尋日我自己一個出左去沙田操車，路線主要係由屋企至沙田孖橋，咁之前個d我唔講啦!來來去去都係大窩西...
由元洲仔一出都未有咩問題，但係一去到創新路門口附近，嘩!突然間有個阿叔踩住部XC殺出黎，咁我見到筍野wo!梗追啦!之後就吊係尾，我就睇咪標...平路50km/h，我無野好講，追車用細車黎講都算係幾誇...之後我地一路都係爆出去，沿路個d阿租已經嚇死...講真佢地唔明白單車有機會係等於一架車既速度。
之後我上頭諗住趁機睇下有冇機會放飛機，點知佢一路都吊死尾...唉!死火，呢個對手都幾難扯得走!咁我已經入爆哂大餅同細飛，我個部而家係406細車用56/42拖11-23...反觀對方阿叔部大概係28吋mtb幼胎大鈴，用3疊餅大概係42,32,22拖9飛...個下佢仲未入爆波架...好明顯我輸蝕左係輪徑上。
一路上40至43鏟住出去，呢個阿叔打風都打唔甩...我苦戰當中，大直隧道我本來打算用爆速放飛機，都唔得!
之後，我地去到孖橋最後100米裂紋紅地，佢以輕鬆姿態從後突擊，我本來諗住由頭帶到落尾，家陣似乎有d野要改寫...最後我自己要輸2至2.5車位(車位以標準格式公路車計)
咁我係賽後都有同呢位阿叔傾下計，呢位師兄叫阿鄭，有咩名堂我就暫時未知，有機會真係要再見到佢先知...我就只係知佢個架「飛機」係咩料...如下:
1. 國產Ti- bike MTB車架
2. shimano DEORE XT 三疊餅(估計42,32,22齒數)
3. GUB 紅殼陶瓷BB
4. 9飛DURA ACE 飛輪
5. 馬牌28吋胎
6. MAVIC鈴
其他個D我都唔太留意，不過以上6項足以打沉小輪車...我無野好講，太勁了...
第一我輸科技，第3項GUB陶瓷BB其實現時都係一個大熱門選用既一個武器，因為呢個BB的確係又平又抵玩，好似唔知600幾蚊車鋪價已經有超值既回報同效果。講真一個阿叔4章幾5章都就到既阿叔，但轉數拍得住一D好似我咁後生既車手轉數，你可以諗陶瓷係可以屈機成點?
第2，我輸輪徑，好明顯呢場係不公平比賽，但係我唔會介意，講真大家志用道合既，一齊飛我覺得獲益不少，但係細轆真係好現實，無可能匹敵到大轆車既殺傷力。
第3，車架...Ti- bike車架雖然係我國一個品牌，但係唔好睇少，其實佢都有幫唔少既車廠做代工既情況，因為我發現一個歐洲品牌litespeed既車架同尋日阿叔既車架幾乎一樣，因為佢個架分別真係在於個品牌貼紙拉花...咁車架物料上我自己係鋁合金架，佢個架係釱合金，係個力量黎講佢個部係輸入得盡好多，其實呢個亦都係科技既差異。
到左返屋企既時候，我自己照樣咁返，阿叔又吊係尾!我開頭都唔信部車都係咁快，點知佢到最後元洲仔個個廟位，佢都係從後突擊!又比過多次。
其實，單車食風尾，就算佢點踩都好，如果佢貼到前車，其實佢係可以好快都得...hkci成日有街車話點樣成功追咩車咩車....講真你夠氣夠力追，巴士都係難你唔到!
我仲好記得灰銀夜既道理，如果平時自己一個踩創新路大圈，基本上都係一件辛苦事，因為你係要一個人面對4km既情況，咁其中包括左你自己要抵抗大自然既逆風阻、物理學上冇頭車幫你頂風幫你減風阻力、物理學上冇左頭車送比你既擾流令你踩得輕鬆、體力上無人幫你接力或者你幫手接頭車位...基本上一個人踩係唔快的。
相反地灰銀夜，由於有大堆車一齊跑，基本上當你既位置係主車群，你適當地跟返入人地既bit，44km/h其實係小輪車黎講係非常之快亦都踩得好輕鬆，基本上可以放鬆少少唔係踩得咁摩打腳，因為我自己個人經驗係爆車就輕鬆上到50km/h打入頭車群top ten位...
係時候架車又要再升級，陶瓷係一個好重要既元素...
|
