而家夏天又熱又濕，好容易搞到成身汗味，
搭車嘅時候人迫人，比人聞到都真係幾尷尬，
所以無論男仔女仔出街噴番少少香水，
自己又醒神啲，大家又唔使咁辛苦，
咁當然係要揀啱香水啦。
喺facebook都見過有人講搭車果陣，
聞到好難聞嘅香水，感覺好難頂。
最慘就係喺一個狹窄空間避都避唔到，
試過搭lift遇到咁嘅情況，
焗住成架lift都係果陣味，
真係有頭暈想嘔嘅感覺。
相信每個人噴香水都係想提升個人魅力嘅，
今次就介紹一啲味道fresh啲嘅香水，
揀呢類就比較穩陣，唔使怕比人話香水味太濃啦。
Clinique Calyx香氛 $450/50ml $610/100ml
香氛裡面只用左西柚一種水果，
其他果香係調香師混台其他香料營造出嚟架。
開頭氣味甜得嚟帶少少葉味，
好似有好多唔同種類嘅果香，
去到中調嘅時候就聞到茉莉、百合花香。
淡淡香味感覺幾特別。
如果平時冇噴香水習慣又想低調啲試下嘅話，
呢款就好容易受落喇。
初調：西柚、芒果、熱情果、木瓜、柑桔、番石榴、綠葉
中調：小蒼蘭、鈴籣、玫瑰、橙花、茉莉、百合、金盞花
基調：橡苔、鳶尾草、檀香木、印度香根草
Calvin Klein endless euphoria $520/40ml $665/75ml $875/125ml
好sweet嘅味道，夾雜花香同果香，
好有夏天陽光氣息。
充滿活力嘅女仔就啱晒！
前調：櫻花、柑橘、佛手柑
中調：紫羅蘭、粉色玫瑰、丁香
基調：竹子、檀香木、麝香
右：Calvin Klein Eternity summer (new limited edition) $670/100ml
清爽帶少少甜嘅味道，
感覺好涼快，好夏天feel架。
出街噴一噴感覺冇咁悶熱，即係醒神晒！
前調：洋梨、柑橘、西瓜、竹葉
中調：牡丹、睡蓮、梔子花、橙花
基調：白麝香、白木香
左：Calvin Klein Eternity summer fro men (new limited edition) $670/100ml
充滿海洋嘅味道，氣味好清爽，
帶少少清新嘅西瓜同芳香嘅薰衣草，
令氣味更加豐富。
想要年輕清新味道嘅男士，呢款就好適合喇！
前調：杜松果、洋梨、羅勒、西瓜
中調：小荳蔻、薰衣草、百里香
基調：新一代的琥珀、檀香木、麝香
L’occitane Néroli & Orchidée 橙花及蘭花淡香氛 ＄540/75ml
今次呢支淡香氛係為慶祝La Collection de Grasse一週年而創作嘅，
主要成份有突尼西亞橙花精華發馬達加斯加白洋蘭原精。
氣味好清新，好香嘅白蘭花味，同橙花mix埋嘅效果好特別。
如果喜歡花香味較重嘅朋友可以試試呀！
初調：香橙、蜜柑
中調：橙花、蜜桃、無花果
基調：白洋蘭、麝香、鳶尾
Marc Jacobs嘅Daisy香水包裝每次都有新驚喜，
今次limited edition都唔例外，
用咗紫紅、薄荷綠同磚粉紅色嘅Daisy，
色彩咁繽紛，令人睇到都開心。
左：Daisy Marc Jacobs Delight Edition $665/50ml
少少甜嘅味道，比較多木香味，
唔想感覺太sweet太女仔可以試試呢個味道，
感覺中性啲，COOL！
前調：蘋果、榅桲花、小蒼蘭
中調：鳶尾花、梔子花、牡丹
基調：麝香、雪松木、檀香木
右：Daisy Eau So Fresh Marc Jacobs Delight Edition $725/75ml
如果喜歡甜甜地嘅果香加花香，
活潑少女啲嘅感覺可以揀呢款。
前調：紅橙、粉紅胡椒、白茶
中調：大溪地梔子花、紫羅蘭、紅莓
基調：杏皮、麝香、琥珀
另一經典香水樽包裝就係Chloe嘅香水系列喇！
簡約得嚟好高貴優雅嘅感覺，
好多女生都好鐘意架！
My Little Chloe迷你香氛限量版系列
最新加入嘅係Roses De Chloe，
連埋Chloe同L’eau De Chloe，
可以單買或者買晒一套三款Trio Set。
相信Chloe嘅fans對呢三款味道都唔會陌生。
三款都有Chloe標誌嘅玫瑰香味，
但各自加入不同元素，
帶出咗自己獨特嘅味道。
Trio Set $870/20ml x 3
右：Roses De Chloe $340/20ml
佛手柑、大馬士革玫瑰精油、木蘭、白麝香
味道清新芳香，特別而恰到好處嘅玫瑰香味，
好多唔係對玫瑰花香特別鍾情嘅朋友都好鍾意呢個香味架。
左：L’eau De Chloe $340/20ml
柑橘、濃縮玫瑰蒸餾水、廣藿香
木香味重啲，帶橙香同廣藿香嘅清爽氣息，
味道中性啲，好適合性格活潑嘅朋友。
中：Chloe Signature $340/20ml
小蒼蘭、粉色牡丹、荔枝、木蘭花、玫瑰花、鈴蘭、香柏木、琥珀
經典chloe玫瑰香氣，相對以上兩款，呢款玫瑰香味較濃，
鐘意玫瑰花香嘅女仔一定唔會錯過。
See By Chloe淡香水噴霧 $490/30ml $710/50ml $870/75ml
好特別嘅蘋果甜香，好清新、好舒服嘅感覺。
啱晒鐘意低調嘅女仔，
經過身邊傳嚟呢款淡淡嘅香味，
即時吸引力上升！
初調：水風信子
中調：蘋果花、茉莉花
基調：岩蘭草
Bottega Veneta Essence Aromatique古龍水 $680/50ml $980/90ml
如果大家喜歡較濃嘅味道，或者想味道keep得耐啲，
可以試試BV呢款古龍水。
佢有好濃嘅檀香木味道，加上雲呢拿嘅香，
感覺成熟穩重啲。
味道濃得嚟易於受落，唔會太過濃烈。
初調：琥珀、佛手柑、芫荽
中調：玫瑰、廣藿香
基調：檀香木、雲呢拿
如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或Like我們的Facebook專頁：
www.facebook.com/janicelammakeup | 
