今日係年初三啦！放埋聽日假就要努力返工啦，繼續努力搵錢呀！

今日上咗師傅度拜年同埋問全年運程，師傅話我今年冇咩大件事，健康冇咩大病，只係全年係公司入面都會有小人圍住我搞搞震，但係好采公司入面有個貴人會一直咁幫我，起初我聽到我諗咗好耐會係邊個呢，到最後師傅講咗出口嗰個人就係老細呀，我聽到之後再諗諗吓又係喎，因為一踏入2008年開始，老細真係好睇我，每次我有問題嘅時候，老細都係會幫一幫我喎，佢真係我貴人，如果係咁就好啦！師傅話今年事業都冇咩大起伏，只係要化敵為友，同啲小人(敵人)搞番好啲關係，唔好對有敵人呢，咁樣我今年就可以平平穩穩咁度過啦！

我聽到之後真係好開心呀，雖然今年冇咩特別大起伏，但係今年全年嘅運程都算ok啦！跟住師傅比咗隻海龜擺設我，叫我放係組合櫃嘅位置度，仲要係我一行埋去嘅時候要望晒成隻龜形嘅位喎，寓意老細會慢慢比多啲“水”我喎，我聽到之後仲開心添，因為如果照師傅嘅意思去解，老細可能會加我人工，如果係真嘅話，我嘅生活就會好好多啦。起碼可以早啲還甩啲債先啦，唔駛再爭人錢，咁樣啲好運就會慢慢番嚟架啦。

至於老公方面呢，佢好快就會搵到嘢做嘅啦，只要佢剪吓頭髮，咁樣佢搵工方面就會順順利利架啦。

我聽到師傅講呢句之後，我就安心啦，因為我好驚佢會搵唔到嘢做呀，如果佢搵唔到嘢做，下個月就唔知點架啦，屋企啲開支就大件事啦。

呢兩日我好心傷呀！

呢兩日我不斷係度諗，點解我攞個心出嚟幫個妹，佢要為咗一個會令到佢死嘅人而呃我，我真係好心痛呀。

我對呢個人真係好失望呀，佢結婚嗰日唔駛我會去呀，我唔想做罪魁禍首呀，我唔想佢同嗰條仔第時有咩事嘅時候，怨我呀。我更加唔想亞爸亞媽去佢哋嘅婚禮，費事第時怨佢哋點解當初會比佢哋簽紙結婚呀。

唉...算數啦，當冇呢個妹好過啦，咁樣可能會好過啲呀，咁樣可能會生活好啲。

總之，佢要行條死路，我冇權阻止，望就望佢唔好到時有事嘅時候怨呢個怨嗰個就得啦。

好驚呀！

今日我食完晏番到公司嘅時候，老闆娘突然之間同我“亞甜，我一陣有嘢搵你傾”，我當時聽到好驚呀，唔知咩事呢？老闆娘講嘢嘅態度好嚴肅，我好驚佢會話炒我呀，點算呀，佢都宜家都未搵我呀，我真係好驚呀。天呀！我救吓你呀，陣間老闆唔係話要炒我啦，我真係好驚呀，啱啱先搵到嘢做，個咗一個月咋，我唔想咁快又冇咗份工呀，我老公已經冇嘢做，如果連我都冇嘢做，咁就大件事架啦，所以我真係唔可以冇嘢做架。老闆娘，你千其唔好話炒我呀，我會好比心機做嘢架。

好采，到咗我收工嘅時候，老闆娘同我講，叫我唔好同啲同事玩得咁熟，因為我係做會計，主要係負責寫字樓嘅嘢，其他嘢我可以唔駛嘅，所以叫我唔好理咁多舖面嘅嘢喎。我聽到之後，真係鬆咗一口氣呀，原來只係講呢少少嘢，咁我都唔駛咁驚，真係比老闆娘嚇死呀。

今晚我好嬲呀！

今晚，我係亞媽度食飯嘅時候，亞妹係咁鬧winnie，佢講嘢又大聲，搞到winnie成餐飯都呆呆地，我真係好驚winnie再係咁對住佢，winnie會癲呀，到時我真係唔知點算呀。係，雖然winnie係唔抵幫，佢係曳，但係都唔駛成餐係咁啄住winnie唔放，食咁耐飯就鬧足咁耐，連我呢個亞媽都冇鬧得咁犀利呀，我真係好想問佢，知唔知咩嘢叫做自尊架，佢係咁鬧winnie，搞到winnie覺得自己一啲自尊都冇，我真係担心winnie會痴線呀。好時係度，好采呢個唔係佢個女咋，如果唔係，我相信winnie每日都會用眼淚嚟餸飯呀。

另一樣就係，今晚叫佢搵師傅，問師傅點樣燒嘢比啲細路，點樣交番佛珠同經書比御本尊，點知佢好似唔理唔理咁，一啲都唔緊張，我真係覺得佢好似玩緊我囉，佢比我個覺得係想用我嚟過橋問亞媽囉錢出街同埋飛起嗰條仔囉，佢唔係真係想上師傅度，唔係真係想搵師傅幫手囉，如果佢係緊自己啲嘢嘅時候，佢應該每樣都上心先至係架，而唔係好似宜家咁，樣樣都想做，但係就樣樣都唔做，等人幫佢做架。我都唔明，宜家係佢有污濁嘢，佢想搞番好，咁應該佢自己緊張先係架，點解要人緊張埋佢嗰份呀，唔通佢咩嘢都唔駛做，咁就可以好過嚟架啦，真係奇怪呀。

今日係我上myob嘅第四日啦。係學業務管理，係個新課程，主要係用嚟做公司嘅業積分析，點知，當我上完之後先發覺我間公司唔啱用，所以我只係學識佢，而唔可運用，真係失望，唉！不過諗深一層，學咗都冇壞呀，因為始終都會有用嘅。

今晚，我好嬲呀，原本諗住同亞妹講，問佢星期五上唔上師傅度，因為我見到佢背脊好黑，啲陰氣都重，點知佢帶埋佢條仔上嚟，搞到我咩都講唔到，唉！佢呢個人真係冇得救架啦，都係算數呀，唔好理佢呀，費事激死自己呀。

宜家只係顧住自己頭家同亞爸亞媽就算啦，佢哋兩個唔理啦。因為亞爸亞媽越嚟越多病痛，我真係担心佢哋呀，我以前唔識孝順佢哋，宜家知錯啦，要孝順番佢哋多啲，等佢哋可以享吓福啦，但係話可以大富大貴嗰隻呢，就真係冇可能啦，起碼唔洗佢哋再担心我哋，咁都做到嘅。總之，我想亞爸亞媽長命啲，生活開心啲，病痛少啲，都就好啦。