| «‹ September 2026 ›» | | S | M | T | W | T | F | S | | | 1 | 2 | 3 | 4 | 5 | | 6 | 7 | 8 | 9 | 10 | 11 | 12 | | 13 | 14 | 15 | 16 | 17 | 18 | 19 | | 20 | 21 | 22 | 23 | 24 | 25 | 26 | | 27 | 28 | 29 | 30 | |
|
| 甜得好@海記合桃坊甜品 |
分類: 飲飲食食 |
食完晚飯, 第二個胃開始醒來, 行下行下就黎到呢間糖水舖門口, 黎遠已見門口有人等緊, 好彩等幾張枱就有位
舖面面積唔算大, 要同人親蜜少少咁坐, 甜品選擇都幾多, 冷熱新潮/傳統都有! 見佢標住合桃坊甜品, 一於試下佢碗合桃露($24)
侍應放低後, 好快已聞到合桃既香味, 質感好香滑, 味道唔太甜, 就算食晒一碗都唔會有"漏"既感覺!
友人選擇呢個宇治金時涼粉($32)
份量都幾大碗, 二人分享都夠, 材料包括綠茶雪糕, 紅豆, 小丸子及涼粉, 成個口感包括彈牙, 綿綿, 香滑, 有咬口...........................一個價錢都咁多口感, 抵晒!
呢個賣相咁吸引既係可可奶凍($37) - 奶凍口感幾滑, 但朱古力味唔算太濃, 配雪糕一球(可轉味道), 加埋少少香蕉一齊食都唔錯!
侍應反應夠快, 上食物時間都快, 由於出面門口都繼續有人等緊位, 食完就即刻埋單走人
地址 : 太子西洋菜南街232號
contact me : [email protected]
|
2016 年 3 月 8 日 星期二  |
| 食好呢餐西餐@Amour Garden Grill & Bar |
分類: 飲飲食食 |
朋友介紹呢間樓上西餐廳, 坐落旺角位置好方便, 亦都好易搵, 打開電梯門就見到呢個招牌
原來呢度除左有西餐食外, 仲有得飲酒同掟飛標, 食完野意猶未盡都可以飲下野再傾下計
我地點左個Premium Set Dinner二人餐($338), 包餐湯 (呢客係磨菇湯, 好重菇味, 唔錯!)
沙律二選一, 呢款係麻醬蕃茄沙律 - 蕃茄夠多汁, 但麻醬就略為少左D, 下面既蔬菜未能點到有醬汁
可選2款小食, 我地點左惹味amour肉丸雙重奏及蒜香牛油鷄翼
肉丸味道有少少甜味, 配埋底下滑口薯容一齊食, 一口一粒, 唔錯! 而蒜香牛油鷄翼味道超正, 隻隻熱辣辣, 一上枱已經聞到佢既蒜香味, 皮香肉嫩!
六款主菜選一 (美國雪花西冷牛扒)
份量適中, 柯打要七成熟,, 見到肉裏仍然帶有少少紅色, 用刀可輕鬆切開, 肉質幾JUICY, 配埋兩球薯容, 可二人SHARE下!
另一款主菜點左疍香卡邦尼意粉 - 意粉夠晒口感, 配料有煙肉, 菇及疍, 撈勻隻疍後, 每條意粉都充滿住疍黃汁, 非常香滑, 我鍾意!!
期間突然見到餐牌上有炸水牛芝士條($62), 芝士控既我又失控啦, 一於落單
見到嘛.................?! 香脆外皮包住香滑水牛芝士, 一咬一拉, 就好似食緊薄餅效果咁, 配埋沙律醬一齊食仲無咁"漏", 令人滿意!
套餐包甜品及飲品, 今晚甜品係木糠布甸, 細細杯但味道唔錯, 質感香滑又甜度適中
最可惜明天要返工, 否則可以食完再叫杯飲品慢慢RELAX下, 唯有下次先啦~~
地址 : 旺角豉油街15號萬利商業大廈4樓
contact me : [email protected]
|
| 2016 年 3 月 7 日 星期一 |
| 女子組吹水區@高流灣 |
分類: 飲飲食食 |
約好了一班為食女子組吹水, 咁大班人有人提議去"烚下烚下", 於是又再次去到高流灣
由於聲浪關係, 為免嘈親其他人, 於是選擇坐房(最低消費$3000), 比起上次貴左$500, 不過見大家咁高興, 一於坐房啦, 又有電視睇!
