今日我都係要返工，風球過去，我朝早起身既時候，我都仲係要面對下雨既問題!所以今日我都係著返條短褲，始終短褲搞到褲衫，都唔係一件舒服既事，不過換黎另一個問題，褲袋好淺!
我今日係公司其實都幾悶，因為返到去都係冇野做，所以我都係聽師傅教野，我就當然係咁悶既環境，盡量係保持冷靜既心態去面對，幸好師傅係好鬼馬，我亦都覺得好開心!
好啦!收工啦!不過都成2點鐘，比預算既遲，不過都唔緊要啦!反正去青衣既習武活動cancel左!返到上水既時候，我就打算搵午餐地方解決，咁我首先去到鴻利門口，不過呢我一諗起當時鴻利既高妹，我頓時唔覺得開心，始終佢好黑人憎，亦都令我覺得好難受，講真開工飯又食唔到，挨肚餓做野去到4至5點先至有得開飯，唉!做又做得辛苦，人工又雞碎咁多，回想起以前辛苦地一個鐘18蚊，頂到去22蚊，真係唔知自己點解個時會頂得順!
當然今日自己係GCS做，食飯時間定d，做野做得舒服d，當然又唔會太辛苦，講真拉線、沾制 、組裝UPS之類又有幾難?
最開心都係今日師傅教我夾RJ45插頭(即係大家平時電腦用開既上網線個插仔)，其實整呢D插真係易到PK，咁我簡單講下個做法!
首先將LAN cable內8條線開線，分開哂白藍、白橙、白青、白棕為為pair，之後就要同時水平剪到齊頭，就好似近期女仔個頭咁要平陰既，如果唔整「平陰」呢，係一定入唔到插仔，之後就排位，次序係白橙、橙、白青、白藍、藍、青、白棕、棕，之後就要用RJ45夾夾實佢，完成!不過之後就要做QC(最後檢查)，方法就係用「他標」(即係電壓計)度度，睇下佢到唔到電，有電到就岩啦!
我今日食完飯之後我就去左孖8尋找娛樂玩灣岸，我打完機之後就蝦碌啦!電話呢?唔係褲袋既?之後我就係孖8係咁搵，不過唔見wo!之後我就去電話亭試下打返自己手機，冇人聽!之後我再試下返入孖8搵機，條友仔我知佢係邊個，佢係我做舊書店時阿ben個朋友，當然佢真係友善咁同我講話冇見過我部機！我之後再慢慢諗，我係食飯既地方英記仲係到，即係無可能啦！
最後我再返到孖8，望一望機底，有發現!部灣岸機既座位底有我部機，哈!失而復得!首毛先就好好彩既係灣岸機不嬲都係嘈到七彩，如果唔夠嘈我部機就肯定比人落左隔，第二係好彩比人踢左入機底，符碌到不得了!如果唔係我3000銀一部電話就咁泡湯啦!
|
