從上個月農歷新年假開始留鬚留到衣家，
係留下爬o既鬚，唔係嘴唇上面o既2撇雞，
留左都有1個月，都係實驗性質，
老實講，我覺得我留呢執鬚都幾順眼，
夾得到o既，唔似得某舊同事個老公咁，
佢個樣極唔適合留鬚，有煎巴佢o既衝動，
雖然我留鬚唔肉酸，但唔留會更靚仔 XD
始終d鬚近睇都係好似野草咁雜亂無章，
所以我打算留到今個月尾就剃左佢。

以前都有留過呢執鬚，但無呢次留咁耐，
仲有上個月先換鬚跑，仲好封利先敢留，
起碼要剃都唔會太麻煩，d鬚留咁長，
要剃果陣電鬚跑頓d都應該幾辛苦下。

趁遲收工去到大家樂無咁多人，多位坐，
就叫個麻煩d但1直都想試下食o既1人邊爐，
我叫果個係最平o既豬肉邊爐50幾蚊，
明明只係執d配料唔洗煮都要我等number。

好啦，出去行左轉番黎交飛拎野食，
拎埋位都仲未食得，要個亞姐拎個爐比我，
仲要佢點火，我仲諗係咪要我自己拎爐，
見牆邊位都有爐拎，但拎番黎都無火啦，
我又唔食煙無火機o既，唔知火機點唔點得著？
佢仲會跟埋個金屬蓋比你食完衾熄d火，
個爐認真豆泥，想再點番著個爐又要叫職員？

跟住就等佢滾，響滾之前去自助餐具位，
拎個碗仔裝d醬油，佢比左兩對木快子比我，
應該係1對用黎夾d生肉掉落個鍋度，
1對用黎食，但兩對都木快子咪好易搞亂？
所以我就拎多把鐵叉過黎，另外拎多個吉碗。

個邊爐除左主打o既豬肉片外，仲有菜啦、
烏冬啦、炸魚皮幾塊、肉丸兩粒、餃子1隻、
唔知乜菇幾條、兩片密瓜、粟米1小片，
仲有1個好似用素生根外皮包住o既唔知乜野，
咬1細口見入面又有磨菇，好在無大啖咬落去，
入面仲有d菜同埋粉絲，個湯底都仲有d菜，
同埋豆腐，我諗緊可唔可以唔加水食到尾，
係唔得o既，滾幾round就唔夠水滾埋餘下o既，
又要我出去自助餐具位拎壺水煲過黎加水。

今日著白衫1時醒唔起打邊爐都係會彈野，
d汁彈到件衫1點點奶晒野，試完個邊爐，
如我所料，係好煩，但又幾好食o既，
同埋起碼要霸兩個位，起碼仲要擺個煲蓋，
人多果陣真係唔好叫呢個啦。

經歷幾代3DS版芒亨，本家作終於回歸番Sony懷抱，
出響PS4畫面質素總算追番上現今應有o既水準，
之前起格無乜質感o既3DS畫質簡直有辱本家名義。

懶得出旺角今次我買數位版，就咁落樓下OK便利店，
買張500蚊PSN卡儲值買中文版deluxe edition498蚊，
有1套武士盔甲外觀、幾個奇怪動作、奇怪髮型，
總之d野唔係太有用，套武士甲頭同身都勁肉酸。

星期4晚踏正12點就可以下載，26號零晨就入game玩，
聽講偷跑o既已經玩緊，算啦爭得幾遠？唔洗番工咩？
facebook有人聲稱星期5已射波黎玩，我就如常番工，
26號零晨只係係咁耳創角做第1個quest就訓教，
今集創角好細緻，連眼睛大細上下左右位都有得調，
剩係人樣都可以花你兩粒鐘，但係就算砌到幾靚都好，
入到game都係會顏藝崩壞 XD

星期5放工番黎打到HR2，有間中留意下PSN好友名單，
唔見蔡pen有上線，最近佢有女朋友，無以前咁熱心掛？
今朝11點幾先起身，點知蔡pen就話佢打到HR8，
洗唔洗咁快呀？不過佢都係要溫女，都唔可以陪我打，
夜晚先搵到佢連線打1舖，只係單純試下點樣連線打姐，
佢話佢條女響佢屋企，咁就唔方便打機啦，下次先啦。

