尋晚Celine响MSN通知我幾點鐘集合，不過我熄左電腦後又唔記得左，諗左好耐都記唔起係10:50AM定係11:50AM，真係記憶力衰退......

唯有朝早10:30AM起身開返MSN睇，結果係11:50AM，如果訓返我又怕唔知醒，所以今日一早就起左身！留肚去難波食好好味o既拉麵∼

點知遇著＜人身事故＞，即係有人跳軌，攪到d班次延遲晒，差唔多1:00PM先出到難波！原來冇人識路去間拉麵店，又要周圍搵路，

搵到間拉麵店又要等位，最後我地都唔等一齊坐，寧願六個人分開坐，大家早d有麵食∼　差唔多2:00PM先有野食，餓死了.....

　見到我地等位嗎？！

　睇落就知好好味∼

　左：赤丸　右：白丸

我食白丸，750 YEN，真係好好味！　Susie食赤丸，850 YEN，雖然都好味，不過佢話咸左少少！大家有機會都去試下啦∼

食完野响難波行街，平時我已經唔鍾意行街，落雨仲更加唔想行！行到4點幾就返宿舍，之後做下家務，執下房，又好有滿足感^^

　舊魚......我真係有努力食嫁！！

一邊同Ponchi Papa開眼仔一邊睇烏拉圭對南韓，佢果邊慢幾秒，所以佢叫我唔好嗌出聲，佢未到果個畫面= =" 唔嗌出聲邊好睇嫁@@

６月２５日，星期五

放完假第一日正式上堂，全日都不在狀態！明明早一晚冇睇日本對丹麥，比平時早訓左嫁啦，但都係超級眼訓，點解會咁嫁？！

今日測漢字同第十四課測，今次真係死硬，合格的話要還神！！原來唔止我，好多人都有放假後遺症，佢地嚴重到連測驗卷都唔想寫。

新學期開始當然要調位啦！今次方法好新穎，用畫鬼腳黎決定。奧村老師叫我地响張紙最頂揀一格寫個名，我叫Thomas寫我隔離果格，

話唔定我地又可以一齊坐∼點知個結果係..........我坐最尾果行，佢坐最前果行，仲要對正老師枱tim，哈哈，俾Thomas鬧鬼我

調位後同Iku坐，第一次同唔係咁熟o既人坐，唔知之後會唔會變friend左呢！？調左咁多次位，我越坐越後，完全係上天o既安排∼

　放左咁耐假，好耐冇食便利店o既食物∼

實在太攰，訓左一個長達4小時o既晏覺，我都覺得有點離譜！訓醒充滿能量睇波，本以為巴西對葡萄牙好好睇，點知悶和收場。

Kaku不停叫Thomas幫佢買左對鞋，Thomas話我地好似"補藥黨"，氹佢買鞋咁，哈哈∼真係唔關我事，我係路人甲黎嫁咋，唔係同黨！！

Kaku下次再努力啦，叫Thomas飲多幾杯酒，飲醉左佢就乜都應承嫁啦！！到時再加一句＜貨品出門，恕不退貨＞就乜都掂晒∼∼

講返星期四，知道可以繼續留返响１Ｆ當然要慶祝下啦∼　今次冇一大班人慶祝，只係同Susie兩個悄悄地慶祝，哈哈

　Mos Burger，700 YEN，超好味！！

諗起上次响USJ食o既漢堡包，要千幾YEN，仲要唔好食＠＠"　以後食漢堡包都係食Mos Burger好啦，其他好似冇乜保證∼∼

之後去左旅行社問去韓國機票幾錢，原來咁近都要5萬幾YEN！又幫阿Frank去郵局問寄野返香港幾錢，寄包裹比我想像中平！

　野菜咖喱，冇肉感覺好寂寞∼∼

連平時好少睇波o既Aki都話會3:30AM起身支持日本隊，日本人好愛國呀！可惜我第二日要測驗，要溫書冇睇到日本隊羸波一刻！！