又到左寫月誌ge時候了。真係要我分幾鐘寫幾千萬字唔難，諗寫咩先先係最難。一個月先寫一次都唔記得有咩想寫咁濟囧。
由六月廿七日，走果日開始講，果日所做ge同我所計劃ge有不少出入，果晚我執野執到早上六點幾，但都係未執得曬，最主要係我拆個hhd同 dvd，就係差一粒羅絲，我拆唔到個dvd，搞左超耐，第二日問kit借個羅絲起子先搞掂。六點半我決定瞓返兩個鐘，八點半再搞。九點搵啊姨賣書，但原來 乜鬼野都可以賣比阿姨的，當然抵唔抵又係另一個問題，我將d書啊，電腦啊都賣曬比啊姨。啊姨果然係專業ge，一話將電腦賣比佢，即刻就有個四、五個人ge 小隊出馬幫手搬野，但呢個啊姨小隊都幫我省了不少時間起碼唔洗嘥曬d力抬d野去賣。跟住退埋個解調器都只係十一點多，果時仲見到啊X明同個我都見過幾次 ge女仔默默的一齊行，我喺由西苑去電訊ge果條路撞到佢地，跟住我差唔多行到宿舍~也就是不夠一分鐘後我一個回頭，又見二人從華超方向返十四號樓。但其 實由西苑直去十四號樓大概也不用十秒，居然會選擇兜路。兜條遠d ge路我都明~行耐d，浪漫d啊麻，但兜條咁ge路仔，唔知點解我總係覺得好搞笑。返到去就趕緊出去剪髮，最後一次ge胡思亂想，今次都係冇見到張戀了， 可能她已唔喺果度做。返到宿舍查埋房去樓棟度退錢。話說搞退錢手續果度個女仔真係鬼火咁靚。果日又遇到幾個我棟樓的平時冇講過野ge鄰居，同佢地傾左陣， 第一次同佢地傾計，亦都係最後一次。跟住就同book、kit、葛去食最後的晚餐，又再經過十四號樓時我又再望多眼個鬼火妹妹/姐姐。最後一餐係沙县，我 仲請左佢地食扁食tim，雖然好後悔，應該請個平平地ge綠豆湯咪算囉，但希望佢地以後食扁食都會記得我啦。約埋兩個fd走得了，果晚在大雨中回港。
話說mj死左，喺mj出殯果日中午我返屋企經過屯門市廣場，新城資訊台搞ge一個悼念mj ge節目，果日見到好多香港歌手。其中有個平凡的工作人員開場前派白手套給大家，頓時佢好似個大明星咁，成班人圍住佢要白手套，但當最後一隻手套從他手中 派出，他身邊即刻變到一個人都冇，跟住派第二次又再重覆，我在二樓見住瘋狂ge市民們覺得好好笑。電視廣告話四點的，但居然要等到五點先開始。果日我見到 又認識ge有eo2入面光頭果個、啤梨、麥俊龍、李桌婷、square、周栢豪，周國賢、鍾舒漫等等等等，其他ge有好多都唔識，新女星，新男星，新組 合，好多都唔知乜水，我同樂壇脫節得太緊要了。但我話果日最靚都係個女主持。但好多都係出嚟講下野，根本唔夠時間比曬佢地表演，果日最開心都係見到李卓 婷。而果晚喺觀塘apm都有mj活動，但太遠了=[。跟住過左唔知幾日，我又喺屯門市廣場睇到無線收費電視ge節目，但果日ge陣容就差得遠啦。主持有張 美妮，大王安德尊同一個唔知乜名ge後生仔，話說安德尊真係好大份，張美妮個樣都一般。嘉賓方面有心姐，修哥，吕册，家燕媽媽同一個唔記得乜名ge演員。 見到咁ge陣容冇幾耐我就即刻走人了。
之後有日同哥去左睇殺人犯，呢套係我今夏第一套睇ge電影，原本對郭富城都冇乜期望的了，但見佢演呢d痴線佬角色又覺得好似幾岩佢ge，前半段 講真都好一般，郭富城又唔係好戲喎，係有幾幕恐怖鏡頭令人精神一震。當到左劇情真相浮現出嚟開始，真係好睇了，劇情一流，有驚喜，又不失恐怖，簡直令成個 故事變得瘋狂，見住郭富城由原本疑神疑鬼、少少癲變到完全進入瘋狂狀態。呢套野最好ge係劇情突然比你ge驚喜，就好似當年睇不能說的秘密睇到原來得周杰 倫同白痴仔先見到、知道娃倫美果段所給我的驚喜差唔多。我就覺得電影就係似有呢d驚喜，令人瞠目結舌。話說其實殺人犯進行中我都有諗過佢就係主謀的了~好 戲一套。
追嚟冇耐我就係咁睇白夜行小說，"我的世界没有太陽，但卻有東西代替了太陽"。被看成殺人犯的女兒和被害人的兒子；亦是殺死自己母親的女兒和殺 死自己父親的兒子，兩人在不同的世界活著，但命運卻連繫著的兩人的故事，實在太好睇，太瘋狂，瘋狂在於兩人之間的愛，真係為愛粉身碎骨。睇完後我再睇埋劇 集，好彩係睇說先，因為劇集係用倒序法，看完劇再看小說可能就失去趣味了，但說倒序其實就是將小說後期的推理成果推到開頭順序播放而已。回憶起來才發覺這 是我第一本看完的日本小說，以前中學都有睇過日本的推理小說，書名類似如"幾時幾分到逹扎榥"之類的，不過没看到最後就還了。在我心目中，我又看多了一本 我認為的神作了。我亦開始留意了作者東野圭吾，佢就係嫌疑人x的獻身的作者，我睇過呢套電影，劇情令我著迷，天才之間的比拼。神探加利略之後再嫌疑人x的 獻身，令我仰慕起東野圭吾，所以我選擇了白夜行，最後都冇令我失望，現在正看他的聖女的救濟。
