宜家係間漆黑內對住部手提電腦，聽住歌咁寫BLOG都幾寫意。
呢個月過得異常既快，眨下眼就四月最後一日啦！
坦白講宜家個心情好想返學，但唔包括兩日後既測驗，
話說呢幾日都溫左唔少野，至少I.S.`I.H.同中史都叫差唔多熟晒，
但唔知點解今次好似冇一科有信心咁樣，日日都擔驚受怕-V-
再話說一年前被慫恿開QOOZA帳號XD我個BLOG終於一歲啦！
果晚曼聯最終係六十幾分鐘連入兩球，史浩克出線都無咩可能架啦，
奈何之後果晚巴塞隆羅靠美斯兩球絕殺係皇馬主場贏左，
次回合皇馬要係缺少拉莫斯同比比既怛況下淨勝三球都難啦，唉……
皇馬除左輸左比美斯果兩球之外，仲輸埋比果班插水怪同球證。
唔通決賽真係要上演兩年前歐聯決賽曼聯同巴塞!?
好啦我都係入番正題先啦，四月十六日係學校既文化體藝日，
簡單啲黎講就係好細規模既開放日，我呢日就以學生大使同表演者既身份出席。
拾壹點鐘返到學校READY好晒之後，就去左音樂室同MISS CHUI報到，
點知佢話RICKY個小號出左少少問題，出左去搵人修理，
等到佢返黎果陣時都已經係表演前既十分鐘，真係嚇鬼死我地，
好彩仲有機會比我地係音樂室練多一次咁大把，希望萬無一失啦！
我地兩個企係後臺果道，聽完合唱團同埋長笛二重奏既表演，
終於輪到我地兩個出場啦，我跟住RICKY既腳步，RELOAD緊個歌譜，
聽到佢數完三聲再鞠躬後，再步步為營咁行下去琴側邊，坐左係張琴櫈道，
好似好專業咁調較左個高度，再安定自己個心情，再同時將彼此隻手放係琴鍵上，
隨後就以最快既時間投入落去演奏個過程度，將之前所練既野發揮出黎，
我地兩個可以話連成首樂曲既高潮部份都彈得唔錯，可以話係淋漓盡致。
正當我地將最尾一個CHORD彈完，再次鞠躬之後贏取一陣既掌聲，的確好開心！
事後聽番原來校長讚我地咁細個就有咁既成績真係好難得，啲嘉賓都讚不絕口。
晏啲食完飯之後就再次番到學校擔任「招待仔」，歷時三個幾鐘，
最初帶黎帶去都係啲外來家長，帶住壹至兩名既小朋友，
而每次講既野都係一模一樣，介紹既野亦係一模一樣，行既路線仍然係一模一樣…
有啲家長仲好詫異咁問我：「係咪淨係得呢個禮堂開放比我地參觀架炸？」
我點點頭再解釋五年先會有次大型開放日，到時先會開放特別室等等既地方，
而今年就只會就住術科去設置唔同既展覽，開放禮堂比大家參觀-V-講完都冇咩癮。
另外就係好多時帶完家長上去，極度簡單咁講解完就會聽到一句說話：
哦，原來係咁樣。得架啦，我地自己行就可以架啦，麻煩晒你:(
正當感到極度無聊果陣時，黃老師：逸章你係度就岩啦，有位校長黎左，麻煩幫我帶佢。
我心諗今次正啦，終於可以帶番啲大少少既人物，挑戰性都高左！
我見到位校長之後，快望佢個名牌，原來係某小學既區校長，
稱呼左佢之後就全程跟住佢行，係有蓋操場佢睇自己班學生比賽，
仲自己做埋錄影果個人，咁我當然全程望住佢揸機，零交流，
後來佢終於開聲問我野啦：請問洗手間係邊度？
我微笑住指左個方向比佢睇，再帶領住佢，其實都OK好禮貌XD
最後我終於同佢逗留左係禮堂道睇管樂團表演，咁我既任務又大功告成-_-
諗番起果次小六學校OPEN-DAY，帶果班全部係救世軍總指標，秘書長……
呢個時候都已經四點鐘啦，人流亦都愈黎愈少，工作量都近乎零。
黃老師見我`RICKY同ALEX咁悶就一齊講番上年既趣事，真係開心！
之後又同MISS IP既前任學生，現舊生會幹事既學長全程用英文傾計-V-
渾渾噩噩咁樣就五點鐘啦，掛係心口個「學生大使」牌係時候除番落黎。
果晚仲同媽咪去左同佢以前班同事食飯，有三個小朋友，
果幾個女仔都好得意，最大同最細果個只不過係六歲同兩歲，
其中一個畫果啲畫真係好令，可以將你好細緻既特徵畫出黎，好叻啊！
呢晚係荃灣返到屋企都差唔多十二點，舅父佢地又上左黎睇波，
奈何呢場足總盃曼聯以零比一比數輸左比同城死敵──曼城，慘。
跟住仲睇埋電視播熙果套鬼域，其實最初真係幾恐怖架。
四月十八日中文說話堂，終於輪到最緊張既即席演講啦，
得五分鐘預備既我要講既題目係你對捐贈器官既意見，
原本以為不妙既我寫寫下愈黎愈多，最後就吹左篇值7/10既野，
個老師仲話我好淡定，但係我覺得自己講講下愈黎愈驚，仲有語無倫次既感覺-O-
四月十九日既P.E.堂唔知點解好多細細隻既小昆蟲，搞到起哄咁XD
而呢日個排球考試都唔錯，起碼有15/20先啦，
最好笑既就係MR.HUNG係咁話我陳逸章，YOUR LEGS ARE SO LAZY……
哇哈哈，太開心啦！佢終於記得我個名嚕。放假前夕果日都係好HEA咁渡過啦=)
呵呵，終於打完呢篇唔算太長既野啦。
咁樣就三點鐘啦，各位晚安同埋測驗要努力喔:) |
