琴晚同你亞勝講翻火紅色事件，但係佢居然話正常！接著細聽之下，覺得又幾有道理！佢話一個女仔嘅肉體同金錢被男人傷害，都遠不及心靈嘅傷害！所以快活恩仲憎你係正常！不論時間有幾耐，都會繼續下去！

                               聽完亞勝嘅一席話，我突然想起亞芳話惠儀到而家仲好憎我！雖然事隔12年，當亞芳提起我嘅名字，佢都面露不悅！可能我舊時真係傷害得佢好深！深到可以因為叮噹似我，連叮噹都憎！舊時佢好鍾意叮噹！

                  唔怪得當初我話追肥茵，亞華話我只會傷害佢啦！原來所有兄弟都知道我係一個壞情人，只有我一個唔知道！唉！

           不過唔緊要啦！雖然我唔係一個好情人，但係友人話我絕對係一個好爸爸！

            我嘅悠長假期終於來臨啦！由今日開始唔洗再返津津囉！喺呢間公司做咗一年，真係咩人種都見倒！好似亞強呢d死做瀾做，又唔放假嘅打工奴隸！一味喺度唯恐天下不亂嘅亞勝！有錯唔認又拆老闆鞋嘅亞凰！豬事八卦、咩都關佢事咩都要理，自己職責又做唔好嘅亞毛！仲有姑寒、鐸叔、老很土又刻薄成性嘅老闆！我竟然可以喺呢間公司忍受倒一年，真係厲害！

                               往後又可以過翻優柔嘅生活！過翻全職爸爸嘅生活！不過喺呢一年裡面，我發現而家d人打工嘅心態唔同咗！以前d人會諗，公司好即係大家好，所以會盡全力去為公司！但係而家d人剩係為自己，公司d問題唔關自己事！見倒d人變成那樣，真係多麼心酸！

                     其實可能只係呢間公司d人先係那樣呢！除廚房師傅外，個個都無工作熱誠！好似做又36唔做又36！您話，喺呢d地方做嘢又點會開心呢！

              火紅的眼鏡、鮮紅的外套、殺人的眼神、被詛咒的一天，使我頭頭碰着黑！

            話說昨日係潼潼嘅家長日，我哋就喺翠屏嘅麥記食早餐，當我哋食緊之際，突然覺得渾身唔自在，跟住發現我x女友坐喺我隔離枱！本應想同佢打招呼，但係當say hi 之際，佢用一個殺人嘅眼神仇視住我，使我好驚恐！後來佢嘅表現令我覺得佢仲超仇恨我，因為連潼潼都睇得出，我同佢係認識！

                           接著當日全程都超級黑仔！

                  我哋去完學校之後，就去咗啟田買鞋！我睇中咗一對NB 嘅波鞋，但可惜最細只有43碼！跟住又睇中另一對波鞋，但係最大只有39碼！好啦，我再見倒一對心水波鞋，呢對波鞋又有我碼，當我買之際，個sales話最後一對比嗰位先生買咗，我頂！使唔使禁黑呀！返到屋企裝香，都要比支香……！唉！肯定快活恩成日都咀咒我啦！

                                     講真！我同快活恩都已經係7年前嘅事啦，仲使唔使想殺人呀！

        終於開發放假啦，心情變得愉快咗，再加上我又講咗辭職，成個人簡直輕鬆晒！不過可能要去到月尾先可以走倒，因為我話比d時間老闆搵人，等佢搵倒人我先走，限期係月尾！那樣做只不過係幫自己留後路，始終做人要留有餘地，唔可以做得太盡！

                       我發覺自己做人處世成熟了好多，唔再好似以前禁衝動，只得一股臭脾氣！

            其實一方面我唔想繼續做，另一方面我又唔捨得d同事，真係好矛盾！雖然亞強有時係好自私，又推卸責任！但係佢只不過想保住份工。因為佢自己知自己事，無咗呢份工就好難再搵倒份工！所以老闆要求再過份，佢都忍氣吞聲！

           又喺㗎！佢年紀又大，做嘢又無料到，喺出面根本無可能搵倒水吧嚟做，唯有就喺呢度做打工奴隸啦！而我，當然係打工皇帝啦！

        今日真係勁火，你老味我又唔係要啲咩，開部泠氣姐，開一部關另一部，老闆都阿芝阿左，又話做呢行預咗熱，鬼唔能知呀！佢又唔能知裡面水吧抽氣喺廢，我個位又無先鋒，點頂呀！好啦，我話帶把風扇返工，佢又話咩又話七，又話呢樣嘢解決唔倒，可以用第二啲嘢（錢）解決！我頂佢肺呀！

                    做得呢行我預咗熱，但係一個小小嘅要求佢都耍我！

                                              我呢世人最憎喺攞錢大我嘅人！錢，我無咩！

                           無錯，佢係老闆，佢講咩都係對！但係我可以選擇唔做！

        我要比佢知道，而家唔係我求佢，係佢求我！所以我決定辭職，喺好堅決地辭職唔做！因為我做咗十幾年嘢都未試過受禁大嘅屈辱！但係都要等到放完假先講為上策，費事佢唔比我放假！

       話時話，如果係以前嘅我，我已經劈炮唔做！而家嘅我竟然可以默不作聲，看來我已經成熟不小啦！當時我諗就算我反駁佢，佢都有千千萬萬個理由推搪我，所以我選擇唔出聲！看來我開始控制倒我啲臭脾氣！