今日我又好唔願意咁樣去做尖沙嘴既mission，講真連我師傅都話:入行43年，一向都未遇過呢個咁既難題
的確呢個煉獄，簡直唔撚係人做，由一開波開始，我同師傅兩師徒一齊上到去，裝修師傅先至岩岩到場開左少少步，結果我同jimmy落到場真係好無聊咁做左個door phone1個條line，個一刻真係覺得自己成個白癡咁將條線拉拉下，講穴都唔係咩大作為。
好啦!第二次上到去，我就見到d裝修好睇左少少!我開始睇得明個拉線運作，之後其餘既時間都係去拉線入房，入插頭，直到今日啦!
咁今日有幾樣野令我幾唔開心既!
第一，工作地方有冷氣都唔開，我覺得係瘋狂，我做電話既仲話可以唔洗大動作周圍走，但清潔部門的阿姐，佢地出力清潔既時候真係好熱，我覺得作為業主，應該要體恤一班員工，為工作環境好d又好，為安全唔洗中暑又好。
第二，今日同師傅一齊分線，等我解釋下咩叫分線，電話線基本上只是用藍色及白色幼線，一般情況黎講，電話線有4芯，4芯即藍，藍白，橙，橙白線。如果用一般電話線，基本上只係簡單地將藍色同白色"沾制"上合適既位置就可以。但係而家就情況唔同左用電腦常用的8芯線，我地要將藍白抽起，將其他色線分隔開。(足足做左成個幾鐘)
第三，個客雖然對一般既事情都滿意，但都有不滿既地方，例如door phone位置未整好，同時door phone位置個客話唔正確，咁就仆街，佢指既地方我地冇拉線到該位置，而家就真係要驗floor plan，睇下係我地電話呢邊唔update，還是裝修公司唔update，還是個客錯!
第四，其中一個內線位置壞線，呢個問題可以話幾大劑。因為唔係咁簡單地將壞線拉走，因為中間會有轉彎位，同埋紮緊的位置，最重要既係個場既裝修已經裝修完畢，按道理其實係唔會再有咩大型製作，而家先黎搞d咁既野，真係好得人驚，我師傅已經搵「追雞」追過(有訊號冇氣到)，重新"沾制"沾骰仔，我試過電話係運作正常，但係問題在於條線係壞，情況直頭冇氣到，不論電話及電腦位置。
第五係我覺得最火既地方!波叔，即係我阿頭就話:呢d野等裝修組阿頭再搞，我心諗人地撚識我地呢行既事咩?叫人地出線上線，埋尾我地"沾制"set埋電話，我心諗:佢都癡線既!邊有人會咁樣同你做ga?
按正常情況，應該波叔派我同師傅或者其他技術人士去同我一齊完呢個問題，我按道理都係應該由公司攞好哂線同其他裝備出發再到尖嘴處理。而家線由唔出，人唔洗到?咁工程咪無止境咁拉拉扯扯?係法律上，如果個客真係要告，我地既罪名係拖延工程，賠水都賠死你!不但止，公司聲譽會大打折扣，到時會無裝修公司願意跟我地合作，咁當然係一件好大鑊既事啦!
呢單工程，其實係做就做多多，賺就賺雞碎咁多，係唔好做既生意，本來師傅都提示過波叔推左佢，波叔硬要接，唉!而家有咁多問題出現，咁死火啦!我明天仲要繼續面對，諗起都覺得得人驚! |
