今日全日都係食雞　先黎早餐，唔夠時間落飯堂食，唯有响房食蛋卷，蛋卷都係用雞蛋整，所以都算係雞啦∼∼

　午餐食炸雞飯

　晚餐咁啱又係食炸雞，真係一日三餐食雞，不過姓鍾o既食極都都唔厭！！

訓訓下晏覺聽到有人call我開眼仔，原來係Javy同澄澄，超耐冇同佢地開眼仔，唔得！！以後每個月至少要見一次呀＞＜

8:00PM o既音樂節目有NEWS，即係有加藤成亮，所以我準時8:00PM落飯堂霸位睇電視∼坐我隔離個女仔都係鍾意NEWS，

佢話同親朋友去唱K都會唱佢地d歌，仲叫我下次一齊去唱K，哈哈！總之有共同話題就好容易識到朋友∼∼

　小企鵝電話繩，高同學送o既，好可愛呀∼ ^^

最近發生左件靈異事件！！話說有日9點幾我食完晚飯返到房，見到房間個電話顯示611（Susie房號碼）响8點幾打過黎，

不過我冇即時打返俾Susie，我諗如果佢有緊要事會再打多次俾我，最後都等唔到佢電話，咁我第二日就問返Susie打俾我仲乜，

佢竟然話夜晚10點幾先收工，冇打過俾我。冇理由！！房個電話有顯示日期同時間，我睇得好清楚嫁，不過算啦，當我睇錯∼

今日到Susie問我，尋晚7點幾係咪打過去佢房，我話冇，因為我尋日7點幾訓緊晏覺，訓到差唔多9點先落去食晚飯，

佢又話睇得好清楚個日期同時間，超驚呀！！我冇吹水嫁∼∼下次再遇到呢個情況我一定影低電話顯示o既日期同時間做證據∼∼

聽日希拉利就到啦，終於有朋友黎探我，超開心！！我一定會提供５星級o既服務，黎緊呢幾日要盡情地玩玩玩

下午o既選修科堂係睇電影，其實唔止電影，仲會睇卡通片，今日就睇左＜怪醫黑傑克＞，唔知大家有冇睇過呢？！

　黑傑克醫生，太型啦∼

　佩佩，好可愛o既小女孩

套卡通雖然講日文，不過因為有字幕，所以都明白。最麻煩係睇之前老師會派功課，要先查晒d生字o既解釋，睇完後又要作文，

仲要即堂交tim，話晒呢d功課要計分嫁ma，我緊係要慢慢諗慢慢寫，即堂交攪到我好大壓力！所以都係唔讀呢科啦∼∼

諗住轉去文法班或者N2能力試班，唔知成唔成功呢！不過其實呢兩班都悶悶地，有冇d有趣o既選修科上呀？！ ＞＜

　午餐，幅相呃人嫁，入面邊有咁多醬丫！！

　Susie食o既麵包仲大過佢塊面@o@

　下午茶＞＞迷你牛角酥，高同學請o既，多謝

　晚餐，個麵o既汁仲杰過鼻涕＝＝

有個電視節目好好笑，做左個調查，問日本人＜煮咖喱時會放牛肉定豬肉？？＞　結果响關西地區，包括我住緊o既大阪，

有９成人都話會放牛肉。而關東地區，好似東京咁，有９成人都會放豬肉。個節目仲去左好多個縣到做調查，

查下究竟係乜野縣乜野市乜野町做分界，不過個地方名我唔記得左啦！呢個都未算珍奇，之後又做左第二個調查，

＜會用醬油定味噌煮鯖魚？？＞，結果關西地區被訪者都話用醬油，真係嫁，我地寮o既都係用醬油，個主持再問有冇聽過用味噌煮，

大部份人都話有聽過，不過用味噌煮係昭和時代o既煮法。而關東地區個個都話用味噌煮，同樣個主持再問有冇聽過用醬油煮，

個個都話未聽過有呢種煮法＠＠　明明都係响日本，估唔到關東同關西o既飲食習慣咁大分別，真係唔睇呢個節目都唔知∼

１０月１２日，星期二

　早餐太渺小，開始上堂冇幾耐已經肚餓＝＝＂

上午係班主任堂，Yumi話隔離班個老師同佢講，我地班主任係個好兇o既老師！不過我地完全唔覺得老師兇，

因為之前個班主任奧村老師仲兇，出左名心情唔好會黑面鬧人！我地對過奧村老師半年，所以唔會覺其他老師兇，哈哈∼∼

　因為小息時食左件蛋糕仔，午餐唔洗食咁多野！

下午係選修科堂，今日我上o既選修科係聽解，今次分班超混亂，同一班入面有二年級同三年級o既同學，唔知會唔會變得難左呢？！

　晚餐又食咖喱，不過我鍾意！仲有芒果tim ar∼

１０月１３日，星期三

通常遲左起身趕唔到8:17AM班車先會搭遲d o既班次，今日Joan竟然一早同我講大家都改搭23分班車，唔通個個都遲左起身？！

原來唔係，而家同宿舍多左好多同學校o既同學，佢地又係搭17分班車，攪到班車超多人，佢地話唔想咁迫所以搭遲一班車。

　尋日中過一次招，今日飲多碗湯，希望唔好咁快肚餓∼

坂詰老師堂個個叫苦連天，好彩我買左d超細粒o既糖果，眼訓o既時候就靜雞雞食一粒，咁先冇瞌眼訓全程留心聽書！！

　自製午餐，有意粉，雞肉炒菜

今日o既選修科堂係聽音樂，同班o既竟然冇人同我一齊上，好彩有Yvonne同豪姐姐陪我！不過呢科o既導師係奧村老師，

本來大家都有d驚佢，今日上完堂之後又覺得ok冇乜野！而且呢科唔洗測驗做功課，淨係上堂聽下歌，睇下d歌詞，超輕鬆

　下午茶，細細杯，味道都唔錯^^　 　晚餐

上星期開學時派發左第一張成績表，放埋左一邊，差d唔記得有佢o既存在∼

　超簡潔o既成績表

我响日本真係有努力讀書嫁