尋日同阿爸個邊拜山,唉!個個親戚都係滿身肥肉,飽暖思床既人,行步路都慢過人,我依舊都係行得快,最快果個完成...之後我同叔仔係亭仔等佢,更吃了一口煙!爽...
處理左一大輪既拜山任務,食埋燒肉,唉!d燒肉肥到爆,我真係被親戚迫我先至食,我本來打算節食,令體能得以平衡,而家居然來一個肥豬肉,是否有點比呢班親戚玩死呢?
最後係落山既時候,冇意中見到鴨仔珊正係度同屋企人慢慢上山,阿珊同佢屋企人行得雖然唔快,但都好過我d親戚,簡單d黎講我d親戚真係大部份都係城市人,基本連最basic既運動都冇,唔好叫佢地行山,連跑步都冇力!我叔仔加我同細佬諗住同我鬥係和合石跑,佢平時有做開gim同埋有係天水圍跑開步,但居然我同細佬呢d平時以行為強項既人,咁都快過佢!最好笑係我阿麻,我阿麻雖然年紀大,但係最有毅力果個,速度近似龜速,但信心依舊十足...不過落到山腳個時,我阿麻居然話腳軟,真係吹佢唔脹,笑死人...
拜山之後,我地有額外既活動,就係上大陸!我地由羅湖過境,中途d人就一d都唔多,主要都係帶貨既人同埋個d公幹既西裝友,我從未試過復活假期咁順,香港個邊又過得快,大陸個邊仲快!可惜我仲差幾個月先至18歲!如果係18咪方便lo,過香港個邊e道,大陸個邊就可以用自助機!
由於深圳起左個深圳地鐵,所以過先關就可以即刻入地鐵,不愧為地鐵既方便!我係第一次坐深圳地鐵,呢度d地鐵真係幾得意,買車票唔係比張卡,而係比粒綠色銀,粒綠色銀同港幣5蚊銀差唔多大同厚,佢搞笑地入閘係du,出閘係入銀,呢個技計都幾有腦,好過香港d磁卡!
到左福民,福民呢個地方都幾大,連d樓都大d,有d仲好到有露台,香港d樓有露台都難!不過大陸空氣咁差,有露台都冇咩用,你冇理由係露台逗留呼吸母國既「新鮮空氣」,最多係露台曬下衫,又或者食下煙仔,所以有露台都冇咩用...
今次黎福民,唔係去睇樓盤,而係參觀我細叔既大陸的家,以前佢同阿麻一齊住,不過人點都有置業既想法,佢大陸租左間屋,同佢女友一齊住,屋仔雖細,但係都唔錯!睇過佢間屋,都有一個第時大個係大陸租間屋住!講下佢條菜,佢條菜算係唔錯,樣貌同身材中上,可惜d廣東話就真係麻麻地,幸好我d普通話還可以(其實我d普通話係好屎,中一二三都係唔合格,我係識講,唔係好識聽,最弊唔識拼音)
福民最多係酒吧,果然多到七彩,就我妯叔間屋個帶為例,已經有十幾間唔同大細既酒吧。中國最「偉大」既行業,可以數算為為人民提供最大「娛樂」同「性」,我諗呢d就係妓女,簡單同深入民心既名稱就係「北姑」,酒吧多,北姑都會多d,因為酒吧就好似佢地佢「釣魚場」,如果大家有玩過釣魚,你就會覺得釣魚場不論如何都比出海或者去河仔釣魚為易!酒吧都係一樣,人流多,「咸蟲」都會多,d「北姑」上釣率就多好多!「北姑」真係愈來愈厲害,係福民仲好野過深圳,深圳個d都已經夠哂「勁」,福民呢度仲「惡」,d衣著真係得人驚!雖然我個人感覺呢度品流複習,不過唔緊要,最主要係住得好咪得lo,娛樂樓下即有,disco唔岩咪碌保齡lo,唱k又得,食野地方又多,唔愁冇地方食野,仲方便過我屋企!
夜晚食完晚飯個時,我地分頭行事,阿麻同姑姐姑丈同阿麻行街,其餘個d(即我加埋d親戚)一齊搵娛樂!去「碌齡」又打唔成,因為個球場有球隊比賽,呢隊叫eagle bowling team(鷹隊),球隊一d都唔屎波,閒閒地都230幾分,真係打波打到上哂腦!我地再去沙咀搵場打,點知都係冇位,因為成個場都係好多人打波!最後我地選擇去按摩店按下腳,我之前都冇跟過屋企人去按摩,今次真係第一次,我見「碌齡」未咁快有得打,咪按住腳先lo!反正時間流流長,按腳又有英超聯睇,總算係可以打發下時間!我細佬就係第二次玩,佢就真係happy,佢可以睇到國內個d cctv既電影台,有周星飛馳睇!原來我個人係好受力,我果個係女師傅,佢開頭按真係冇咩力水,我唔係好feel到佢d功力,之後我叫佢大力少少,d力度果然出哂黎,我feel到佢真係出盡力去按,good!個師傅將我平時行山個d積存既疲累放反出黎,爽也!
按完腳,我地再去返睇一間碌齡場睇下有冇位,足之今次有位la!耐冇打波點都有d不在狀態,以我既室內運動黎講,碌齡暫時係最好,以我個人平均一場差既70幾分,勁既過100,最叻係121分!咁尋日打波,話下都有成年冇打,點都有d生疏,幸好d成績不錯,96,99,77,77,110,106,78!最好笑原來碌齡都有獎品攞,由於我最尾個場係78分,100以內8字尾既分係可以有一個鎖匙扣,我就咁得到獎品一份!
最後夜晚3點幾返到酒店,嘩!個人累到一訓上床,沖涼都唔沖就訓著左啦!
其實福民的確係一個挺理想既居住地方,交通方便,買野又容易,d樓又大,食野就更加唔洗諗,落一落街就可以搵食,消費物價又低!我細叔佢係港島灣仔返工,住就係福民住,35分鐘就可以返到工,仲要包冇遲到!另外屋租好平,2000蚊人仔就可以租一個幾大既單位!第時我都想住呢度!
|
