早幾日考試，如無意外應該炒左。
是但啦，當讀多次。
後來，連日內有人搵我要我摌旗，
有人搵我剪片，由比市價高去到又臭串又覺得易比百幾蚊一個job嘅又有，
到到再過份啲打人情牌「幫」班中學生包生仔免費又有。
我Hi，原來我係佢地眼中係咁得閒，
定係我一直keep住有唔同貨出所以會令到佢地咁諗。
我自己仲有段片阿…
到我要搵人又放飛機啦實行…
有人搵我做攝影師，
今次係除左判頭以外，再有人搵我影，
類近係要影耳機影音響嗰類，
未開價，但講到實牙實齒，好多佢認為係公司機密嘅嘢都比左我睇，
再問埋有無model介紹，
holy shit，我第一時間諗起女朋友同佢個妹，仲有小公主lol，
痴線，已經完左，做乜春咁多心，
拎住個耳機影幾張硬照打個brand出黎，
成功左嘅話做地盤只為過日晨，盡孝道，
砌到個好劇本，齊人脈就可以唔做，日日度鏡roll機。
若然全世界都配合到我，我又可唔可以保證拍到一套好戲呢…
無辦法保證，但我會試。
自己單拖，當然無理錢呢回事，反正從來唔缺乏，
但講到要有另一股能耐，就要比而家多數十倍甚至數百倍嘅錢，
終極目標除左有頭家以外，就係有自己嘅studio，可以做production，
容納到一班人影打靶相，錄音，畫畫之類。或許，係長輩眼中係異想天開，
我淨係想沖過去，加快步伐迎接死亡也好。
反正係某啲人心中我死左都唔抵可憐haha
可惜其實我缺乏相關智慧去達至成功，只知道要做落去，要點做就仲摸緊。
有錢，我出歌就會方便好多，
有錢，我就可以養起成隊人，
有錢，我唔怕無女，只想搵返想要嗰個啫。
同樣地有錢，我怕會爛滾爛賭食煙飲酒，無哂應有嘅道義，
甚至比而家更目中無人。
無錢有無錢嘅玩法，有錢有有錢嘅玩法，
既然瑤瑤有咁多男人爭，我就更加要有多啲錢。
幾年前未必會諗住去搶嘅，但唔去搶過就比人話傻仔，
到去搶嗰陣就會有嗰股想死嘅感覺，夾雜些少快感，
如果唔得，一手催毀自己所建立嘅，
然後一直記住，再回憶返，就件件事都甜。
好似好變態，但係除左咁，無咩方法可以令大家都舒服啲，
而且一直深愛著。
關於model方面，老實sexy相我唔會接（真係有呢條線），
但係點開口同小公主講係一個問題，益自己人好過益街外人。
亦有人叫我扔十皮野出黎救陣，三個月後就唔駛做每個月奀奀腳有幾萬收，
即係咁講，講就講得好聽，拎十雞嘢著草我都吹佢唔脹，仲要等三個月。
另外，爸爸打算係今個禮拜約齊佢班同行老朋友一齊食飯，
係唔多關我事嘅，但係成個家族咁多人就係都要帶我一個出去，
睇黎爸爸唔淨止想我承繼咁簡單，直頭想搵方法讓個位比我咁。
話無壓力就呃人啦。
情況同上年一樣，一係無機會，一係就蜂擁，
戀愛也是如此，最後我揀左嘅，處理得唔好都係萬般皆收皮，事業亦然。
盼望，會見證我成長，並冰釋。
| 
