尋晚响床到溫書，結果溫溫下書訓著左，訓到今朝7點幾鬧鐘響，起身發現房燈開住左成晚，心諗：哎吔，好嘥電呀！

所以即時熄燈，大家通常熄完燈會做咩？熄完燈好自然又繼續訓，結果又訓過龍，哈哈，不過趕得切返去冇遲到∼

至於份測驗卷，個個都話好難唔識做，本山老師仲乜出咁難呀？！想我地個個都唔合格？？

　午餐

Joan見到我午餐食炸蝦，佢話尋晚先食完今日又食，我覺得超奇怪，明明尋晚晚餐食炸豬扒，邊有炸蝦呀？！＠＠

原來佢地早落去食飯o既係炸蝦同魚，唔知係咪整得唔夠，我地遲落去食飯o既變左食炸豬扒，晚餐變得越黎越奇怪。

　雖然未到中秋節，但等唔切要食月餅啦！以我食月餅多年經驗，美心月餅比較好味！！

不過有得食已經好滿足！！大家鍾意食邊傳統月餅定冰皮月餅？我就鍾意食傳統月餅，仲要食有蛋黃o既

　晚餐。。。黑媽媽果舊。。。係魚黎嫁！！

夜晚响食堂發生左件好好笑o既事！我一行入飯堂，見到個成日食晚飯都撞到o既日本男仔，平時大家都會笑下點點頭打招呼，

今日佢同我揮手，仲講左句日文　當時我呆左冇應佢，其實係因為我聽唔明佢同我講果句日文，可能佢同我講關西話∼

之後坐佢對面o既朋友問左佢一個問題，不過我又聽唔明= ="　我估係佢朋友見我冇反應，質疑果個男仔究竟係咪真係識得我。

哈哈，攪到人咁尷尬tim∼睇黎我要學下關西話，連基本o既打招呼我都唔識，點同日本人做朋友呀！！

原來今日係八月初一，我舊曆生日呀！

生日係咪應該食...茄汁大蝦薑蔥炒蟹豉汁炒聖子椒鹽瀨尿蝦蒜茸粉絲蒸扇貝芝士焗龍蝦鍾記鹹雞

大家知道嗎？！今日o既太陽係由西邊升起嫁！！真係發生左好多不可思議o既事∼

　呢張相係我今朝落去食早餐時影o既！！大家冇眼花，真係未夠7:00AM！！

　早餐有意粉，野菜湯，小麵包

其實係因為我前晚訓得唔好，加上尋日又冇訓晏覺，結果尋晚太攰，12:30AM就走去訓覺，所以今朝要早d起身溫書。

Joan一入食堂見到我已經食緊早餐，即時呆左，哈哈∼　恣綿直頭冇諗過係我，仲以為Joan同個新人一齊食早餐，

我冇紮頭髮啫，即時唔認得我＠＠＂雖然比平時早左好多起身，不過溫書o既時間其實只有20分鐘，哈哈，溫黎都嘥氣∼

今日o既測驗超難！其實唔溫書都得，因為係寫小論文。唔止題目難，最難係佢要我地用學過o既文法黎寫∼

諗得d論點黎又要諗用咩野文法，得50分鐘完全唔夠時間寫，後來我都放棄唔諗文法，事但寫左d論點落去。

哈哈，小論文o既日文讀音係＜SYOU RON BUN＞，奧村老師讀到同小籠包o既日文＜SYAO RON POO＞超似，

所以我地都話今日o既測驗唔係寫小論文，係寫小籠包！　哎吔，突然好想食鼎泰豐小籠包呀＞O＜

　午餐自備飯盒，除左香港人Mira之外，其他台灣女仔都未見過冬瓜粒湯飯，佢地覺得好新奇∼

今日最最最不可思議o既事就係放學同班主任面談！！！奧村老師話上次大考（6月時）我係全班最高分＠O＠　完全不能相信！！

老師話如果keep住，升班應該冇問題，不過會話要練習多d。因為之前個個都被奧村老師話成績唔係幾好，可能升唔到班，

所以佢地都話奧村老師對我好。 其實個個老師都好好，平時我上堂成日發呆遊魂，老師都冇鬧我，只有鬧其他人，哈哈∼

奧村老師最鍾意嚇人成績差升唔到班，今日竟然冇講過，係咪好不可思議先？！簡直覺得今日太陽係由西邊升起...