而家真係好唔開心.......愛會傷人........如果唔係愛那麼深，或者就不會覺得那麼難過.........摺埋先~

今日一起身就睇左好多令人鬱悶的新聞，首先係嘉禾大廈大火，睇左現場直擊的救人過程，我不其然係度諗，有咩係我地做得到既呢！呢楝係舊樓，新聞話消防門被經常打門，濃煙迅速蔓延貫穿整楝樓宇，形成煙囪效應，樓宇內高溫不散，滅火筒過期失效．．．其實呢ｄ好多都係老生常談，如果每個人都習慣地注意一下，保持防煙門常關，就只係咁簡單者，或者呢埸火就唔會咁難攪，犠牲左幾條人命。

第二單，私家車同的士相撞，的士司機連乘客都告不治，私家車司機同乘客都係輕傷，新聞話懷疑私家車司機不小心駕駛所致，就係一個掉以輕心的司機，害左兩條人命。

第三單，新彊爆炸，其實炸完ｄ無辜百姓又點呢，對個ｄ組織有咩益處呢，真係百思不得其解。新彊條友朋友仔快ｄ番，有ｄ擔心添。

第四單，俄羅斯發炮攻擊喬治亞，呢個我一ｄ都唔明，我只係反對一切無謂戰爭，百姓永遠係戰爭的犠牲品。

有ｄ事我地未必控制到，但有ｄ事，其實諗深一層，我地都做到ｄ野，天災可怕，有時人禍更加可怕，可怕在我地不知不覺，可怕在我地明知故犯，然而犠牲的，除左可能係自己，仲可以係其他無辜的人，一條生命的犠牲，影響的，唔知一條生命，可以係一個家庭，將心比己吧，朋友。

我都要提醒自己，下次走火警的時間要認認真真咁走一次．．：ｐ。

足足等左兩個月，今日終於等到個叫做有答案的答案，雖然唔係好消息，不過最起碼叫做可以開始醫勒掛，唔係再驗完一次又一次的等待（雖然仲係不斷要驗驗驗）。諗深一層的時候，有時人都真係好好笑，就算知道結果可能都係話比你知唔好，但人就係想知結果，就算好唔好，呢種係咪不安全感呢

自從去番屋企附近睇之後，我就無跟埋去，因為真係跟唔到，連帶去賴醫生果度都無跟住去，呢排有ｄ非人生活的日子真係唔係好知做緊咩，估唔到賴醫生竟然問起我，經過左兩個月佢都記得我地呢個小小的個案，唔通醫生真係有非常人一樣的記性既？

今日咪咪聽到賴醫生講既野都無乜野，仲好似好開心咁同我講：我中左勒．．．（你估而家中六合彩咩...-___-”)，不過感恩既係，應該算早發現，只係一諗起可能又要做什麼療程，心就．．。

新的一日，從新出發，我往那裡去才是呢？

呢排身體唔好，我知道又好似以前咁，不過都仲未的起心肝去睇醫生。

昨晚發左個惡夢，夢見親人走，係咁喊，喊醒左望下個鐘，五點幾，然後繼續喊＋繼續瞓，六點幾七點起身番工，今朝又係sam的時候，我真係無咩心機，好謝∼分享的時候無咩想講，只係好想喊，安人好好，佢安慰我唔好諗咁耐，做唔到就放低佢，只係佢唔明我根本就唔係因為果件事唔開心，我知佢眼裡面的我，並唔係我，不過我都懶得澄清，真係好無心機呢．．．

好想搵人講下野，夜晚打左比有叔味，傾下大家近況，佢好有淚氣，好似好多野要申訴咁，一路由佢講講講，雖然講開我轉左行佢都好大反應咁比左好多唔係咁正面既建議，不過由佢一路講講講，我估如果我同佢係街度咁講野，有人會覺得佢係一路鬧緊我添，但係就算只係聽佢講完，我的感覺又好番ｄ，或者傾計／抒發心情就係好簡單咁講下ｄ無謂野，聽下ｄ瑣碎事，生活最大不了的莫過於死啫，大家都仲未死就ｏｋ啦。