7月16號果日，肥湖同立雞同兩個佢地fd嚟左香港，十二點佢地睇戲"哈你老實"咁我諗住兩點再出旺角都趕得切，咁十二點半前我同家人去左飲 茶，都一點左右食得飽了，但點知等姐夫等到我兩點半先出發到，佢地就都睇完戲了。喺先逹見到唔知幾年冇見ge湖雞，果日傾得都ok，湖買野都係咁on9， 買戒指果時笑死我。果日佢地個個都話我似售貨員，之後我仲幫老闆娘口令湖又買多件衫tim，我果刻都覺得我唔做售貨員嘥曬。果日行到我隻腳超級攰，最後去 食壽司有得坐下先好d咋，話說果晚塊蟹柳真係勁，超多蟹肉，難忘。接近十一點大家就搭地鐵歸途了。果日我乜都冇買，因為...冇錢囧。話說之後兩日，即係 果日ge後日，又同妹姐姐夫去左食壽司囧。之後第二日定第三日就收到銀行ge信，果六千蚊入袋了。
過去ge星期三係第一日書展ge日子，亦都係長江日全蝕，香港日偏蝕ge日子，我果日十點左右起身，我哥話e+仲可以睇到日偏蝕的，叫我落去 睇，但我雖然係起左身，但都仲係好眼訓，唔想攰，就繼續瞓左喺度，食左早餐，hea到兩點左右就同哥去左書展，今年其中一個焦點就係一班o靚模，我對佢地 唔反感，但都對佢地冇乜興趣，反而果日我係想睇傅穎同鄧麗欣的，但果日兩個都見唔到，想見我諗都要去簽名區，但當然去得簽名區都應該係要籌的了，可惜我 冇。所以去搵書了。今年我有明確的目標，話說上年，我見到不少我喜歡的西方宗教/科學懸疑小說，但只買了一本叫牛頓加燶炮ge小說，此書有少許科幻成份， 但無可否認真係好精彩，它是第一集，還有後續三集，我今次書展的目標一開始就係佢地了。然而，今年見到最多的小說是暮光之城系列的一堆書，睇落的確好吸 引，但這個系列太多了，我連頭都未開，唔想嘥精神開部咁大陣容的小說，跟住最多ge就有東野圭吾的作品，差不多一半參展商都有佢作品賣吧，仲要係佢大量 ge作品，我保守估計應該有佢五至六部ge作品，但我哥都有九成佢ge作品了，今年已不作考慮。跟住吸引眼球ge都係丹布朗ge小說，我都睇曬佢作品，冇 理由買英文版返嚟玩自己架，所以又不作考慮，跟住令人屬目ge就係傅穎ge書，但見唔到麗欣果本的，唔通咁快賣曬?書有不少，但尋遍二樓都搵唔到我ge非 理性時代四集，最多都係喺城邦度搵到第一集同第四集，我只好上三樓，終於比我喺尖端度搵到一至四集並排而放，話說上年都好似係喺三樓搵到牛頓加燶炮的，今 年又係喺三樓先搵到我要ge。跟住我等同我哥會合，問佢攞錢即刻返去尖端攞起二至四集非理性時代，跟住之後仲買多左本有關愛恩斯坦ge小說tim。話說今 年三樓好似少左野睇咁，我記得上年三樓睇左ok耐時間的。可能今年三樓多左個tvbuddy同d佛教攤位，搞到冇乜野睇。跟住七點我地就去搭巴士走人了。 今年又一個明星都冇見到，上年我哥都叫到江若琳啊，而我以前都話曬喺度見到過麥俊龍啊，今年係見得果只tvb ge公仔，同埋今年睇ge書中，最印象深刻都係果本話爛gag ge書，笑死，但最後都冇買，其實當場都可以差唔多睇曬，有乜需要買呢。四本小說唔知睇幾耐，我諗唔洗一年掛。之後幾日都唔會去架啦，又冇明星見喎，要見 又要去簽名區喎，去簽名區又要攞籌喎...囧，到時睇下動漫節點啦。
返嚟後最緊要ge梗係搵工啦，但由於小弟身體關係要去睇醫生先。話說我返去唔夠半個月我老豆己經同我講左兩三次搵工啊去面下試啊吸收下經驗都好 啊果d一大堆野，真係好憎d囉囉嗦嗦，最討厭係佢仲要話老豆唔係迫你唔係催你，你能夠半個月唔夠都同我講幾次都係催緊我啦，好撚假啊。講到我好似唔緊咁， 我畢業之後連畢業旅行都冇諗就話要醫好身子，我為ge又咪係早日醫好，早日工作。同肥湖佢地行街之後一日我就開始真係寫信了，寫左廿幾封都有了，得一封有 回覆話面試，遠近都唔係問題，大熱天時喺觀塘我都去，但實在係難求一工，連一面試都難求。期待下d招聘會先吧，希望快d有著落啦。當然得閒有繼續我ge創 作，只係時間真係好少。
唉~~隨隨便便又寫左二千幾字，都係繼續搵工先。
|
