正當我諗緊今日日記寫咩既時候，打邊爐既時候同我媽咪講起末日，而且講起我一位中學同學閎故友伯伯，四年前既最後既晚餐，佢地就移民番日本福島，不過奈良伯伯係最後既晚餐食之前都提到帶我日本旅行既生活體驗，真係好難忘同開心。仲記得奈良伯伯係日本同中國既混血兒，個陣初次搭步漫天風雪既東北，感覺好特別，無左係香港壓力既感覺，而且有種好清新好貼近大自然既感覺，曾經睇電視節目，入面旁白講左呢句說話：「為吃一生既草，走一輩子既路，營營役役既生活模式之下，有幾多人可以靜落黎，諗諗生活意義既另一面呢？暫別城市，投入一個冰雪既國度，一種新視野，未嘗唔係修補磨蝕心靈既良方，一對雪靴，一顆赤子之心，開展左一段漫天風雪既生活體驗，用心細味呢一切既人、事同物，一生人總希望有一次咁樣既經歷！」我同奈良伯伯講完之後，二話不說，就叫佢個孫訂機票請我去，體驗生活，呢次生活體驗總共去左六個唔同既地方！
「青森、秋田、岩手、山形、宮城、福島」六個縣
去到酒田，體驗到我既第一次拓米，原來以前呀信的故事，呀信都係一樣咁辛苦。之後黎既地方，去到藏王溫泉區，一踏入山形銀山溫泉鄉，覺得雪境好靚，黎到藏王溫泉，都係一樣咁靚，係銀白色既世界裡面，冰雪原來可以有好多既變化，從來都無諗過呀！D人成日都話白色聖誕好浪漫，我而家就認為只要係落緊雪既地方，無時無刻都好浪漫啦！繼續去藏王高原搵樹冰嚕，上到睇樹冰先發覺唔易，如果唔係奈良伯伯個孫一直陪住我，我諗我都支持唔到，仲有原來睇樹冰都唔容易，睇樹冰唔只用對眼睇去睇，仲要係適當既時候先可以睇到，一場風雪，將佢地蓋住左就咩都睇唔到，但係忽然間又會天朗氣清，你又會發現你身邊周圍都係樹冰，但係呢D時刻永遠都好短暫，就好似我地做人一樣，要識得好好珍惜同把握機會，如果唔係有幾多好野係自己身邊經過都冇用啦！今日回想，唔通而家既事真係咁重要，要咁執著咩？慢慢睇既事物…值得細味既！去左青森又有另一種既體會，紅色既一個小果實，外表平易近人，咬落去清甜多汁，令我更加珍惜身邊每一個曾經幫過自己既人，希望我都可以成為別人心目中既蘋果，帶比大家幸福既微笑！去到青森既津輕，係奈良伯伯留低最多回憶既一個地方，仲有佢最鐘意既樂器「三味線」，去到酒館，雖然我唔可以飲酒，因為我未夠20歲呀，但係一邊食小食一邊飲綠茶，一邊睇奈良伯伯佢三味線既精彩演出，突然諗起我地中國既粵劇，因為感覺同三味線既風格同曲風都好相似，都係老一輩鐘意既野，覺得好out！不過回想番轉頭，我地又有幾可認認真真聽過粵劇呢？比著我以前係石澳住既時候，暑假實有大戲做，我更加冇認真去睇啦！都未認識就話大家時代唔同，就話唔係自己杯茶，咁out既會唔會係自己呢？我地香港人成日話自己好勤力，做野好有效率，去到外地既時候，總係會嫌人地鋪頭收得早，收錢收得慢。不過黎到東北，周圍既人同事都會提醒我，係咪我地正常地太快呢？令我深刻體驗人生既我諗提到既下一站《中尊寺》，入到到同我地平時係香港係古廟有好大分別，你唔會覺得佢有好攻鼻既上香味道，反正有種好清新既木味道。入到去奈良伯伯既孫仔同我都接受左一個小小既冬日靜修，接受完呢個靜修，我覺得成個人都平靜左好多，內心入面既雜念唔知係咪可以真係得到靜化，但係我真係希望永遠將呢D雜念留低，而將我既快樂記憶帶走。不過…做人又可唔可以咁十全十美呢？
「日出」，一年之中，如果可以見到十個日出，係幸福既事，2007年我係松島睇到我人生最靚既日出，唔知將來個九個日出，我會幾時睇到呢？呢一刻我終於感覺到幸福，遇到左從未見過既美麗，終於明白咩係詩情畫意！
「現代城市人與鄉下人」，生活係繁忙既都市，有幾多人真正係希望體驗生活既呢？諗番係日本寺廟個種清幽既感覺，我覺得日本東北係一個令人快樂既鄉土，生活係個到既人每個都好純樸真摯，佢地對生活既要求，比我地城市人仲要簡單，亦都比我地快樂，我地又何嘗試過要求簡單同快樂呢？