有乜事，無乜事，仲有得諗，仲有得揀，已經係幸福，唔係咩？

執拾的時候看到咪咪那些廣告信，內容提及免費換領美容產品試用裝，然後我就同咪咪講勒：

我：ｅ．．你可以去換．．．　．．．（我照讀一次）

佢：你講咩呀，咩倒塞液及火腿液呀？？

我：係深層補濕液及鎖水乳液呀．．= ="

咪咪信主的進展尚算良好，要感謝各人為她所預備的，哈．．我由day 1已經預備左一本松柏福音(係一本專為老人家而設的四福音書)比佢，字體大大隻，仲有埋註釋，好岩佢睇，不過佢一直都唔睇，直到姨為佢預備左一大本聖經（雖然個實物好大件，但裡面ｄ字仲係細細粒）之後，佢話睇唔到，我又叫佢睇果本講左好多次佢都未肯睇既松柏福音，佢又問我係咩黎，好似未聽過我講咁．．= ="，終於，尋日開始睇勒，今日仲見佢讀讀到喊，我見到有ｄ愕然，走去問佢：乜咁感動架咩？你睇到去邊呀？佢二話不說就趕我走．．-____-，好似我係洪水猛獸咁．．:p，不過唔緊要，唔駛我講，主自己同佢對話仲好．．呵呵。

題外話：呢件事令我諗到一樣野，就係有時人就係咁，有人預備左最適合你既野的時候，你係會唔理，到有比較，仲要被再三提醒，至知原來一早預備左比你的已經係最岩你的。呢個故事的教訓係：要竭而不捨，只要有恆心呀．．鐵柱磨成針呀！

早前去姨姨的教會，佢地一直為整個西北區代與代的關係復和，最近都開始見到成效，而我都要那半個算係成就左呢件事的一代，然後，肥都話佢老豆問佢攞聖經睇，呢個真係一個好的開始，希望你都抓緊機會，有時未必要真係好刻意去做ｄ咩，只要禱告，好多時就會自自然然地發生。

另外，擔心左幾日肥力士，今日收到Imen的貓，話佢將會可以回家休息，這個真係大好消息呀！感謝主，神係聽禱告的神，因為我一直都擔心埋佢家人的長途拔涉，可以係家中休息當然就最好不過啦，希望早日康復，早日信主。

至於咪咪呢，今日抽組織，似乎都抽到，希望知道發生緊咩事同埋最好係話無事，然後又奇蹟咁睇番野，因為而家都話細左ｄ，但另一隻眼又矇左ｄ，都唔知想點，不過心境開朗就係良藥啦。

提外話：

１．係去緊院的途中，因為我今次真係探病時候去，所以見到好多人地的家屬，途中不時見到有在哭泣的，心都有點酸，人就係咁化學，有時，有ｄ野唔係自己手裡掌握之中。

２．咪咪同病友傾計，知道有個病友年幾前已經有癌，當時係應該有得醫，但佢無醫，佢話好驚，以前唔理佢可能會自己好，最後佢而家週身都係癌至醫，有時，有ｄ野逃避唔到，倒不如坦然接受。

朋友告知一個消息，另一個朋友車禍中受傷了，雖然情況穩定，但似乎都頗大件事，最起碼他說去到醫院是完全認不到眼前看見的人就是他，聽說玻璃刺中了眼睛，腦被震後有氣泡，下顎需要取盤骨來駁骨．．．說著說著，心很不安，為他擔心之餘，心裡有的另一份感觸是想到他的家人，其實很想到醫院探望，看看是否有什麼可以幫忙，但又怕阻礙他們，朋友都說最近不大方便探望他，因為他跟本說不出話，而且探病時間有限，每次可以探望的只有兩人．．．這幾天總是想著這事，心裡有時有份說不出的戚戚然，不知怎的總是掛念著他的家人，於是找著很多朋友為他們禱告，因為我深信，神是聽禱告的神，希望那份出乎意料的平安，可以臨到他們的當中。

如果，你看完都有一份感覺，想為他們禱告，就為他們禱告吧，雖然你們不知道他是誰，但上帝是知道的，將禱告的力量，你們的祝福都帶給這位朋友，謝謝。願　主祝福保守你們。

呢排太多新鮮事發生，真係有ｄ應付唔黎，因為差唔多每日都去一去醫院，有ｄ野都真係不斷順延中，如果可以的話，我想每次都一齊去，起碼唔駛作無謂的擔心，感恩既係，十次我都去到九次，不過真係幾花時間，一去就等一日。

