今日早餐，Susie請o既抹茶紅豆卷，好美味呀

上個星期五為左盡快返宿舍俾張車飛Kaku，攪盡腦汁作果篇文，竟然得到大西老師o既稱讚，好開心呀，呵呵∼∼

全篇作文只有兩個地方錯，都係寫錯左助詞，而文法同生字方面全部都冇錯，哈哈，第一次份作文冇俾老師畫到花晒！！

　今日o既心情就好似今日o既天氣咁（睇大家o既留言先知原來有個颱風吹緊黎大阪！）

　由班房影落樓下，好多同學踩單車返學！哎吔，好想踩單車呀∼大家識唔識踩？？

　尋日同Susie，Leslie約好今日lunch食杯麵。冇料o既杯麵，好寂寞...

放學陪高同學去書店買野，發現出左好多2011 o既月曆，d貓仔狗仔超得意呀∼不過要千幾YEN一個，好貴所以冇買到！

　晚餐唔好味！雖然寮o既早餐進步左，但晚餐就退步左，份量又越黎越少！

本來尋日同班主任面談，不過因為要做老師o既評估問卷所以改左聽日，話就話份評估問卷唔會俾返教我地o既老師睇，叫我地放心寫

不過我地個個都覺得好危險，因為d老師認得我地o既字跡嫁ma，所以大家都冇寫評語，淨係圈左d分數就算，咪當我地傻先得嫁

話咁快第二次同班主任面談，都已經知道晒佢會同我講乜，肯定會講成績唔好，可能會升唔到班，因為佢同個個都係咁講，哈哈∼

今日真係超LUCKY，早兩個月考o既N3能力試，竟然奇蹟地合格，呵呵，真係全靠d雞同乳豬相。

完全冇溫過書就走去考，好多都唔識，好多都係撞嫁咋！！除左讀解，其餘兩part真係啱啱好！錯多一兩題就唔合格。

另外上星期o既測驗派返黎成績唔錯，有87分，高過班平均分差唔多10分，嘻嘻，好開心，緊係要慶祝一番！！

　我同Susie N3都合格，食雪糕慶祝

不過平野真係冇好野，士多啤梨味完全冇士多啤梨味，連朱古力味都冇朱古力味= =""　下次都係買＜鬍鬚爸爸＞食好過。

早幾日買左個大煎PAN，遲d可以煎，炒同蒸野食！！不過第一次用並唔係煎野食而係煮咖喱，次次都唔覺意煮左一大煲。

　Leslie又黎宿舍＜痴餐＞，今次全靠我同Susie偷運食物上房

　有魚，茄子煮雞，麵豉湯

　我送俾Leslie o既書籤，好好保存啦∼太耐冇畫鴨仔，生疏晒tim><

韓國之旅第八天（８月２０日，星期五）

　一早就走人lu...嗚嗚...個個都可以繼續留响韓國玩，得我一個要返日本開學。

仲記得第一日由機場去酒店用左幾耐，拖住d行李行左幾多路嗎？！得我自己一個去機場，緊係唔會搭地鐵咁傻啦！

寧願俾貴少少坐直接車去機場！不過架車周圍兜，兜到我瞌晒眼訓。結果搭左差唔多一小時四十五分鐘先到機場。

我去韓國時個喼好輕之ma，但回程時超晒重，成25.5KG，好彩冇俾人罰錢 ^^"　今次我醒目啦，知道搭飛機冇野食，

上機之前去＜星巴克＞買左份三文治，當個個食緊花生之際，我就响到食三文治，呵呵∼　最終下午五點幾返到宿舍。

韓國之旅　－　特別篇

　Ponchi Papa寄件T-Shirt俾招待過我地o既韓國消防員！Hilda Mama寄post card回家

　我都有寄post card嫁！果三個幸運兒咪就係......嘻嘻，秘密

　又偷運公仔去旅行，帥軒仲要偷運三隻咁多，過份！！

　d公仔都係我地屋企一份子黎嫁∼

　由香港帶黎o既支援物資

最重要o既係錢！！終於有錢交學費，交租，交電話費 　仲有一大埋文具，醬汁，好可愛o既鴨仔扇，多謝Javy

仲有幾件衫同褸，連泳衣都拎埋黎，唔知幾時先有機會去游水呢？！

用高露潔牙膏，刷牙都刷得開心d！！另外仲有護膚品，磨沙沐浴露。終於有蒸架，可以蒸野食∼

蛋卷，合桃酥，月餅，全部我都鍾意食　夏桑菊，薑茶，竹蔗茅根，有排飲呀！

小鴨洗衣籃，小鴨購物袋，另有小鴨，米奇床單。最驚喜係李逸朗最新CD，我叫佢地幫我買，但冇諗過會帶埋過黎俾我。

　韓國買o既物品

紫菜係俾大家o既手信，大大包好阻地方！！而家可以睇清楚條毛巾，個阿叔車d字係咪好靚呢？豬豬long衫夾好得意。

我d同學就係讚呢對涼鞋可愛！個朱古力冬甩型o既膠紙座都好得意。雖然日日帶手錶，不過其實我一d都唔守時，哈∼

韓國之旅日記終於都打晒啦，多謝大家收看。