點解？點解一大清早就要比個咁既刺激我？十一點幾起身一開Facebook，就見到王子離開香港中，起完身睇到之後暈左，暈到三點幾，個頭有少少赤痛，佢同我講Busy既時候，正係佢離開香港前一日，佢都唔同我講，唔通我係佢心目中既地位越黎越低？起身之後，我就煲番D水沖涼洗頭，之後去姐姐到換保護貼，之後發現自己冇帶隻手指出街，之後就急急腳去揀聖誕卡，買完之後就去搭番8X番屋企拎手指去開咪。今日開咪主題係講，謝安琪你們的幸福演唱會2012，當中我有好多歌我都希望佢會唱架！開完咪之後就買野番屋企食，途中係文具鋪買左D星星紙摺星星，準備做聖誕禮物嚕！不過始終都係要去到銅鑼灣先買到鬆弛熊既聖誕卡！期待聖誕節及除夕！

【謝安琪－第二個家、少女瑪利亞】

終於開筆寫今日日記啦，由謝安琪既歌陪我開筆其實好開心，一邊寫一邊聽直角等於三角形，一首曲風強勁，歌詞好諷刺既作品，值得我同你地一齊品嘗！講番今日啦，十一點起左身睇GAG姐，爆笑左，約左新識既Derek四點半同佢下午茶，其實今日真係集開心、悲傷、心癢癢於一身，開心既係睇GAG姐既歡笑，之後就係同Derek行街同下午茶，仲要多謝佢請我食下午茶！悲傷既係竟然有人攪過我部I PHONE，入左個隻王子既百幾張相入去，攪到想喊但係喊唔到咁，可能我本身已經愛佢太深，已經跌左落深淵！心癢既係今日見到Derek，我真係好有衝動想飛身埋去攬住佢，抱住佢。之後同媽咪去左北角係潮客，叫左鹽焗雞，炸既椒鹽小黃魚，西芹百合炒牛柳粒，食完就番屋企嚕，不過搭巴士途中睇到而家戴緊呢隻戒指，真係物輕情義重，人生有幾多困難同艱辛真係唔經歷唔知固中原位係邊既，岩岩聽到呀Kay國語專輯其中一首題材幾好既作品，《晚睡早起》，其中歌詞講到「來不及  來不及　就怕  機會要失去　晚睡早起  快人一步卻錯過自己　對不起  對不起　都忘了給身體獎勵　每天  晚睡又早起　你更要多疼自己」「來不及  來不及　就怕  還不夠努力　晚睡早起  贏了世界卻輸了自己　對不起  對不起　都忘了  給自己驚喜　每天  晚睡又早起　你要更多愛自己」
都市人永遠面對既壓力都唔只係晚睡早起既問題，而係包括工作、感情、朋友、家人、金錢，點解人同事只會為大家帶黎壓力？其實大家有冇諗過呢幾種都可以令自己快樂，在乎於自己用咩角度同態度去面對！

【謝安琪－直角等於三角形、晚睡早起、蘭花指】

睇到本日記先發現原來我都已經skip左幾日冇寫日記，今日一定要寫番，其實自六號至十號朝早我都好唔開心，一路係到發自己脾氣，生人勿近咁，直到十號，約左染髮剪頭髮之後，換左而家呢個形象，我覺得自己唔可以再咁失去理智，之後整完頭，就同呀風呀寶仲有小提琴家仲有貓仙打日本麻雀。都有開心事既，一起手鋪牌比國士無雙（十三么）既希望我，我就決定做落去，第七巡入九索聽牌，直擊小提琴家48000點佢飛左！個下我都呆左，打到咁上下，呀寶同佢自己條仔落去買野，之後我想飲咖啡，佢幫我買錯左，原來冷熱既咖啡比人既感覺可以咁大。當我打牌打到中途既時候，王子突然同我講話佢係人地屋企既時候，個下我既心情真係七上八落，又好驚佢係人地屋企唔知做咩，二黎又怕佢係咪同人攪野，但係我突然又諗我又唔係佢邊個做咩諗咁多呢？之後我既心情慢慢放低冷靜左，打完牌都已經成三點幾，貓仙知道我中途打牌既時候發脾氣實有D野發生，所以打完牌我都比貓仙叫左我去翠華食野，貓仙邊食野一邊教左我好多道理，睇愛情就好似揀茶餐廳食野一樣，就用翠華同潮興兩間黎比如，兩間鋪頭都大開中門等你入既，咁我地當然有權選擇，你都可以揀廿蚊雞一碗魚蛋粉既潮興，但同時你入得翠華都係睇你比唔比得起呢個價錢。正如愛情一樣，你選擇得呢個，好自然你要負得起呢個代價同後果，在乎多或少，呢刻有人可以幫我埋單，但當自己一個人既時候，好自然每樣事都要自己去承受同負出代價，真係同打麻雀既道理一樣！星期去左左呀婆屋企，去既時候呀媽竟然覺得我整完頭之後後生左，似十七歲，都唔知係開心定悲傷-___-..，去到呀婆打麻雀，竟然我食出左五、六次十三么，我突然諗緊我發生咩事，打完牌之後食飯，呀婆整既梅子排骨真係好好食呀，我仲食左三、四碗飯。
不過最肉痛都係星期一出街買衫，買左我448蚊，嗚嗚T___T..
唔知點解做咩事最近又迷番上全日聽Kay歌既習慣，今次隨機播，但係電腦編排真係有如神算子：
《愛情預購＞沒有發生的愛情＞愁人節＞節外生枝＞後窗知己＞鍾無艷＞活著＞脆弱＞你們的幸福＞臨崖勒馬＞第一天＞第二天(快樂是…)＞少女瑪利亞＞十字架》
真係有種死去活來既感覺！
P.S. 打打下日記隻腳抽筋-_____-|||

