今日一早起身就返左學 ，上中文堂，唉!我其實都冇咩心情聽，講真中文堂實在太悶啦!我都係為左出席率先至返，其實我覺得返學咁悶，早知就直直接接咁樣去打工!
算!講下第二d，咁今日我上埋電腦堂，就同sky、旦丁加阿聰去左觀塘，咁我地今日係去勵澤買野，我係打算買功夫褲、鞋同埋買對雙刀比細佬，始終細佬係未有經濟能力買，咁我反正都未送生日禮物比細佬，順便一條龍做埋!
去到勵澤，徐師傅就介紹左好多唔同既產品，我睇左好多功夫鞋既款，咁我覺得現代化既功夫鞋，個色水比我印象嘛嘛，反而傳統既鞋令我非常喜歡，一黎就輕巧，二黎方便著!向來我都係一個懶鬼，我係希望簡簡單單就可以!
咁功夫褲，開頭我以為得太極既套裝，但我一問起，原來徐師傅有來貨!我當然好開心，我仲即場係鋪頭廁所試埋換埋，嘩!著左等於冇著，因為實在太輕巧既關係，而且又好通風，正!
之後到細佬揀雙刀，八斬刀佢唔鍾意，楊家刀又唔岩，太極刀更加冇可能，只有中國大刀先至岩洗，向來中國大刀都係比較係練習用既多，點知原來係硬刀都有，真係好，仲要有一鞘兩刀既聰明design!320蚊，抵玩!刀身長，而刀柄適中，真係做得好!
最後sky仲贊助左一隻VCD，係講刀法既，我覺得係好好，講真我學拐，真係好多野都係食自己，由人手寫紀錄，加以練習，再思考點寫先寫得出!書、光碟又冇，如果去武館學，又未必有師傅肯教!
當然今日係我覺得好開心既日子，我覺得今日所做既都係十1分值得，錢花多左，但係換來一個開心，咁又有咩所謂?
|