天氣有D乾, 為免乾上加乾, 叫左呢個好清既湯底, 有皮疍, 粟米,豆腐, 芫茜, 幾足料!
烚下烚下點少得牛肉, 好香牛肉味, 就算淥耐左都一D唔嚡口
叫多點鷄(半隻份量), 肉質望落好新鮮, 熟左仲幾滑, 無雪味
呢碟係有名既三角魚, 差唔多係每枱客都叫 - 肉質好嫩滑, 嘟一嘟就輕易食到佢既肉
驚過唔到最低消費, 所以今次食豪少少, 叫個象拔蚌刺身, 可生或灼一灼食, 兩者都好爽口
朋友鍾食魚, 所以叫多點蟮片 - 幾鮮甜, 切得夠薄及大, 淥完後仍然可食到肉嫩鮮甜
加多個鬼馬油炸鬼 - 即係用油炸鬼包住蝦膠, 面上再舖上蟹籽, 只需淥1分鐘就食得, 果然口感幾特別, 好味道!
總括黎講, 呢間食物質數中上, 侍應服務夠快, 又唔限你幾點要交枱, 係女子組吹水又一好地方!!!
地址 : 尖沙咀山林道21-23號1樓
contact me : [email protected]
|
| 會試多次@冬蔭公公 |
分類: 飲飲食食 |
呢間係屋企附近新開既泰國菜館, 一直見佢裝修緊, 都諗住等佢新開張就幫襯一下, 一於就今晚啦
面積唔算大, 枱與枱之間仲有D迫(只能怪土地不足問題?!) 哈........
望下張餐紙, 見到食物選擇方面一般, 唔算話好多, 但出奇地有肉骨茶, 海南鷄飯呢類星加坡食物係泰國菜食店出現, 價錢亦算係街坊價
首次幫襯, 只小點以下2樣(套餐)試一試岩唔岩自己口味先
秘制泰式豬軟骨米線 (包基本飲品一杯, 即係咖啡, 奶茶, 檸檬茶或汔水), $56
份量普通, 有2舊豬軟骨, 肉質同出面食到既相似, 湯底幾清甜, 食完都夠飽
呢款係泰式香葉肉碎配白飯 (亦包一杯基本飲品), $60
侍應送上枱放低後, 只睇賣相 (隻疍及肉碎), 內心不期然諗起一個字 : 乾
肉碎可選擇牛肉或豬肉, 呢款係牛肉, 味道食落都幾辣, 一路食, 個"乾"字仍然係腦海裏出現
好彩包埋呢杯基本飲品 - 凍檸檬茶(份量都幾大杯, 就算2個人分享都夠飲), 一飲解到之前既辣同乾感
埋單時發現無加一, 侍應服務態度OK, 若然下次幫襯會選擇試佢其他食物
地址 : 將軍澳唐德街9號將軍澳中心1樓163A號舖
contact me : [email protected]
|
2016 年 3 月 3 日 星期四  |
| 價廉味美@成發潮州飯店 |
分類: 飲飲食食 |
去開九龍城開餐, 唔一定要食泰國菜, 打個冷都得! 行過見到呢間店門面裝修格局都咁傳統, 應該有返咁上下"店齡", 就試下!
食店面積唔大, 一眼見晒, 兩邊貼上餐牌, 仲有菜式相片, 方便食客落單!
見佢有海鮮類, 就點左個鹽油水煮蜆($55)
蜆既份量適中, 但頗細隻兼食到有少少沙, 加有粉絲及芹菜一齊煮, 味道OK!
呢碟係半汁煮沙猛
魚既份量頗多, 亦都配以大量芹菜, 啖啖魚肉, 引唔住要叫個白飯一齊食
打冷又點少得卥水, 呢碟係三併, 有鵝片(唔肥), 墨魚同生腸(爽口)
加埋碟咸菜花生配潮州粥, 一餐美味既打冷就由此完成
contact me : [email protected]
|
« | 57 | 58 | 59 | 60 | 61 | 62 | 63 | 64 | 65 | 66 | ... | 147 | »
|