呢幾日天氣真係轉冷左，我前日仲去左旺角買衫呀！不過都幾好，原來生活要自己過得開心自在，真係唔可以搵辛苦比自己咁大壓力！平凡度過。

【方皓玟－Lady Copy】

聽到最近呀Kay既新歌，我又多一件事可以去反省，到底咩野係真正既幸福，冇咩特別野可以記！
【謝安琪－你們的幸福】

今日既我十一點去到上環上堂，上到十二點左右就放食飯既時候，我同呀Wing（一位女同事），就叫埋另外位新同事食飯，點知佢只係識笑，我都唔知可以點同仍佢相處，去到餐廳食飯，佢只係叫左10蚊既鮮油多士，可能係冇錢掛，不過食完之後我地去行左一陣，點知未開始行已經唔見左佢個人，唔通係我唔識同佢溝通相處？之後同呀Wing就邊行，行到Starbucks買左聖誕限定版既保溫杯，之後就用116蚊買左隻杯仲有一杯野飲送tim，番到上去繼續上堂，到四點幾就開始打電話啦！緊張完到五點幾，開始12月玩樂之旅，1月開始正式番工啦！

【謝安琪－鍾無艷】

今日天氣雖然好好，但係每日都係咁過，我仍然唔可以忘記到佢，做咩又會係咁既呢？三點幾左右去到上環見工，聽日就開始培訓啦，見完工我又走左去搭叮叮，番到屋企，食完飯之後又開始我既星星之旅，終於完成啦，我有禮物送比王子啦！

【謝安琪－少女瑪利亞、吳雨霏－我本人，戀愛疲勞】

今日勁早起身，去左佐敦接Mary去打日本麻雀，去左太子打日本牌既牌聚，唉…成日都收唔到王子既留whatsapp，有D擔心佢。打完上半場，Mary陪我買左我最愛既戀愛咖啡，其實飲咖啡之前已經飲左兩支Ice黎灌自己，好想麻醉自己，不過我做唔到。之後Mary同我講：「你而家咁樣你認為值得咩，我唔想見到咁樣既小光囉！」到我諗番轉頭，我比Mary認識既點可能係而家既我！
到六點打完牌去左荷李活商場同屋企人食飯，我依然忘不了個杯戀愛咖啡，又係點解。。

【吳雨霏－戀愛疲勞】

今日係星期六，媽咪好早就去左陪婆婆去旅行嚕，我尋晚成晚都諗左好多野，到底我老豆係咪真係咁討厭我？到底Prince個心係咪真係唔鐘意我？我答唔到，亦都好想知答案，之後八點起左身，坐左係露台唱改造人之戀，之後溫保險溫到三點幾左右，就去左尋晚同Prince經過個間天后古廟，係Facebook打完卡之後，就入去幫心想住既人祈福上香，點知我遇到係石澳做古廟工作既伯伯，我都認唔出佢，佢竟然認得到我，之後連香火都送埋比我去上香，我除左為婆婆同媽咪祈福希望佢地健康工作順利之如，我仲向自己同Prince祈福。上完香之後我就去左搭叮叮，去到西灣河，轉左MTR去搵Mary，個陣出門口既時候，比Mary見到我想喊個個樣，一路行去旺角既時候，Mary話醒左我好多野，之後去左我買日本麻雀間鋪頭，原來而家冇做我個隻款嚕，之後去左旺角行街，途中見到Spooky同Brian個D，有D開心，之後whatsapp Prince，佢話今日放七點半，諗住過去搵下佢既。之後，我陪Mary去左睇女裝衫，唔知點解，好心急咁吹佢，快D去食野，又怕要等好耐，點知去到四季煲仔飯個到真係等左成半粒鐘有多先有位。之後，Prince佢whatsapp黎叫我去金鐘搵佢，初初隻手都好凍，拖住佢之後我就慢慢暖番嚕。之後同Prince行金鐘廊，之後佢就去一去尖沙咀拎野再番金鐘食飯，之後我就同Mary就搭叮叮去左CWB打機啦~!