７月２日，星期五

尋晚痛頭已經食左粒藥先訓覺，但今朝仲覺得有d痛，而且仲好似發燒同鼻塞tim，想偷懶唔返學嫁啦∼　不過唔返學好似要醫生證明！

要去睇醫生咁麻煩，最後都乖乖地返學！　尋晚Hilda Mama先問洗唔洗帶多d藥俾我......我話d藥都冇乜食過......點知今日就........哈哈∼

　仲有個麵包仔，不過俾我烘到佢好似去完非洲咁，所以不宜出鏡！！

平時我地搭8:17AM班車，8:37AM就到天王寺車站，如果搭唔到17分，搭下一班23分o既都唔會遲到。今日去到車站見到所有車都延遲，

諗住比平時遲幾分鐘啫，點知9:00AM先到天王時車站，足足遲左20分鐘∼　9:00AM開始上堂，第一次返學遲到，但唔係因為唔知醒∼

　遲到要扣出席率嫁！所以記住拎返張証明書俾老師，有証明書就唔洗扣出席率∼

而且日本呢邊好好，一有延遲就會有職員响出閘機前派証明書，唔似得香港咁，冇証明書要同老師拗一大餐，老師仲要唔信law = ="

傷風藥藥力好勁，上堂不停瞌眼訓，好彩奧村老師冇帶眼鏡，淨係睇到前面同學d樣，見唔到後面！午餐冇乜胃口，只食左三文治。

放學返到黎下午茶都唔食就食藥訓覺，由4:30PM訓到9:30PM，訓醒覺已經好左好多，起碼退左燒，不過仲係冇胃口食野。

　明明晚餐好豐富，不過真係冇胃口食∼

終於有波睇啦！荷蘭對巴西，巴西下半場好似打假波咁，完全冇晒攻勢，d球員係咪冇食飯！？攪到我都冇心機睇，寧願抄罰抄.......

　時間關係，早餐只食左咁多野∼∼

寮母好攪笑，我斟茶時個茶壺已經冇晒茶，由於我好趕時間，所以將個吉茶壺俾左寮母後就順手烏低身打開雪櫃拎壺新o既放上枱，

寮母見到不停同嬸嬸講話我好大力，個壺咁重都拎到= ="　當然啦，之前返工練返黎嫁ma！我有老鼠仔嫁(之前......) 而家應該係肥肉！

哎吔∼∼∼∼呢個7月份應該會好難過！！由於大家都要慳錢，所以我地之前講好左一個月只可以食一次Mos Burger，結果。。。。。。

　7月1日就食左，要等8月份先可以再食啦＞o＜　呢d咪叫先甜後苦law.........

今日選修科上會話，我，Susie，Celine，Joan咁啱响同一班，第一次四個一齊上堂！每練完一段對話麻生老師就會叫我地換位，

咁先可以同唔同人練下對話，有幸同1G班o既同學練會話，大家傾得好開心，Susie話我一講有關明星o既話題d日文就會突飛猛進，哈∼

　晚餐好炸.....睇黎要準備迎接d暗瘡！！

努力左幾小時，放棄左訓晏覺o既時間，終於抄好兩課罰抄！為左慳紙，全部唔隔行d字痴埋一堆，本來一個漢字用一張A4紙，

而家兩個漢字先用一張紙，我好環保嫁！！抄左兩課隻手已經好攰，仲有40課未抄，完全係體罰我隻右手！！快d幫我告個老師！！！

６月３０日，星期三

今日我發現左樣野，原來久保老師識得教書嫁！！！春學期久保老師o既堂全部都响下午，佢好少講書，上堂只係狂做工作紙就算∼

夏學期久保老師o既堂响朝早，我地每個朝早都要學漢字，所以佢要教書，第一次見久保老師成堂都係企响到教書，平時佢坐嫁，哈！

而且久保老師默d平假名唔係好難，咁我默書就唔會全軍覆沒啦！！估唔到我會鍾意上久保老師堂　大家都話佢教書進步左呢∼

下午又係上選修科，今日上讀解。班入面有一半人都係1G班，所以蔭山老師話做d閱讀理解可能會深d，如果唔想上呢科可以轉科∼

不過我諗唔到轉邊科好，算啦∼繼續留响到上讀解，我諗睇多d應該會明白掛！！突然覺得自己變左小學生，响到做閱讀理解.....

　晚餐味道真係好"普通" @@

夜晚冇世界盃睇有d唔慣，平時一早坐定定等睇波嫁ma，今日10點幾竟然坐响到做功課　一做就做停唔到手，做到2:00AM先訓覺