隻手遊出左好耐，玩音game為主，最近加入AR功能，
本來對隻game無乜興趣，想試個AR所以裝黎玩下。

遊戲開始會要你從3個女仔揀1個黎做主角(?)
諗都唔洗諗我必定揀sibuya rin！im@s咁多女角，
我最鐘意係sibuya rin，之前佢做主角o既動畫版，
我都想睇，明明我對im@s唔熟悉又無玩過系列作品，
單純只係1個女角係我杯茶就想中個頭埋去，
只係當時搵唔到播放平台或邊度download所以無睇，
又拆遠左，講番隻game，揀完女角後仲有1堆教學，
教你點玩佢個音game同埋講解遊戲系統，
搞完1輪入到去主畫面，每揀1個選項都仲有1堆解說，
族個族個選項試晒好不容易先搵到邊度開個AR出黎，
就係下面菜單o既idol入去再揀producer note，
然後揀個女仔再揀photo studio之後再揀AR乜乜乜，
以上英文係日文拼音譯出黎(隻game應該無英文版掛)

而呢個AR auto mode功能相當強勁，無須AR marker，
可能係用衛星定位功能(?)有別於以前玩過o既AR game，
只能認AR卡，鏡頭1移開張AR卡就無左件野咁，
而且物件大細視乎AR卡大細，想件野大d亦好難就位，
呢個AR auto mode係隨便響個地下揀個位置，
個idol就會接近1比1等身大細企響果個位，
而且即使你鏡頭移開佢，佢都係乖乖企響原位，
只要鏡頭再移番番去可以無縫接軌見番佢，
真係好似有個人企響果度咁，而且由於唔洗認卡關係，
可以將鏡頭貼近佢塊面佢都唔會消失，當然唔可以太近，
太近都係會無左，唔通比你行穿過佢睇佢d內臟咩？
能夠同偶像近距離接觸真係完左唔少producer心願，
不過AR人物係畫面最頂層layer，即係無野遮到佢，
只要有人響idol面前行過都係變左響佢身後，
錯晒透視產生違和感，你將佢放響房間然後行出廳，
會發生隔住牆都見到佢仲凌空企響度o既靈異現象 XD
所以想投入享受2次元接觸就要就1就位置同加d想像力。

響屋企認位好似有d困難唔知係咪空間太細？
好難將個idol放響地下，經常放左響半空超奇怪，
要多次嘗試先可以將idol正常咁放響地下，
但係落街響廣闊o既地方試就好容易定到位。

雖然AR功能強勁但仍要隔住部電話係美中不足o既地方，
如果呢個功能再支援埋VR，咁就真係突破次元壁，
你可以同偶像處於同1個空間咁，睇佢企你面前跳舞，
咁就完美啦！技術上應該唔難丫？如果再絕d，
konami用呢種技術出心跳回憶，將女友放響自已屋企，
哇！真係人類絕育計劃啦！完全唔敢想像 XDD
目前konami都有隻偶像game支援VR，但我未玩。

好耐都未有呢種1聽鐘情o既感覺，
響903毒檸王國動漫wednesday聽到，
呢集係講銀魂，就播呢首op，
好好聽，全首歌無冷場，
就算1向好o岩我口味o既fripside，
佢d歌都好少由頭high到落尾，
而pray呢首野o既高潮位，
果種特別唱法響中文流行曲搵唔到。

播完首野主持話係Tommy heavenly6唱，
咩黎架？後來再響水管search銀魂op，
原來唱果個係brilliant green川瀨智子，
佢除左brilliant greent外仲有其他樂隊，
我讀書時期就有聽川瀨智子d歌啦。

我無睇開銀魂動畫版所以係第1次聽，
不過我懷疑其實我係聽過呢首歌，
可能係行過信和o既動漫店播過，
或者聽作業用BGM動漫歌大集合時聽過，
所以都有少少似曾相識但又唔肯定。

其實呢首作為神經病作品主題曲有d唔夾，
雖然曲風係幾開朗，但唔夠痴線，
應該要d浮誇o既旋律同癲喪o既唱腔，
先配合番銀魂o既style丫嘛 XD

唔係天野幻境(佢個網址係rovid)而係vroid，
乜野黎？係由pixiv(繪圖交流網)開發o既，
創作3D角色模組o既免費軟件(試用版)
係類似玩game(黑沙、MHW)自創角色咁製作，
選擇臉型、眼耳口鼻型狀大細高低咁，
髮型仲比你自由拉出黎，咩髮型都整到，
人物基本模組已經好好睇，只要唔整d怪野，
應該好容易整到個幾順眼o既3D少女出黎，
相比另1廠商出o既3D定製少女vroid靚好多，
不過免費野當然唔會咁著數，呢隻野限制多多，
就目前網絡搵到o既圖片同影片得知，
只能夠整女仔無得整男仔，而且得1件校服，
雖然件衫可以自由填色換texture，
但個模組都係無得改變，條裙變唔到長褲，
亦無得調較高矮肥瘦等身型，所以其實無乜用。

