打兩份工，讀兩個短期crouse，
搞自己啲興趣都唔夠，仲要猛操猛谷體能。
我諗，都好難長久地維持我嘅興趣，
嗜好未免太多喇；為左更上一層樓，
真正考驗意志力，唔知頂到幾耐，亦唔知要放棄邊樣先。
好多嘢想做，好多事都想做到個成績出黎，
可惜一次又一次令老闆失望，但係佢無怪我啲乜嘢，
而佢愈唔怪我，我就愈自責。
唔知係咪有被虐傾向鍾意有人鬧，
我會鵪鶉，但同時又會暗爽。
無被虐嗰種感覺點會鍾意痛楚嗰種快感，
可以忘記一切，專注於疼痛。
好想再跑快啲，再舉得重啲，有更多耐力，出拳更快。
拍更多嘅片，影更多靚相，繼續執導，
未必可與各大導相比，
只想與hip hop一樣，將文化傳承，影響大眾。
講起hip hop，要同畫畫並存（我一直都係咁認為），
唔計塗鴉，我唔識，唔知由幾時開始，
寫歌詞要有文有路，有頭有尾，文雅，我就會畫畫，
那怕係畫條錦鯉，畫嗰時嗰種心情，用嗰種顏色，形態，
全部只有自己先知，以為我真係齋畫條魚出黎咩？
絕對唔係，每一條，係將當時遇到嘅事，抽象化，
如果唔係，我唔會話呢條係咩品種，嗰條又點。
有人問寫歌詞可以點樣先有靈感，有人話作文，我就揀畫畫，
靈感要到就到，一有靈感，詞就不自覺精密起來，
句與句，字與字，聲韻平仄，高低抑揚，正。
有起承轉合，有故事，津津樂道。
講返工作，子承父業一般黎講都會見慣，
但一個咁追求感覺嘅仔要做啲硬橋硬馬嘢就…
非自己興趣，係份糧頗為可觀，
話唔定幾年後phase one都買到返黎。
其實搞咁多嘢，都係為左瑤瑤。
做一份非自己興趣嘅工，係想證明自己有能力養佢，
繼續拍片影相，係自己專長同夢想之餘，
亦想將佢曾經同我一齊有過嘅夢，延續落去。
未試過投其所好到，關於佢一切鍾意嘅我都去知，去睇，
鍾意筋肉，就加快節奏，食更多，做得更密，
或者將本性扭曲去遷就佢，
但撫心自問，唔係想有錢大大隻隻咁咩？想阿，
再配合埋說唱技巧，夢寐以求嘅rapper格，就係咁樣，
其實數數下，並無扭曲，只係催化，係短時間之內達成。
至起碼佢話唔鍾意hip hop，我無封咪。
近來有人問，「見返有無心動阿？即係點架？咁阿瑤點阿？」
嗱，我一開口實有人話係歪理，係佢地唔跳出個圈度啫，
見返小公主我係開心，無心郁，係仲鍾意佢，100% sure，
係會為佢將來，情緒，去向著緊，但唔會追，唔會撬，
反倒人地男朋友開到口，eg搬屋，結婚人情，影相之類都會幫。
由小公主有拖友開始，我就唔想佢地分開。
我係愛小公主阿，不過我已經有瑤瑤。
「係呀，無人比得上佢」
如果下一句係
「但係我愛妳更多。」
會唔會分手丫嗱？
老實講，我未試過投其所好嘅程度係咁無譜，
keep it real，但感覺呢味嘢，都好real，
你想知點解會令佢咁鍾意，你就想變得同佢一樣。
不過咁，公務繁忙，未必可以再見到喇，
分左手都仲拖手行街係街邊攬到實。
無道德似乎會玩殘自己，
或者唔係無嘅，係仲未到底線啫。
我唔要轟烈，只想廝守。
| 
