今日係星期四，我六點幾出左去約左呀Jack攪D野，不過出到去佢屋企有D事結果都冇攪到，今日又同呀媽講左大話，不過呢D大話冇傷大雅無咩所謂啦。之後去左觀塘APM個間吉之島行左間買左個麵食，唔好食既><…。番到去今日去左北角整保護貼同去電話鋪問姐姐Samsung部機，我可能又換新機啦，不過都係可能媽咪補錢我買，媽咪其實都幫我好多野架啦，我都好認真搵野做，上環個到又搵唔到幾多錢，不過真係難左好多，總之我會努力既！

又係春天來臨既時候，我覺得呢D日子總係比人有一種好憂鬱既感覺，今日係星期三係開咪既日子，準備既前一晚其實我都唔係好諗到野，夾硬都寫左D野講，不過唔緊要丫，夜晚開完咪我都番左屋企食飯，今晚又食梅子排骨，呢排呢樣野真係令我胃口大開架！最近成日都上三國殺到練，D人物真係要慢慢熟練先得啦！

最近我又係到密忙咁織緊頸巾送比人，我又想織番一條粉藍色既比自己，睇黎我都要著緊D啦。最近發生左好多事，11號係彩虹有麻雀比賽，輸左二位，之後又有三國殺既聚會，我都學識左好多野，玩三國殺個日約左整衫既Candy整件斗篷，之後到情人節個日約左呀成佢出黎食飯仲送左一隻熊仔同一個手織花籃比我，其實我都唔知開心好定係肉痛佢好，我其實唔係咁想佢送呢D野比我，我想佢送支香水比我，不過我始終都冇出聲，因為我唔敢向一個我唔係真正愛既人問我買野比我，對住呀成有時候我都唔知應唔應該去愛，但係最重要既問題係我真正愛既我覺得唔係佢，我地個晚去左意粉屋食飯，不過出左去尖沙咀成兩個鐘左右佢先到，有D唔開心，食左之後去左搵Kelvin哥哥，同佢傾計傾開鍾柏霖，鍾柏霖原來想同Kelvin一齊訓，我有點兒呆左架，不過唔緊要啦，反正我而家同Kelvin哥哥既關係都好曖昧，感情事我都遇過，我都未曾試過可以愛但唔想愛既經歷，不過我唔明既係，乜佢唔知我唔係太愛佢既咩？佢亦都有同我講，拍拖都係一種名份，有冇拍都冇咩所謂，大家係埋一齊都係最緊要開心姐，佢講完呢句之後我就已經將問題放低唔諗，但係最近睇番D舊日記，我點解會唔捨得王子同鬧鐘，我點會記起同佢兩個上床既回憶既...？

真係好少可，可能天氣凍掛，呢排又懶左打日記，隻手都凍到實曬咁，而家隻手其實係好冰凍架，不過唔緊要丫，最近我比一個叫呀成既男仔鐘意左，但係好奇怪，我種感覺係可以愛但唔想愛，有時候呢D情況我都唔識答自己，最近都係咁比呢類型既男仔煩住咁，好彩我住得夠入，我住柴灣，都係決定成個禮拜留係柴灣或者香港島算啦，真正既安全島。。

有時我都好多時回想起過往同而家既自己，以前既自己係好天真好傻既，經過無情時間既洗禮，變成一個外表堅強內心脆弱既年青人。新年快樂呀！祝大家龍年龍馬精神、身體健康、順順利利、開開心心！其實今年個新年都有好多願望，希望我自己可以再次踏上戀愛之路，我同自己D朋友都係咁講，我係好想拍，不過都要雙方願意，但係問題係呢個世界唔係人揀你就你揀人，鐘意我個D，我跟本對佢地冇感覺，然而我唔希望同個我唔鐘意既人去做人世同拍拖，我自己都唔會過得開心啦！最近我見到王子同佢個個去旅行，我竟然睇到無唔開心好平靜，唔通我真係放低左佢？

又係一路聽歌一路寫日記既時候，有時我覺得D歌都幾恐怖，「年度之歌」寫低左好多歌手既心聲，但係憑一首作品打入到大家心入面真係唔係容易既事，一入夜好自然地會感覺到寂寞，但係呢D感覺又係天生定係邊個比自己既呢？我想知…！

呢幾日自己都掛住做星期三民台開咪既野，星期日就同婆婆去左食團年飯，去左金滿庭食，都幾好食架，大家都可以去試下！之後星期一，二都好瘋狂地搵番謝安琪既舊碟，我既病態又番黎-.-….

是日就係謝安琪你們的幸福演唱會既尾場啦，我自己覺得幸福真係唔係必然，對於我同王子去睇既呢場演唱會，我的確係有D唔開心，因為佢一路睇都一路咁住電話，又一路掛住同佢個位唔知咩關係既人攪生日，我都有點兒無奈，但係我又點可能出聲話佢丫。講番今次演唱會，舞台設計好簡單，又顯出特別，好有意思既高樓大廈。以高樓大廈既舞台設計黎比如叫反省既意義！開頭既歌已經開始想喊，以一首好難演繹同好有爆炸性既作品「活著」黎打頭陣，我地平時既生活節奏咁快，有冇真正諗過我地幹而不活，算係D咩既活著？我地又有冇計過，日日咁忙咁奔波勞碌，到底錯失左幾多美好既野呢？但其實呢個世界仲有D特別既野值得，我地去細味！呀Kay出場既衫都好靚，值得一讚架！當活著過後，感動既位竟然係我從來未黎過既感動「藝妓回憶錄」－藝術同音樂，其實真係冇分男或女，無論係咩地方，呢兩樣野係唔會因為別人既說話而破壞，而我…兩樣我都喜愛…

今日全日去左整負離子，近排將唔好既心情都投射左係食物同唱歌上面，所謂化悲憤為食量！我真係受傷到冇得再傷，唔通我而家連鍾柏霖都會唔搵？整完頭之後去左彩虹搵Mary食野，點知咁岩就撞到Eugene，Mary就叫左我同Eugene落元氣等位先，我同Eugene好耐無傾，點知越傾就越多野，攪到我都唔知信邊個，我仲要用好多好多既大話去掩蓋住我同鍾柏霖既關係，有必要咩？

仲記得2011年既時候，睇左一套叫「那些年，我們一起追的女孩」，個陣我好記得係首映之後個日黎既，咁岩有免費Ticket，我就去同朋友睇，個人黎講，我覺得唔係個個都岩睇，對我自己黎講就好難忘，入面有好多情節我都好感動，電影主題曲都會更加令我留意演繹個位歌手，佢係胡夏，唱個首那些年街知巷聞，不過我就鐘意佢自己第一隻專輯入面既作品，例如：愛夏、愛都是對的、數到三不哭，完全發揮到胡夏本身清新獨有既聲線出黎架！

【胡夏－那些年、愛夏】