一陣放工約左姑媽去酒店飲茶呀
自從上個sem完左之後
就冇見姑媽啦
好耐好耐........
所以等佢去完旅行返黎就約佢去飲茶囉
反正今日又得閒嘛
(其實我成日都好得閒)
一陣就有好多好多野食啦
仲有半個鐘就收工
期待!!!

今日上網睇過d資料
決定都係報會計
而家初步決定係報明愛
一黎價錢都ok
二黎係近屋企嘛
報屋企樓下o個間明愛
如果我冇記錯
720蚊12堂
每堂三個鐘
都ok丫
不過成7月21號先開課呀
好似耐左少少.......
但係如果12堂.....又好似會撞左我返city
所以.......又要再考慮!

其實可以報出面d進修中心
不過偏貴囉.........
YMCA都要成二千幾蚊呀......
點讀呀!!!
工聯會都有
不過過左報名日期啦
又慢左一步

想洗錢都咁煩呀

小簡簡今日去見工啊
唔知見成點呢?
希望佢會順順利利
成功搵到份工啦

我下星期二都要見工呀
唔知我又會見成點呢?
希望我都可以搵到份更好既工
禽日o係度發夢
如果我第二份工有8000蚊
做一年之後
再搵到份工又升到一萬
份人工一路咁升上去就好啦........

開始懷疑自己既能力
唔通我既能力就只係夠做一個TA?
究竟我有冇能力可以做d有得發揮既工作呢?
一直都只係可以做聽order既人
唔可以做到個落order既人????
如果係咁......
都幾悲哀.......

o岩o岩有個冇來電顯示既電話打黎
我就梗係即刻聽啦
(點知係咪搵我去見工架)
點知.......
原來係我張信用咭間銀行打黎
唉.......
已經係第一失望
之後仲話有咩新用戶優惠
我見唔係好忙
咪聽下囉
一聽就後悔啦
真係.....

首先佢同我講話唔知簽左幾多錢
就有幾多次抽獎
咁都算啦
我心諗我唔簽你都耐我唔何
後來就入戲肉啦
又sell保險
又話送乜撿查勿撿查
又話送張乜24小時保障咭
有乜事去到邊都唔駛驚咁話喎
我心諗
到我有乜事o個陣驚o個個都唔係我啦
屋企都已經幾廿萬份保險啦
仲要我買???
落街睇醫生睇跌打都有得賠喎
我有幾可睇醫生丫
佢都傻既

我話唔駛
又問我點解唔駛
我心諗:大佬呀, 唔駛咪唔駛囉, 你個問題就等如我問你點解肚餓一樣咁白痴
佢話住醫院唔知有幾多幾多錢賠俾你
有剩錢可以去旅行
哥哥, 你都唔make sense
呢頭住完醫院
o個頭去旅行???
佢仲問我做咩行業
我串佢:我做文職架, 冇乜風險架
勁煩呀!
又話大家都應該為自己既健康打算
我心諗:哥哥, 我仲健康過你呀, 你講兩句野就喘晒氣啦
佢話意外係預計唔到
我諗:哥哥, 我聽左你個電話都係一個好大既意外.......
唉........

我拎住個電話幾無奈呀....
勁想cut佢線
(不過一諗到佢呢d行業都好辛苦架, 自己試得多嘛)
最後都用我僅有既耐性聽埋佢
我仲好有禮貌咁唔該佢
你睇我幾乖!

今日風采中學打俾我呀
約我星期二去interview
嘻嘻
越黎越多機會
我要加油先得呀!
雖然只係學校文員
但係我諗人工應該都高過我而家呢份掛
不過高幾多我就唔知啦
希望有咁高得咁高啦

今日又係好大雨呀
唔.....
d雨落極都唔完架
返工放工都好麻煩.....
今日我仲要抬部腳踏機返屋企嘛
(惠姐送架, 佢媽媽仲話要掉, 好彩佢眼明手快幫我留返)
今晚就可以踩呀踩啦
減肥!!!!!!

聽日就星期五啦
後日就星期六
大後日就係我期待以久既星期日
哇!!!
如果時間好似d馬趕過終點咁快就好.....
(又係一個好好既時間比喻, 佳作2! )

哇!!!
今晚有bonus
竟然因為天雨關係
賽馬停賽喎!!!
我地8點就可以收工啦
返左2個鐘頭
聽左10個call都冇
就走人!
但係人工呢?
都係出4個鐘錢呀
你話高唔高漲? 興唔興奮?
嘻嘻
佢梗係知我唔舒服
俾我早d走啦
好耐冇試過咁啦
雖然遲d可能要補返一日
但係都唔緊要啦
起碼今晚都係賺架嘛!

偶像話:我唔趕既
我心諗:你跑得咁英都唔趕???咁你自己排隊啦!

翠欣聽日仲去見工呀
咁鬼大雨
希望佢順順利利啦!

今朝落好大雨呀!!!
仲以為紅雨可以放工
呵呵
發夢姐!~~~~

原來今日報科喎
我都唔知
下午我個同學仔carmen打電話俾我我先知
咁就拿拿聲走去霸部電腦
上網報科
報科都好苦惱呀!
唔知邊科好.......
我而家報左四科先
遲d都可能會改.......

今日唔舒服啊.....
女人病
冇得醫!!!
今晚仲有成晚捱........
噢!