啦，即係港幣百3蚊粒，
買15粒差唔多要2000蚊！算啦，呢期缺錢，
果斷放棄，15粒就唔啦，係咁耳買4粒啦，
起碼整到1粒真秘傳又唔阻到我發動秘傳技穿凰，
亦當係小課支持下台卡營運啦。

近日觀察MHF生態，人流同半年前分別唔大，
睇下廣場d人裝備技能，哇，秘傳剛5閃3仲要14技！
真係幾屈機，仲要好多新技都唔知咩功能，
例如纏雷、巧擊、不退之勢、消費特效，
呢d技好多1個技包含幾個傳統技能，
即係14技分分鐘等如廿幾技，如無意外，
衣家實裝左改外觀系統，唔再煩惱實用得黎好唔好睇，
砌技更自由，水桶粒頭都可以換晒做華麗晚裝。

仲有40幾日MHW就推出，MHF可能會冷清1段時間，
d人走晒去打MHW，睇慣左MHW果d畫面質素o既話，
要番番去玩MHF應該都幾難接受到，
變相MHF可能面臨退坑大危機。