不知不覺我又大了一歲，即喺又老了一歲！生日當晚我竟然仲要開工，好彩都有同事記得我生日，使泠鋒襲港嘅當晚帶來一點溫暖！前晚仲有生日蛋糕食，使我將生日無假放嘅失落通通都忘記了！

  開心過後又回復平時，老闆琴日又捉亞勝去訓話！事緣琴晚冬至，亞勝就叫廚房炒兩碟小菜，仲叫樓面一齊食，老闆見倒一定眼火爆啦，於是就捉亞勝去訓話！佢到on居居嘅，做節呢啲禁神聖嘅任務，謹係留比老闆去做啦！一係請示過老闆先，再由老闆話事！一啲面都唔比老闆，想繼續喺呢道做都難囉！

  另外今年生日我勁開心，因為潼潼買來生日蛋糕和我慶祝生日！雖然唔係一大班朋友一齊，亦無伴侶相伴，但喺我已經好開心！因為喺一家人和我慶祝生日！

  呢一個禮拜無咩事發生！無事發生喺一件好事，因為可以平平淡淡過日子！不過無咩事發生即係有啲事發生，其中一件事喺潼潼轉校失敗，唯有接收現實，繼續讀梁季彝！

  另外亞忠終於離職，1號嚟了個新同事，又係叫亞勝！唉！呢個亞勝喺一位老人家，點解？因為佢做做吓嘢會唱粵曲，令到我覺得好煩！仲有我、亞強都覺得同佢唔啱Feel！佢講嘢都傻傻哋，無嗱嗱講咩打仗，又講咩思想開放！佢都傻嫁，大陸咩！

  仲有一樣嘢，就係連亞強呢個無脾氣嘅人，都頂唔順亞激發脾氣話佢！其實係一件小事，亞強聽唔倒亞激叫佢，後來亞強發覺亞激叫佢沖嘢飲，佢就去沖，亞激無嗱嗱又話叫咗佢3次，亞強就忍唔住話佢！亞強話：『我聽倒先得，我都聽唔倒點應你呀，下次大聲啲嗱！』結果亞激就憎恨亞強啦！不過我覺得大家都喺為工作姐，亞激洗唔洗禁小氣呀！講真，有時覺得亞激都幾慘，都想盡量遷就佢，但喺又幫唔落！

  昨晚無意間聽起【好好戀愛】，令我又想起她！雖然知道已經無得回頭，但係我真係好想再見倒她！肥茵帶比我一段刻骨銘心嘅回憶，而我帶比她只有傷心！由相識開始，我、亞華同肥茵已經註定喺愛情三角錯！我和亞華係相識於微時嘅小學同學，而我和肥茵係相識於18、9歲時！唔記得由幾時開始我哋經常三人行，可能喺我最失意嘅時候！其實當時我應該察覺得倒亞華已經愛上她，而我和肥茵當時又因為一個誤會令我、肥茵和亞華陷入三角錯愛！其實呢個誤會她到現在都未知真相，我想她都唔再想知同唔再重要！我記得肥茵話過她嘅第一次會比她最愛嘅男人，而她又誤會我係佢第一次嘅男人！雖然我哋係一夜同床，但係我無成仁之危！到現在她都以為我係…！

  經過一段時間，亞華同我講已經愛上肥茵，問我是否也愛上她！我說不會！其實我也愛上她！只因唔想失去她，所以我說了個謊話！到最後因為媽媽嘅一席話，所以我決心坦白！可惜最終我都失去她，係永遠失去！到現在肥茵係我媽媽唯一一個讚嘅女仔！唯一一個叫我要好好珍惜嘅好女仔！

  經過肥茵嘅經歷，我和亞華嘅關係不知不覺生疏了！其實我應該估計倒，因為肥茵嘅關係，亞華借醉話好憎我，每次啲女仔都選擇我而不是佢！唉！到最後肥茵都一樣無選擇我啦！

  希望以後嘅夜半時候，我唔會再獨自傷感！

  10月2號潼潼終於見專科醫生，得來嘅結果令我有點喜悅！因為醫生話情緒病都唔似，不過要見多幾次先可以肯定係咩事！暫時判斷唔倒有無事，但係醫生話就算有事都係好初期，問題不大！

  可能潼潼聽到醫生嘅一席話，又回復從前嘅傻氣！對的，做任何事以平常心面對，最重要係盡咗力 ，成敗得失都係其次！好似我以前，我覺得都有啲亞Q！因為我覺得盡咗力之後，結果都未如人意都無辦法咖！希望潼潼學懂放鬆，不要給自己太多壓力，一切順其自然！

  係工作方面，又係每日做同一樣嘢、同一樣動作！唯一唔同嘅係有時會見倒老闆發癜，無端端同你講啲只有佢會明嘅說話！佢講完都唔知佢講咩？不過唔緊要啦！佢永遠講嘢都係琴日講完，今日叫你當無聽過㗎啦！都慣囉！另外老闆又無la la 話亞升、亞鳳放假太多！本應係一件小事，但係亞激又可以每個星期六放假。所以令到佢哋之間矛盾『升呢』！杯葛嘅行動『升呢』！而我已經無再同亞激講嘢好耐！點解？因為佢話亞勝X格。唉！就算亞勝同佢意見，都唔洗係亞勝背後講佢壞話！我都覺得佢好過份，所以我無理亞激好耐！其實不單我一個嘅改變，亞強對佢嘅語氣都改變！由百般遷就變成逢錯必鬧！鬼叫佢逢錯必賴，有錯唔應，我想現在只有亞忠會同佢講嘢！講起亞忠，佢又再次成為箭靶。因為佢放假，替工王替佢，自然比替工王講壞話！佢近期又成日做錯嘢，令都老闆想炒佢！都唔知道佢仲可以做幾耐！

  今日係國慶日，但搵唔倒一丁點嘅喜悅。因為我仲好擔心潼潼嘅情況！雖然無想象中那般嚴重，唔係思覺失調，疑似情緒病！但係已經夠我擔心！我知道幾年前潼潼都有那樣嘅表現，我都處理得到！現在我相信都可以，沒有問題！我知道只要齊心，與潼潼一齊面對，一齊克服，一齊行呢段路，佢好快會痊愈！對於潼潼嘅驚慌，我嘅擔心只係微不足道！