今日我阿姐問我29號得唔得閒，話想約我，當時真係俾佢呢句說話嚇一嚇，又唔知佢想點。原來佢話我就嚟過probation，所以要同我做一次appraisal。做過幾份工，今次都係第一次做appraisal，好緊張添。我仲見到佢枱面有份公民袋，上面寫住Kaman appraisal，真係好想拆開嚟睇吓。

今晩約咗班中學同學去深水灣BBQ，呢次聚會真係十分多人參與，合共18人，當中有幾個都係好耐無見過啦。因為今次既聚會，知道咗大家既近況及响邊到番工等等...全靠非常落力的小翠先可以攪得成今次既聚會，仲有霸得兩個咁"筍"既燒烤爐，佢一個人2點幾就入咗嚟霸爐啦，真係辛苦晒。不過今日之後，又唔知要等到幾時先會有機會再咁多人約埋出嚟玩啦，可能真係要等到某某同學仔結婚啦。

今日相約咗BIG, RUBY, 小魚, 章, 造, 家楫一齊去粉嶺香薰草園BBQ，大家去到粉嶺火車站再轉小巴，4:00pm左右到達，都已經有幾多人，大部份都係一家大細嚟玩，除咗燒烤，仲有其他野玩既.......响薰衣草園影相(實際上係一小塊種有薰衣草既田地)，餵吓魚, 龜仔&羊仔，仲可以自己整香薰candle(最低消費$20)。好耐都無同你哋燒野食啦，所以今日好開心，不過可惜雞脾&和仔嚟唔到啦，佢哋嚟埋就更齊人啦麻。

p.s. ruby自己的問題，最後都要自己作決定架，我哋都係將自己的感受發表出嚟，你要有自己的主見，愛與唔愛都係你自己先最清楚了解架麻, right?! 

今日第一日番新工，9:30am上到office，各人好似都係剛剛開始工作咁，之後HR既COROL同我講解合約條款&員工手冊，跟住就帶我行吓寫字樓，首先參觀9/F HR Dept. & Admin. Dept.，7/F就係會計部，最後6/F就係Sales Office亦即係我工作的地方，介紹完地方之後，COROL就將我pass俾教我做野既秘書HEIDI，原本佢係負責另一個品牌的，但因為Jean Paul Gaultier的秘書走咗，佢就暫時做埋。Jean Paul Gaultier Team既office staff只有brand manager, LISA (我阿姐)、assistant mechandising manager, Jack & secretary (我)。唔好睇佢咁少人，但係要負責晒HK, Beijing & Shanghai三間分店的一切大少事務，由於國內兩間分店同事經常會搵我哋，所以HEIDI都話六成的電話都係用國語，真係有少少擔心。呢間公司俾我感覺係好有架構&規矩，任何的申請都需要manager批准，番工放工食lunch都要打咭，好慘.....番工遲到一分鐘就會在大假到扣一個鐘頭，所以我一定唔可以遲到架!!!  HEIDI都有同我講，因為我响呢方面完全無經驗，起初幾個月會較吃力，只要克服到可以啦!!佢話雖然我哋個title係sec.，但實際上就好似做merchandiser既野咁，實在太好啦，這正正係我想做既工作，我會俾心機.....

終於嚟到我最後一日番AIA的日子啦，今日要執番晒d野走，執吓執吓先發覺原來自己擺咗好多野响公司，真係拎到我好似隻屐咁。原先今日放工諗住請BETTY, EMILY, KATHY & RONALD飲茶，點知BETTY & EMILY今日先話唔去，都幾掃興架!!!好彩仲有KATHY & RONALD，三個人去咗對面新港既彩雲軒。由於今日係我既last day，又要執拾自己野，又要處理埋報稅的文件，真係好忙碌，點知個新秘書又想我同佢講一次computer裡面每一個file係咩嚟，佢好鬼鍾意delete野架，有時我儲存既file都係諗住以後用作reference，所以攪到我好炆，我自己都feel到我自己有少少黑面。誰不知放工時，佢突然送咗份禮物俾我，我真係好愕然，佢仲話多謝我呢個禮拜教佢野，同埋祝我有好既發展，此刻真係令我措手不及，只係識得講多謝及叫佢俾心機做。