係6月24日，一個好平常既下午，我同我細佬去左創新路練車，不過就發生左一個不愉快既結局...我炒左車...
事原係咁既，咁當我同細佬練到第3個圈既時候，我就係創新路迴旋處埋尾兜埋返公廁諗住收隊返屋企，點知我就係咁個時候出事啦!係迴旋處就快出彎個時，其實已經行左迴處8成幾就快出圈，我失控撞埋欄河，人仰馬翻，當時車速最後一刻睇到係43km/h。
意外中，我右面擦損(極輕微)，嘴(撞腫)，右邊門牙(撞鬆)，左臂後近淚下即肱三頭肌位置(擦損)，左手腕同手掌中間(擦損)，右臂老鼠仔位即肱二頭(撞瘀、擦損)、左大腿後二頭肌(擦損)，頭頂(受到衝擊，無傷痕)
有幸，我當時係有戴時間賽頭盔，亦都係意外後頭盔有表面有三處強勁既凹陷點，最強位置深度有約5mm，呢點如果自己真係咁抵死唔戴頭盔既話，必死無疑。另外頭盔係內部係睇到裂左，呢頂GIRO時間賽頭盔...真係硬到飛起，我無野好講!無佢我諗我收左工好耐啦!日後有時間想係頭盔簽個名既，搵我啦!
另外我覺得係好好彩既係，我當日無著靚車衫(環法個d)，不過就失去了一件當時係震揚買既一件黑色車衫同黑色車褲，兩件野同樣係total loss...
亦都係失去單車眼鏡，亦都係好彩戴左舊個個先黎炒...呢次炒車好似專炒爛d舊野...
個時我炒完直滾入草叢，咁有一位熱心既阿叔幫我揮手叫警車(電單車)黎，亦都好快我比白車佬送左去沙田威記。咁我去到威記，急症好多人，咁個時我電話基本上係咁響，因為d朋友已經知哂我出左事，包括臭軒、無名、阿寶、阿然、細B、B叔(細B既爸爸)、我阿頭新哥...反而自己喜歡既阿得，卻係唔太著緊既態度，我打比佢個時，佢係旺角信和...佢係有少少擔心，不過我覺得一場意外可以睇清人既內心想什麼...其實人地都無心理我，只係當初我唔開心，佢只係一個安慰心態比我感覺開心d...
相反地我覺得最錫我既人係阿寶，即係佢比我感覺係朋友之中最親切，或者識得耐左，佢最了解我既想法同需要。
之後個晚都11點先返到屋企，返到屋企，其實架車真係無乜點傷，只係斷左一支後鈴線...頭布爛左，其實其他地方都無乜大礙...花左d野實有架啦，不過都係雞毛蒜皮既野...
6月25號，我11點幾先起身，我同細佬推左部車去山車堂做維修，龍爺雖然有DT線，但係無我條鈴既扭線匙...
好啦...個D我只好去飛球尋求解決方法，不過大前題搞掂左個人先，隻牙FING FING下，好難頂...之後去左廣記食粥都無咩胃口...
醫完肚，我同細佬去左威記睇牙，醫生即時同我搶修返隻牙...咁佢起初同我打麻醉藥，打左3槍...個下真係眼水都出埋!因為個d藥係直打神經線，真係痛到媽都唔認得...
之後我照x-ray，結果係好野，無斷牙腳同牙骨，都已經賺左了...
咁醫生再黎幫我睇下點樣還原返隻右門牙，咁係麻醉藥之下，醫生用陰力用手指一托...GOAL入波1:0(響應下世盃嘛)，醫生幫我打返原位，之後佢就用威也幫我以一拖一既形式，即借左門牙做支點，縛埋隻右門牙...其實d威也都幾大力下，醫生幫我整個時，咁有d位要用少少力扯，我個頭係比佢扯動了...魚絲咁細既威也，仲大力過單車個d威也線...
咁我之後同細佬直出飛波!咁我好有運見到師傅光，唔係光頭vigar光，即係暫時香港即鈴即得最快既人。咁我問佢點樣搵個條唧鈴匙，佢就講比我聽要買park tool個支批仔...120蚊!本來我都想見證下師傅光d手勢但佢收費50蚊一次，真係好貴呀!
之後買返個水滴盔...今次我買左白銀色!轉下款都ok唔錯...
返到山車堂，龍哥幫我再唧返條鈴，咁其實條鈴都冇咩大問題，整返好d線，又唔係走哂位既...唧返硬又用得...
之後我仲跟山車堂去科學園玩車...d車友都問我:「做咩傷成咁既?」阿鬼哥最好笑...佢話:「搞錯呀水滴...傷左都可以咁快?」對，這就是我，就算好傷都好，我依然都會照玩自己喜歡既運動...
這就是我... |