呢次芒亨又係無蔡pen帶協，自己打進度好慢，
整下d裝升下d防增加容錯率，今集d裝只要1個部位，
就直接發動到技能，砌裝可以更加自由配答，
我就整左個土砂龍手(跑者)、搔鳥身(耐力速回)、
搔鳥腳(見切)其他都係1開始就有o既原型裝，
暫時覺得呢個配套幾實用，仲有個合金腳有高磨，
初期武器斬尾唔多夠高磨應該幾重要但係防低d。

呢集d地型複雜好多，或者我無玩MH4定MHXX，
唔多慣d複雜地型，玩開都係平地同隻怪摶鬥，
邊會響斜路1邊扇住咁sir落去1邊打怪？
仲有水位浸過半身，搞到睇唔到自己做乜動作，
遮住晒無辦法推算落刀位之餘仲行動變緩慢，
但採集方面似乎方便左，唔洗再帶鋤、捕蟲網等，
收集動作仲快左，見到有蟲就咁用手收起，
見到蜂巢都係用手撥1撥就收埋唔洗挖兩野，
亦唔再有d鋤頭爛蟲網穿o既事情發生，
唔洗帶調合書成功率都100%，仲有得自動調合，
唔洗再打開道具欄揀黎揀去，執到藥草直接變回復藥，
除非回復藥滿10枝，藥草先會落到你袋但唔食得。

經過早前勒索病毒恐慌1役後都經常保持window更新，
今日公司電腦亦如常更新開機後，1開ie多左新功能，
其實個功能未試過，只係出現新功能介紹畫面，
就係話手機可以同電腦連動，手機睇緊個網頁，
可以彈到用電腦繼續睇，當然手機要裝指定apps啦，
車，仲以為好似mac機同iphone連動咁，
手機可以send file去電腦果隻。

跟住開個資料夾，咦，有d違和感，再click個文件，
就發現無左右邊個詳細資料窗格，要自己set番出黎，
(頂果度檢視>左邊o既窗格>詳細資料窗格)
平時靠睇修改日期黎確認邊個先係最update果個，
唔想下下都要right click再內容咁麻煩丫嘛。

跟住開個圖片，居然問我用咩程式黎開，
又要我set番用Window相片撿視器黎開。

跟住上google seatch d野，打字點解打極都出唔到？
原來個輸入法係速成，我用開倉頡幾時變左速成？

喂，大佬呀，你update還update丫，做乜改我d設定？
搞到用起黎勁唔順手，又要晒時間set番用開o既設定，
用左陣暫時係以上3個setting比人改左，
用落唔知會唔會發現仲有其他野比人改。

而下方個工作列就多左個信封咁o既icon，
相信係用黎睇email，仲有小畫家變左新果隻3D版，
我平時習慣printscreen左d相用小畫家paste，
再save個bmp檔，新版唔知仲用唔用得番呢個方法，
未試住，不過公司電腦就算用唔番都唔緊要，
因為仲有photoshop，但係屋企部電腦無photoshop，
如果無左小畫家print完screen都唔知用咩黎save。

都話左update通常都無好野，只係越搞越煩，
呢d亦係我唔鐘意update軟件o既原因之1。

之前響fxzone電台版有位叫粵韻流聲o既人上傳商台節目，
不過佢話2018年唔再上傳，都無計，免費o既野，老奉咩？
衣家唔係無人上傳，只係d節目無咁齊同埋無咁快，
今朝o既節目要聽日先有，好似在晴朗的1天出發果d，
只能聽尋日果集，聖艾笠忌廉夜烤果d就無上傳。

所以想聽得update d只能加入903付費會員，
我比180蚊半年標清節目重溫，高清就半年210蚊，
聽到就得啦高乜野清丫？佢有段demo比你試聲，
根本無乜大分別，會買高清我只諗到1個原因，
就係錄佢d派台作唔洗買CD，不過我聽開日文歌，
903果d本地流行曲唔多o岩我胃口。

要買佢付費會員只接受信用卡過數，我好憎呢個途徑，
如果多幾個途徑比我揀我寧願揀自動櫃員機轉帳、
甚至買Mycard儲值我都唔想用信用卡，可惜無得揀。

入晒信用卡號碼到期日期果d之後仲要過多關通訊鎖，
嚴格黎講係叫OTP，佢會send個6位數字去我電話，
要1分鐘內入晒d數字先比過數，入唔切又要ran過第組，
明明之前用信用卡買野都唔洗咁架？

付完費後應該幾分鐘左右login到入903個網就用得，
881、903d節目都可隨便重溫番，but只係響網上聽，
我暫時唔多覺有得下載。