突然諗起拍拖嗰陣有啲嚴重錯誤，

然後，諗起自己有咩做得好，

再諗起，砌到更多嘅畫面出黎，

多想仰天疾呼一句「唉! X街 !」。

 

一直唔敢諗太深入，

尋日向債仔朋友收數就順便傾下，

傾嗰陣無嘢，傾完到夜晚，至到而家，

慢熱、反應慢嘅特質又出黎，

夜晚瞓唔著，朝早無心機做嘢，

何其想死，想打一年前嘅自己一身，

心腸又再度被廝裂，ya dumbass 

 

由諗極唔明有咩做錯，家陣好似再明多啲咁。

灰到核爆。

我係十萬個唔應該由女朋友迷路，

即使兄弟們有咩事，未去到死人冧樓，

就算係急事，都可以推呀！！！

 

然後，我改變左女朋友嘅脾氣，

跟住，大家各自旅行，佢遇返初戀，就係咁樣出事，

諗左好耐，係咪我改到佢唔再咁火爆，

佢個初戀又受落而犧牲左我，

佢因為識到我而唔再做烈女，

而我就變左烈士，仲死得非常壯烈嗰隻。

 

諗諗下，由一向被視為教會癌細胞，

再跌落新低嘅狂派領袖，即將變得更差。

 

我教好左佢，而女朋友就帶壞左我。

未至於撤底，起碼有唔少觀念都因為佢而變更。

 

過幾日就考試，我心諗再分心就死梗，

偏偏就係而家發作。 

 

嗰股交纏嘅感覺仲刺住刺住，

梁朝偉同黃子華係戲入面分別揀左個樹窿去講心聲，

而我，就揀左網上世界去宣洩，

而呢度就最多，未算係最齊，更隱悔嘅就係歌詞、shortfilm、相或畫作入面完全呈現，

滿是悲喜，亦盡是黑色幽默。

第一件，錄音室搵我做freelance，

幫出版社剪宣傳片。

 

第二件，判頭打算係今個禮拜六夾我上大陸，
去夜總會「幫」佢班姐姐仔影硬照，
但我只係覺得呢件事極度硬膠。

 

第三件，錢

 

連公司聚餐都要我出手，某程度上，
都算係好事黎，對實力及口碑係一種認同。

 

班小姐有著衫嘅，但係我唔知有咩報酬，
或者係免費有幾cue ，有無限煙酒。我覺得呢啲獎賞，
尤如地獄般。

 

煙我唔會食，留返條命拍戲比較好，
反正兩樣嘢都係鬥早死，我梗係留比夢想；
嘢我唔係唔想搞，我愛女人，但係唔係自己嘅我唔會搞，
就算拍拖嗰陣攬下腰，錫下嘴仔咁就夠，
㩒住自己囉。
酒，我唔係唔想飲，諗住自己有把長髮，就係咁先。
或者簡單啲講，衰其中一範星期一都要變光頭仔。
除此，我更有負爸爸嘅期望，得罪上帝都不在話下，
諗起有兩個女仔，我就更唔想打洞。
假若沉船，我呢世人就收皮。
我知我心底有幾想食女，所以先淆。

 

好想同小公主講嘛，祈個禱都好，又唔知點開口，
呢啲非去不可嘅情況。

 

唔知係我太柒定有才幹，咁都相中我，
做老闆應該有錢請攝影師阿⋯
比佢知我識networking寫program仲得了⋯⋯

 

老實講，我只係想做個導演仔啫，咁多dirty job嘅，
即使係剪片，興趣不大，捱義氣啦，鬼叫friend。
做到自己想要嘅嘢之前，做住先。

 

啲job一係搵極都無，一係排山倒海。

 

第三範，錢。

本來唔多著緊錢呢回事，畢竟係執行夢想嘅動力來源。

略為計過條數，原本每個月穩袋三千幾嘅數目被cut走，
預計至三、四月先可以有返，第二期學費又要交，
拍戲開支，仲有要收返條過萬嘅爛數，
我連爭幾十蚊嘅得果定我都計住，你話我狗咩？we are same，
皆因你臭串我先記住，無叫人還唔代表無呢回事。咪扮尚菜。

至傷莫過於有條友走數，
headphone 市價賣緊3400(around)，
識人有平買入34盒，原來屬次貨，
條數我頂，冚家祥無肉食倒貼車馬費都仲要賠錢。
因住義氣無錢，亦間接因為義氣無左女朋友。

再夾夾埋埋之前訂嘅線材到左要拎去整，
手工費，維修相機同買附件條數又無左五千。

其實阿，我應該要盡快填返份老婆本佢先啱，
首期又好，刺青又好，總要有返幾個錢，方便行仗義。

我唔係唔識理財嘅，每次大額輸出不外乎嗰啲原因啫，下話？

只係今次一次過出現，就試下窮嗰種感覺。

以前永遠得幾百蚊係身都可以過得好開心，
而家袋住超出呢條數幾倍至廿倍都覺得唔夠。
呢兩個大分別都不過係相距無一年，我好需要妳開解。

至怕，將來有錢就唔認人。

 

係我變壞之前，
我依然愛我愛嘅人，
我唔知會變成點，我要妳幫我阿…
我只想幫判頭做左佢啲門面嘢之後，返工都會聽話啲，
而且追左咁多次叫我去，
比比面識英雄重英雄啦，若然係器重我的話
當有女有酒水唔駛錢嘅誘惑，至六七十歲都會面對，
黎得一次，就有第二次，所以，磨咁耐之入去，真係唔鍾意做，
係夜場比女氹幾多萬一個月都無用。

 

講真，我唔想敗走家族名聲，期望把持得住。