呢排我細佬正係考mock當中，基本上佢既單車活動暫時要擱置一陣，咁我經歷哂呢d階段，都明白佢既痛苦!
我自己出左去練車，咁一個練車其實係無太大趣味性，純粹都係鍛練下自己既體力同埋毅力...
唔知點解，我通常個人練車既時間係星期三既下午時間，多數都係3點幾4點到啦!其實最難踩係呢段時間，我選擇既路段係上水既屋企至沙田孖橋為一個練習既路線，但係每一次我出車係呢個時間，都會遇上一個問題，就係逆風阻，而且係幾勁既!
咁一路出都無咩大問題，最大問題係大窩西支路既維修地段加多左，令到路中多左好多位置加插左地盤掘地既圍封，同埋維修區燈位。咁停燈多左，自然令活動既趣味性減少左。
之後我一路出到吐露港，通常我自己出車係唔會係元洲停，一路踩埋出去!咁我踩到去科學園曲隧道前，一路都無人敢後追我推下我尾，因為我以37至44km/h進行中，基本上租車、有小輪徑小改人士、700C公路車、MTB既XC或CITI...都無追我!
但係去到科學園曲隧道口前200多米，見到有位小姐身穿港隊車衫，我見到佢，佢亦留意到我係後面推進上黎，佢開始有D戰意，咁佢係踩緊700C公路車，我開頭係佢車尾，推下尾先，睇下佢有咩反應，之後佢望後，有加速既意味...咁我當然唔會放過佢啦，點知我一起腳就已經放左佢飛機...
呢位小姐，身穿港隊衫，藍色車褲，我唔清楚究竟佢係咪港隊，但係有一樣可以肯定既就係，佢既肌肉好結實，似乎係食過下夜粥...佢既肌肉感有少少似當時係禮賢會返學玩長跑有份TRAIN我既MISS歐!MISS歐既身型比佢更鋼鐵化，有D似三項鐵人入面個D女鐵人!
究竟呢位小姐係咪有心想挑下我機，定係我會錯意?真係唔知!
今次到孖橋，我直頭直接孖橋U TURN!呢個玩法我從來都冇咁做過，因為平時我會係孖橋飲水同食口煙，由於今次想練得勁少少，唔休息返屋企...
途中遇到一位踩TRIN X既男子，大概同我差不多大，但係佢係直隧道同曲隧之間小直路因為唔留意前路情況，佢突然間撞了車埋鐵網一個CORNER位，連人帶車倒地!
別人有事，可理...可不理，但係我係理，而且係要幫到人，我唔係一個睇人死既人，而係會救人既人，始終有測隱之心既!
我問對方:「有冇事AR?」佢話:「冇!」但係佢隻腳膝蓋位有迷你月餅大既傷口，而且有不停出血既情況，我落車救人啦!
我再問:「有冇事...」對方依然都係話:「冇呀!有心...」點會無事?膝頭刨地...傷口入沙、流血、無清水、車甩鏈、SEAT位斜左...
咁我首先比水佢洗傷口先，因為真係幾多沙插係個傷口，而且佢傷既位置係去到肌紋個層，其實都幾深...咁佢幸好有帶紙巾，都可以整理下既...
之後我幫佢救車，TRIN X既車體設計唔好，佢飛輪同車架距好開，容易食鏈係之間...佢就係食左鏈，咁上左條鏈係餅到先!條鏈好實都幾難揪出黎，最後同佢一齊合作整都整得返。
佢真係黑仔，果部單車係佢自己岩岩買黎，佢準備返中大校宿...點知佢就遇到場咁既野...唉!真係黑到爆燈!
最後，我都係來回2小時唔洗就返到屋企...
|
