7月21日，6:19AM，奈良県發生地震∼　我訓緊覺完全冇感覺 = ="

如果唔係同學話返俾我知，我真係唔知發生過地震。

同宿舍o既個個都話感覺到，係得我一個唔知。

班入面只有文同學，旭同學，Joy同我一樣唔知發生乜事∼

不過。。。我住响八樓都冇感覺，睇黎我o既危機意識係......零

連續放左三日假，加上尋日行左大半日街超攰，所以今日要好大意志力先起到身返學，而且仲有時間食早餐，好叻女呀！！

　冇麵包，今日應該好黑仔。。。

旭同學成個上晝都冇黎上堂，仲以為佢病左，原來係訓過龍　下畫佢終於出現啦，冇剃鬚個樣即時老左，要改口叫佢做叔叔∼

　咪以為我咁叻整飯盒，其實只係响超市買飯盒，再轉落個微波爐盒到，哈哈

超市買飯盒 298 YEN，便利店買要 398 YEN，一個星期起碼可以慳 500 YEN呀！！唯一麻煩o既係每日放學都要去超市買定飯盒...

　宿舍o既咖喱開始進化，越黎越辣＞＜

上網見到NEWS九月將會開演唱會o既消息，對上一次開演唱會已經係08年尾，所以今次好想去睇！！我要親眼見到加藤成亮

不過......去睇NEWS演唱會並唔係想像中咁簡單！！只有FANS CLUB會員先可以抽飛，抽中左先可以俾錢買，(同買奧運門票一樣)

如果唔係FANS CLUB會員就要等人放上網拍賣，價錢肯定貴過原價多多聲！　問題就係响呢到，如果要抽飛而家就要入FANS CLUB

入FANS CLUB要 5,000YEN，都話越窮越見鬼嫁啦＞O＜　咁煩o既事當然要搵人相量下啦，同Kaku，Hilda Mama相量完暫時未有結論

如果真係入會，响超市買飯盒都唔慳得幾多，睇黎要日日食方包先得啦！之前有錢o既時候入左會而家咪唔洗煩 law

今日9:00AM就起身同Angel MSN，由於佢同朋友都冇電話，所以一定要約清楚時間地點，我又未去過心齋橋站，事但約响一號出口等。

點知搭車去到心齋橋站，得四五六號出口，後來問職員，佢話呢個站冇一號出口＠＠""　嚇死我，都唔知响邊到搵Angel........

原來心齋橋站同中環站一樣咁麻煩，一出錯左閘就要兜個圈！要响四號出口行上地面，再行一段路先可以去到一號出口∼

明明係同一個站，但係地底唔通，超白痴！！11:00AM會合左Angel同佢兩個朋友就開始行街，行到1:00PM就食午餐

　午餐食左 380 YEN，同平時返學食午餐差唔多啦∼

之後不停行行行，行到6:00PM先走人，Angel就開心啦，有收獲！！我就只係買左杯蜜瓜刨冰食，今日真係超熱，要食d野降下溫！！

7點幾返到黎都唔想煮野食，去買左個包同餃子食就算∼∼　今日行左咁多路，應該瘦左好多啦掛，呵呵呵

高同學今朝一早打黎叫我陪佢去車站，佢真係好彩，平時我肯定冇咁早起身！咁啱我又夠鐘出門口，所以就陪埋佢去車站。

原來佢尋日出閘時將張定期券同單程車飛一齊放入部出閘機到，正常情況應該係會彈返張定期券出黎，但係尋晚冇彈到。

結果今日我地去到車站，個職員話check過晒所有出閘機都搵唔到張定期券@@" 定期券最平買一個月都要 6,870YEN (約HKD$ 610)

唔知高同學果張係一個月...三個月...定係半年o既定期券呢？攪到我今日出閘時都驚驚地，如果佢唔彈返出黎我肯定癲左！！＞＜

三日假期咁就完左，過得真係快，我响學校借左本漫畫都未睇過tim，好彩星期五先夠期。

　哈哈，係＜我們這一家＞o既漫畫黎嫁！！

　睇漫畫學日文∼唔知花師奶唔唱＜別怪她＞會唱咩野歌呢