今日上晝返工，但係只係返半日，因為下晝要入camp，千祁唔好誤會，我唔係同d阿婆去camp，我係同班小學生。
約咗我1點11係學校等，咁我就12點就走咗。1點已經去到油塘，咁就梗係去搵食先啦，食完嘢就去學校。去到見到班學生，個個都熟口熟面，因為之前都己經帶過佢地攪活動。
唔使好耐~~~2點30到已經去到"西貢戶名外康樂中心"，咁就去拎鎖匙。入到房就梗係揀床先啦，等跟我嗰7個細路揀哂之後，淨返嗰張咪就係我囉。等大家都整頓咗之後我地就開始第一個活動。
"撞冰遊戲" ~ 點玩係呢度就唔多講，總括嚟講就係走嚟走去啦。 跟住就係第二個活動~~~~~
"拯救行動" ~ 點玩係呢度就唔多講，總括係講同我地幾個導師既期望差好遠啦，重差d攪到無飯開。 跟住就食晚飯......其中有兩個肥仔，佢兩個係孖生兄弟，一樣咁肥，食飯之前會問我: "我食完飯可唔可以買嘢食呀?" 答: "食到我覺得滿意先丫!" 食飯途中: "咁樣夠未呀? 呢樣得未呀? 重要食多幾多呀?" 答: "繼續啦~得我會話你知! 飲咗湯未呀? 飲埋先啦!" 經過一輪問答之後，我都係放咗佢地去買嘢食，佢哋夠咁死走去買薯條食......算!!! 休息咗一陣，第三個活動~~~~~
"飛越黃河" ~ 點玩係呢度就唔多講，總括嚟講緊張刺激，需要哂佢地二十個人既合作!! 跟住就今晚最後一個活動~~~~~
"夜行" ~ 點玩係呢度就唔多講，總括嚟講夜媽媽成班細路周營走，重要走錯哂路!!!
今晚既活動終於攪掂哂，可以返房沖涼瞓覺，點知原來呢個先係"惡夢"既開始~~~~~
返到去安排哂佢地去沖涼(重比我發覺女更衣室對門無閂，重可以係出面望到入面塊鏡，再反射到去浴室~~)，我要等佢地沖哂涼我先可以放心去沖涼。我沖完涼返入房既時候，其中一個肥仔同我講: "我帶咗三個杯麵嚟呀? 我而家想食呀" 我立即呆咗~~ 算~咪幫佢地出去拎滾水，返到嚟幫佢地整埋。到食完既時候，佢竟然倒咗其中一碗，玩嘢咩?? 攪到我重要幫佢地洗地毯，唉~~ 攪完一輪諗住瞓啦，點知佢地成班都唔瞓，係度跳嚟跳去。要我攪到十二點幾先攪得掂，點知我自己又瞓唔著喎，攪到成2點幾3點先瞓得著，就係呢個時候.....我發現有兩個人起就身係度傾計，玩咩? 佢地重走過嚟問我可唔可以去廁所，我真係想唔比佢地去。再過多一陣，都總算瞓著咗。
 |
算啦，反正都要走啦。食完嘢，大家就執埋d嘢搭車走lu~~~
