今日要講d嚴肅一點的事，我阿婆終於係2010年8月18日下午5時27分仙遊左，有幸離去的時侯都很平靜，亦無過分的痛苦同埋傷心，總算叫做安心上路...當然，我阿媽都好難過，亦都係醫院有唔少落淚既情況，我二舅父就比較激烈d，喊得個情況都幾緊要，的確我二舅好鍚阿婆。
係到講下阿婆今日既情況，我今朝收工，返到屋企發覺冇人，咁我知道細佬多數都係去左女友屋企，我當時估阿媽就可能去左返工，咁呢個情況都好正常...但之後我收到我媽既電話，咁我就知道大事不妙，阿婆唔係好掂，我當然滾水碌腳就去醫院，咁阿婆係由北區轉介去左大埔醫院，我早之前就諗平時阿婆病，佢都係由老人院send到去北區醫院，好少會話加碼...
我朝早見到醫院入面既阿婆，扯蝦扯得好勁，亦見到佢個醫生配發既氧含量去到5度，我知道5度係惡搞既情況先至用到...咁我同阿婆講:「阿婆，早晨呀，我係軒仔呀!我黎睇你呀!」
講真呢一刻，我好難過，因為我真係未見過阿婆咁...亦都係諗阿婆由我細個認識知道果個係我阿婆以黎，今次佢應該最辛苦既一次病!佢講唔到野，佢係氣管同肺有事，好多痰個d，雙目病至不能開眼環顧四周。一直以黎阿婆雙腳都係因為年輕時過分勞動，導致雙膝嚴重退化，行得唔好，甚至最後的時間已經唔可以走動多過100米既範圍，都係風濕關節炎既事。
還記得...阿婆係我同細佬細個時候，買得最多比我地既係益力多，個時細個都知阿婆係行得嘛嘛...仲好記得阿婆個時由羅湖行到出黎上水，佢會篤住一把爛遮，拉住一架手拉車上去我個時彩蒲苑既屋企，個時我有經歷呢個情況既歲數大概由0至5歲，細佬個時就真係好細，由0歲至到1歲幾岩岩識爬識行幾步個時...而家諗返起，只能夠從生活中的益力多回味阿婆當日既點滴...
咁近呢幾年，阿婆都病得多，基本上由基本行到幾步，去到而家唔行得，聽阿媽講最近阿婆係得返少量既聽力，即有撞聾既情況，眼因為有白內障睇唔清，記憶退化...我仲記得最近見到阿婆個次，係鴻仔表哥結婚個次，阿婆已經記唔清我係邊個...細佬都唔多記得，我表弟為為都係只記得佢個朵「扭計大王」...
咁尋日下午5點幾，我去到醫院見到既阿婆，已經唔識郁...我摸到阿婆既額頭，只有些微既餘溫...阿婆真係走左!
咁之後我地成家人加埋d親戚去左太和個邊晚飯，有幸每個親人都食得還好，總算可以開懷傾到計...
到我地成批人走各自返屋企既時候，我打比我女友阿得，講真我內心唔係好平復到，我想去佢個邊陪下自己，至少自己身邊有個人支援下，但係女友居然係用幾個理由解釋自己唔出黎既原因...
1. 我未化妝
2. 家陣都好夜了，你過到黎都11點幾啦
3. 我樓下個邊環境唔係幾好治安，怕你有危險
4. 我夜晚唔出街架...
呢幾個理由...講真我真係撞火...，我直接罵佢，即係我覺得呢d叫做「人性既表現」，身邊最錫自己既人，到有困難既時候只係顧自己既利益行先而莫視左人地既需要。作為一個女朋友，係唔係應該呢一刻走出黎，睇一睇男友點呢?關心一下對方，希望從傷心之中走出陰霾，但係佢家陣只係顧自己既情況，就算係真係忙，係唔係應該放一放底手頭上既工作，係咁依關心一下男友，比對方得到一個最大既安慰，同時亦都要諗下有咩可以幫到手...係咁依如果我真係喊既，紙巾同膊頭比我頂下都好呀!完全冇囉!
最終，佢居然話:「我好火滾呀，唔講啦」作為收線既埋尾...呢d女友，分手啦!我係sms話:「我接受唔到你既性格，分手啦!」佢居然話:「我都接受唔到你自大既性格...」「分手啦!」呢d咪就係自私行為...漠視人地既困難同傷心...一句安慰說話都冇!
即係我覺得朋友陪唔到自己，唔緊要!朋友可以有理由推，女友...我視之為半邊屋企人，但係尋日係令我最傷心既人亦都係佢...
尋日，有幸梓雋陪下我，我地踩下車...去左孖橋散下心...呢d咪就係做到野囉!加分架，雖然唔係d咩行動，係咁依遊下花園，我已經覺得夠哂皮...
咁阿寶尋日都有係msn同我傾，聽到呢個情況，佢都覺得無謂再理呢d女友，講真係人都聽到覺得撞火!
有幸阿得未踏入過我家門，否則佢真係好痛苦，因為我家族既人係好講紀律，好講尊卑禮義，團結...由其係我二舅父，比佢見到咁既女友，我比人插到彈起話我點揀人，我諗二舅佢真係會直鬧我女友，因為比佢見到無人性、無愛心既事、唔符合人既原則，佢真係會鬧到你躂皮。
有幸我阿公都過左身，因為我阿公真係更嚴，佢唔會同你客氣，好簡單食飯冇規矩，佢係真係走過黎將你既飯擲出門外，趕人走!甚至當狗咁打...客人或者唔會打，但係咁既女友若果比我阿公見到，佢真係唔洗過門...
至於我父系個邊，係因為人多，會出現集體杯葛!仲大鑊，例如係一班親戚食飯，真係會話:「邊個比你埋位?」「邊個比你坐?」呢d就係分尊卑有紀律度好重既屋企，咁講真阿得係一個咁無紀律心既人，連自身都搞到pat屎既人，我點比佢過關...佢行入我屋企門口我都要考慮一下...
老實說，有幸我家規嚴，令我個人有返基本既自律，同埋好少要令屋企親戚擔心。
|