目前呢隻試用版我連download都懶得down，
如果佢出隻正式版要收錢但可以選擇男女，
可以換衫可以set唔同身型o既話，我buy，
只要價錢唔太貴(唔過港幣500蚊買得斷)
我都想買番隻，我諗衣服可能要另外買，
衣服涉及太多變數唔同set眼耳口鼻咁簡單，
又或者可以引入版權動漫角色衣服，
都係1條商機，到時應該好多人整d動漫角色，
然後用MMD黎個小劇場，都米話唔過癮。

講開又講，都有網站放好多3D動漫角色模組，
可用MMD讀入，小劇場呢d野唔洗vroid都整到。

咁o岩呢期古天樂有首新歌叫做今期流行，
咁就拎呢首歌名黎做標題啦。

延希攻略
我都唔睇電視好多年，我係無睇呢套野，
只知道呢期好hit，公司d同事又睇，
上facebook亦見好多人貼相關訊息，
連聲稱多人做自己就唔會做o既ter姐都睇，
不過d人都應該唔係追睇無線播果個版本，
而係1早上網(愛奇藝果d?)睇晒咁多集，
飾演奸角o既演員仲比人鬧到封社交媒體，
d觀眾投入到痴線，拍劇同現實都分唔清？
又有人分享響延希攻略緊皇帝o既同時，
美國紐約交易所NYSE已經創立。

劉明偉金句
之前有人話過1年去少幾次日本就可以買樓，
不過我都無留意係邊果講，最近講呢句野o既人，
又多句10歲收10萬蚊利士無用到日日數銀紙，
先知原來兩句語出驚人都係出自同1個人，
佢就係千億富商劉X(太複雜唔識寫)雄個仔，
網上有人回應比個玩簡易模式o既人教你攻略，
難聽過粗口之類，而TAMAGO日文學校仲靚抽，
拍左條用日文數10萬日圓o既片(10張1萬紙幣)
其實大家又洗乜咁在意亞劉生呢d金句丫？
擺明就係勝利宣言，你地越鬧佢越心涼。

1邊開車1邊跳舞
呢個就外國流行香港唔見有人咁玩，
就係由車廂打開車門行出車外跳舞，
同時架車亦慢駛緊，1邊跟住架車1邊跳舞，
好多外國人模仿呢種玩法，好似幾過癮咁，
仲有空姐玩飛機版，落機跟住架飛機跳舞，
而大6果邊好似亦有特別o既跳舞玩法，
就係兩個人1齊1邊踢腳咁跳舞1邊上樓梯，
兩人動作要1致先好睇。

上個禮拜先轉，本來應該上個禮拜寫呢篇野，
不過上星期3無聽到早霸王所以唔知有無改動，
所以今個禮拜聽晒有無變動先黎寫。

星期1：之前係min monday，衣家變左你唔係人。
星期2：仍然係霸王知己，只係形式變左小小。
星期3：仍然係霸王領隊無變。
星期4：之前係吹牛井底蛙，衣家變左霸王KOL。
星期5：仍然係你知道唔知道有人掛住你。
星期1至5：cut左溫神響邊度(亞傑遊公園)
識貨之人就改左小小，大致相同。

先講min monday，呢part我覺得係咁多樣最好聽，
只係好短，有時森美小兒講完d聽眾都無機會打黎，
衣家轉左其實都係分享d過份、唔順眼o既事，
所以都應該幾好聽。

霸王知己轉形式應該轉左1兩個月都有，
之前係播預先錄定o既嘉賓聲帶，
衣家就請嘉賓上黎講，通常係就快開演唱會果d，
算係幫佢免費宣傳，亦有關於該演唱會大量訊息，
但如果對果個歌手無乜興趣黎講都幾無聊，
之後都1樣心理測驗睇下森小估唔估到嘉賓簡乜。

霸王KOL就專門探討1d奇怪字眼o既出處，
聲稱個字唔知點黎，就搵左兩3個疑似答案，
再投票邊個似d，就認為果個最正確，
最炸下，佢無話1定o岩，你可以唔認同，
第1集就講「咸濕」點解叫咸濕，
印象中以前中國文學亞sir有講過來源，
係「含有色」諧音，佢仲有講埋「淫盪」添，
「淫」係過份咁o既意思，即係過份地盪囉，
不過第1集森小搜集番黎o既兩個解法，
都無「含有色」呢個答案，第2集就講「烏龍」。
anyway，我覺得呢個比吹牛井底蛙好，
起碼唔會聽埋d無聊o既假故事當左真實個案，
有時聽完都唔記得邊個堅邊個流料混淆左，
港台個風騷快活人個猜猜我是誰都係1樣。

跟住其他環節無乜變動唔講啦，仲有個大變動，
就係西瓜唔知係走左定係比人炒左，
但識貨之人有個叫望呢o既人，無論聲線同態度，
都同西瓜90%相似，講開西瓜，佢都好慘下，
1直聽佢比森美欺負，就好似打工仔比上司欺壓咁，
好多人番工都受唔少呢d氣，連聽節目都要受？
其實聽到西瓜比森美欺負都唔多舒服，
西瓜鬼隱前森美仲經常話炒左佢，以為講笑，
可能真係因為咁就炒左。