我岩岩放工返到屋企，想同大家分享一件我半夜係公司既趣聞...一個流連係網吧既小學生!
咁呢個細路就係我上水明珠既公司盤對面既一間網吧流連，原因係佢老豆老媽子趕佢出門，唔比佢返屋企，結果呢個細路就打算係網吧到宿一宵!
開頭，我就企係門口，透下氣!順便同陪下阿寶煲下電話粥...個細路就開頭問我借2蚊，我就諗...呢個細路應該係打算江湖救急，找埋條數就返屋企準備明天返學啦...咁我借比佢，佢返入網吧!但好耐都未出黎...
我諗:「呢個衰仔似乎想係到通頂wo!」
我出黎透完氣，回巢望下cam坐下!點知個細路今次拍門入黎，我以為佢遇到d咩困難...原來佢今次想向我借18蚊...佢話要打多幾個鐘，支撐到早上返學...
18蚊?你當我開善堂咩?我直鬧呢個細路...何況，呢個細路佢出意唔係話返屋企，而係繼續走向錯既方向...我提示佢，不如去老麥坐下，起碼個邊都有個位，你可以飲杯水...講真網吧一d都唔安全，個間野經常性比我見到d友仔係夜蒲兼「上電」，呢d小朋友最容易成為「運輸大隊長」
好啦，後黎我見到門外有警車黎啦，我就諗:「傻仔，差佬搵上門啦!冇錢找數，人地肯定報警掟你走...」
結果，呢個細路就比差佬夾左上車啦!
我既結論係同屋企人嘈，講真你唔好諗住去呢d地方做避難所，一定出事!你以為打機可以磨時間，其實呢你打到咁上下對眼係會好鬼累，當你累又無錢食野，又無錢找數，自自然就會好快見差佬。我自己以前都好多呢d經驗，咁我就當然冇佢咁傻去機鋪或者網吧...我會選擇係屋企樓下一d唔當風同埋唔多蚊既地方避...
當然係唔會係天台個層啦!走上天台個層，雖然我個邊係地方夠哂大，但你要咁諗...天台高空，肯定係會入風，冬天就肯定凍死都似，所以只可以夏天上，咁冬天就應該投向低層，有幸我屋企樓下有小地庫既，就係會所壁球室!
其實如果壁球室有時冇關閉，冬天夏天都係一個好選擇，因為壁球室係有冷氣既，如果開到個場就固然好啦!開唔到既都唔怕既，係樓梯底都係一個good choice!第一，你唔洗係公園餵蚊，第二有高度安全性，都無人可以對付到你...第三，你唔洗怕無人招乎你，因為有保安員巡邏，咁一晚起碼都行一轉，你唔洗怕冇照應...
可能有朋友問...喂!打比d朋友、親戚救濟下都得姐?如果係我既情況可以既話，我早就做左!朋友住樓上樓下鄰座既都有...但係你打搞人地呢唔係咁好，況且當年我老豆真係癡左線，經常性係咁掟我出去，咁講真d老兄都頂我唔住啦...我都唔好意思!
親戚方面，最近果個都要羅湖...留返比你去啦!入去起碼1個鐘...半夜唔洗訓咩?遠少少就去到大埔，傻既咩?唔係市中心呀!係汀角路呀...點去呢?
呢d先至叫做上策!
其實如果要避難既，其實可以考慮咁，係上水既是旦一間麥當當叫d staff比杯水，之後就係一個角落小睡，但係我深信呢個方式唔長遠，咁你可以考慮去到街市平台公園，個到有地方可以坐坐，但係只限於夏天，冬天果個地方超凍...
如果有200蚊至300蚊，可以考慮到上水酒店訓，咁我見環境都可以架!
其實都仲有好多地方既，不過就係話要諗一個長遠少少既方式點樣避，最主要就係你要有足夠衣物，同埋你能夠處理你既日常生活!
|