可惜，結果都係放棄左今期番學果邊，咁岩覆診都係逄二、五，真係好耐都無上過堂，功課都無交，記憶所及只有兩次機會肥佬，唔通我一次過要用晒呢個QUOTA。

報告出左，結果都係意料之內，可以轉番去附近睇左點先，然後，仲係有好多野要諗，現實就係現實啦，真係後悔以前無為自己／佢地預備ｄ乜野，有就好啦，唔駛好似而家咁，不過凡事應該向好果邊睇，既然無係事實，都追唔番，要諗既就係跟住仲可以點。

我應該點呢，原來人係不明朗的環境真係唔知想點，初時真係無咩心機做野，不過而家好好多，life must go on嘛，咪咪話：唔好比我影響你要做既野，又係既，佢影響我，我咪又影響番佢，於是，工作繼續，玩樂繼續，仲同佢玩多ｄ添．．呵，去完醫院就同佢去買金魚，而家我都幾鍾意睇住ｄ魚游黎游去，我下次要買番ｄ金魚仔，上次果條好地地咁慘死左（佢唔知做咩隻眼盲左，跟住去左，真係大吉利是），而家屋企得番ｄ迷你魚，我都係鍾意金魚多ｄ。

而家無論學業，事業，家庭，朋友，都要好好努力，暫時放棄左今個學期的成績，壓力都細左ｄ，但新工作的開始，根本都係一個學業的課題，不論睇好多好多野，又要考試，然後每日都有人問你睇左ｄ咩，今日市場環境點，同番學都無咩分別，家庭唔駛講啦，朋友．．．呢排都係有ｄ棘手，待人接物真係我最弱果環，最近病得密左，咁岩約左兩次朋友去打波，兩次都病，佢已經認定我係飛機王，病只係個借口。

好多時我都覺得當我講真話的時候，大家都只係覺得果ｄ係大話，好奇怪，或者呢個世界太多人鍾意講大話，而其中一個會講大話的人就係你自己，於是，就好自然地覺得，人地都只係搵個借口呃你。就好似自己會無病請病假，就好順理成章地覺得其他人請病假的時候，都唔係真病的一樣。

衰人話我係個無機心的人，到今日我都仲係覺得，睇人地係個好人比睇人地係個衰人黎得開心。每個人帶住根刺去保護自己，防止別人傷害的話，其實變相每個人容易受傷；相反，如果每個人都無刺係身，傷害可以點黎呢？！美國每個家庭都可以有槍，保護自己的工具變左校園槍擊；香港一單校園槍擊都無發生過，只係因為大家都無槍呢樣野係度。人真係好奇妙的動物，呢個都係我想對人的其中一個原因，不過都係其中一個壓力來源，一個對我黎講好好的挑戰。

今日係四川地震一個月的日子，亞視特別製作了一個特輯，講述當中一個個有血有淚的故事（其實我唔係好想睇，不過係房都聽到），聽下聽下聽到一個不其然心實，打冷震的故事，主角是一個原本夢想當舞蹈家的孩子，地震發生的時候，走避不及，被瓦礫壓斷雙腿，動彈不得，但他堅強的意志叫他怎樣都要逃出生天，於是，他．．．自己．．．親手．．．不斷．．．用力．．．扯斷自己雙腿．．．聽到呢到，我個心好似無情情淌血咁，好難受，故事繼續，斷左之後，佢仲想自己執番殘肢，只可惜．．．　．．．。

生命幾咁無常都好，堅強的人，有時真係可以抵擋一切。諗起聖經裡的一段，其實意思無咩關係，不過係咪咪睇眼的時候已經諗起，因為果日去睇醫生，咪咪問醫生，如果真係復發咁點，醫生話做電療啦，咪咪再問，眼都可以做得既咩，醫生好無野咁答，通常做完會盲囉。然後我就開始諗，如果真係，咁點呢，當初睇經文的比喻的時候，好順其自然咁覺得，係啦，壞既就除去，保住生命最緊要，好自然架啦，但原來真的時候，我的諗法係相反。但睇完那個孩子的故事，對生存，對堅強，正面，積極，又有個好矛盾的體會。